តុលាការខេត្តព្រះសីហនុនៅថ្ងៃនេះបានសម្រេចឃុំខ្លួនជនជាតិចិនចំនួន៩នាក់និងគ្រោងបណ្ដេញជនជាតិចិន៧៦នាក់ផ្សេងទៀតចេញពីកម្ពុជា ក្នុងចំណោមជនជាតិចិន៣៨១នាក់ដែលត្រូវបានសមត្ថកិច្ចឃាត់ខ្លួនក្នុងភោជនីយដ្ឋានមួយកាលពីចុងខែកញ្ញា។
កាលពីយប់ថ្ងៃទី២៩ ខែកញ្ញា សមត្ថកិច្ចចម្រុះបានឃាត់ខ្លួនជនជាតិចិនចំនួន៣៨១នាក់ រកឃើញអាវុធនិងថ្នាំញៀនមួយចំនួន ក្នុងភោជនីយដ្ឋានស៊ីនខាយសៀនមិន នាភូមិ៤ សង្កាត់លេខ៤ ខេត្តព្រះសីហនុ ។
ព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងខេត្តព្រះសីហនុ លោក លឹម ប៊ុនហេង ថ្លែងប្រាប់វីអូឌីថា តំណាងអយ្យការបានសម្រេចចោទប្រកាន់មេខ្លោងប្រព្រឹត្តបទល្មើសចំនួន៩នាក់ លើសំណុំរឿងពាក់ព័ន្ធបទល្មើសចំនួន៣ គឺគ្រឿងញៀន សញ្ជរកម្ម និងការប្រើប្រាស់អាវុធខុសច្បាប់។
លោកបន្តថា មនុស្សចំនួន៧៦នាក់ផ្សេងទៀតដែលសុទ្ធសឹងតែប្រើប្រាស់គ្រឿងញៀន នឹងត្រូវបណ្ដេញចេញពីកម្ពុជានៅពេលខាងមុខ ហើយក្រៅពីនេះ ត្រូវបានដោះលែងដោយគ្រាន់តែធ្វើកិច្ចសន្យាប៉ុណ្ណោះ។
លោក លឹម ប៊ុនហេង មានប្រសាសន៍ថា៖ «មុខសញ្ញាជួញដូរ៩នាក់ ត្រូវបញ្ជូនមកតុលាការហ្នឹង មកដល់ពេលនោះ ចៅក្រមស៊ើបសម្រេចឃុំខ្លួនបណ្ដោះអាសន្ន រង់ចាំស៊ើបអង្កេតបន្ត។ បុគ្គល៧៦នាក់ទៀតដែលធ្វើតេស្តរកឃើញសារធាតុញៀន នឹងត្រូវបណ្ដេញចេញពីព្រះរាជាណាចក្រកម្ពុជា អ្នកផ្សេងទៀតត្រូវធ្វើកិច្ចសន្យាអប់រំឱ្យត្រលប់ទៅលំនៅឋានវិញ»។
ទោះជាយ៉ាងណាក្ដី លោក លឹម ប៊ុនហេង មិនអាចបញ្ជាក់បានទេថា តុលាការចោទប្រកាន់ជនជាតិចិនទាំង៩នាក់តាមមាត្រាច្បាប់ណាមួយនោះឡើយ ដោយសារតែលោកមិនបានកាន់ឯកសារផ្លូវការក្នុងដៃ។
ស្នងការនគរបាលខេត្តព្រះសីហនុ លោក ជួន ណារិន មានប្រសាសន៍ថា នគរបាលខេត្តព្រះសីហនុបានបញ្ចប់ការសួរចម្លើយនិងបញ្ជូនជនសង្ស័យទាំងអស់ទៅតុលាការ កាលពីថ្ងៃទី០៣ ខែតុលា។ លោកបន្តថា ស្នងការនគរបាលខេត្តកំពុងរៀបចំបំពេញបែបបទ ដើម្បីបណ្ដេញជនជាតិចិនទាំង៧៦នាក់ចេញពីកម្ពុជា។
លោក ជួន ណារិន បានបញ្ជាក់ថា៖ «អាលូវនៅត្រៀម [បណ្ដេញចិន៧៦នាក់ចេញ] ត្រៀមចាំសិន ចាំលិខិតផ្លូវការពីថ្នាក់ដឹកនាំក្រសួងមហាផ្ទៃសិន។ យើងដាក់ពួកគាត់នៅស្នាក់ការត្រៀម របស់អគ្គនាយកដ្ឋានអន្តោប្រវេសន៍ប្រចាំនៅច្រកទ្វារទំនប់រលក។»
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា លោកគាំទ្រចំពោះចំណាត់ការរបស់សមត្ថកិច្ច ប៉ុន្តែអាជ្ញាធរកម្ពុជាគួរស្រាវជ្រាវរកឫសគល់នៃអំពើឧក្រិដ្ឋរបស់ជនជាតិចិនទាំងនោះបន្ថែមទៀត។
លោក យង់ គីមអេង បានលើកឡើងថា៖ «ញឹកញាប់ណាស់ដែលចិនមានបញ្ហា បង្កនូវអសន្តិសុខ បង្កការភ័យខ្លាចដល់ប្រជាពលរដ្ឋកម្ពុជា។ អីចឹងរដ្ឋាភិបាលគួរមានលក្ខខណ្ឌដោយឡែក ហើយចាំបាច់ក្នុងការត្រួតពិនិត្យនិងតាមដានពួកគេទាំងនោះ»។
តួលេខដែលផ្ដល់ដោយសាលាខេត្តព្រះសីហនុ បង្ហាញថា គិតត្រឹមខែមិថុនា ឆ្នាំ២០២០ មានជនជាតិចិនប្រមាណ១ម៉ឺន៥ពាន់នាក់កំពុងរស់នៅ ធ្វើការ និងប្រកបអាជីវកម្មក្នុងខេត្តព្រះសីហនុ៕
