ចាងហ្វាងបណ្តាញព័ត៌មានអនឡាញ TVFB ដែលត្រូវបានឃុំខ្លួននៅពន្ធនាគារដោយសារដកស្រង់សម្តីលោកនាយករដ្ឋមន្រ្តី ហ៊ុន សែន ទទួលបានសេរីភាពឡើងវិញនៅថ្ងៃចន្ទនេះ បន្ទាប់ពីសាលាដំបូងរាជធានីភ្នំពេញសម្រេចប្រកាសសាលក្រមផ្តន្ទាទោសលោកឱ្យជាប់ពន្ធនាគាររយៈ ពេល១៨ខែ ហើយទោសសល់ពីនោះ ត្រូវបានព្យួរ។
លោក សុវណ្ណ រិទ្ធី បានចូលរួមសវនាការរយៈពេលខ្លីនៅសាលាដំបូងរាជធានីភ្នំពេញកាលពីថ្ងៃចន្ទ ពីបទ«ញុះញង់» បន្ទាប់ពីលោកត្រូវបានចាប់ខ្លួនកាលពីខែមេសា ដោយសារតែស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន មកបង្ហោះនៅលើទំព័រហ្វេសប៊ុកផ្ទាល់ខ្លួនរបស់លោក។
បន្ទាប់ពីសម្រាកមួយសន្ទុះ ក្រោយពីធ្វើការដេញដោលក្នុងសវនាការ ចៅក្រមជំនុំជម្រះ លោក លិ សុខា បានសម្រេចផ្តន្ទាទោសលោក រិទ្ធី ឱ្យជាប់ពន្ធនាគាររយៈពេល១៨ខែ ពីបទ«ញុះញង់បង្កឱ្យមានភាពវឹកវរដល់សន្តិសុខសង្គម» ប៉ុន្តែអនុវត្តទោសចាប់ពីពេលដែលត្រូវបានចាប់ខ្លួននិងឃុំខ្លួនបណ្តោះអាសន្នកាលពីខែមេសារហូតមកដល់ថ្ងៃប្រកាសសាលក្រមនេះ ចំណែកទោសនៅសល់ ត្រូវបានព្យួរ។
ចៅក្រម លិ សុខា បានប្រកាសក្នុងបន្ទប់សវនាការថា៖ «តុលាការបានផ្តន្ទាទោសលោកឱ្យជាប់ពន្ធនាគារ១៨ខែ ប៉ុន្តែអនុវត្តទោសចាប់ពីថ្ងៃដែលត្រូវបានចាប់ខ្លួនរហូតដល់ថ្ងៃប្រកាសសាលក្រម មានន័យថា លោកមានសេរីភាពចាប់ពីថ្ងៃនេះទៅ ហើយខាងតំណាងអយ្យការនឹងធ្វើនីតិវិធីបង្គាប់ឱ្យមានការដោះលែងលោកពីពន្ធនាគារ»។
បន្ទាប់ពីលោកចៅក្រម លិ សុខា ប្រកាសសាលក្រម លោក រិទ្ធី បានលើកដៃគោរពពីរបីដង ហើយបន្ទាប់មកលោកបានបន្ដដើរទៅគោរពលោកចៅក្រមផងដែរ។
លោក រិទ្ធី បដិសេធមិនធ្វើអត្ថាធិប្បាយបន្ទាប់ពីការប្រកាសសាលក្រមនេះ ដោយនិយាយថា លោកមានបញ្ហាសុខភាព ដូច្នេះមិនអាចធ្វើអត្ថាធិប្បាយបានទេ។ មេធាវីរបស់លោកក៏បានបដិសេធមិនផ្តល់អត្ថាធិប្បាយផងដែរនៅក្រៅបន្ទប់តុលាការ។
លោក រិទ្ធី និងឪពុករបស់លោក គឺលោក សុវណ្ណ សុខា គឺជាស្ថាបនិកបណ្តាញព័ត៌មាន TVFB ដែលបានចាប់ផ្តើមដំបូងជាទំព័រហ្វេសបុកនិងប្រែក្លាយជាបណ្តាញព័ត៌មានមួយ ដោយមានអាជ្ញាបណ្ណផ្សព្វផ្សាយនិងបុគ្គលិកបម្រើការផងដែរ។
ទោះបីជាយ៉ាងណា ដំណើរការនិងគេហទំព័ររបស់បណ្តាញព័ត៌មាននេះត្រូវបានបិទ បន្ទាប់ពីលោក រិទ្ធី ត្រូវបានតុលាការសម្រេចឃុំខ្លួនកាលពីថ្ងៃទី៩ ខែមេសា ហើយក្រសួងព័ត៌មានក៏បានដកអាជ្ញាបណ្ណរបស់បណ្តាញព័ត៌មាន TVFB ផងដែរ។
ហ្វេសប៊ុករបស់លោក រិទ្ធី បានដកស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន កាលពីថ្ងៃទី៧ ខែមេសា ដែលក្នុងនោះលោកនាយករដ្ឋមន្ត្រីបានមានប្រសាសន៍ថា រដ្ឋាភិបាលនឹងមិនផ្តល់ប្រាក់ឧបត្ថម្ភដល់កម្មករក្នុងវិស័យសេដ្ឋកិច្ចក្រៅប្រព័ន្ធដូចកម្មករក្នុងវិស័យកាត់ដេរនិងទេសចរណ៍នោះទេ។
សារដែលបានបង្ហោះនេះ បានដកស្រង់ប្រសាសន៍លោកនាយករដ្ឋមន្ត្រី ហ៊ុន សែន ដែលពេលនោះលោកបានសរសេរថា៖ «សម្តេច ហ៊ុន សែន៖ បើអ្នករត់ម៉ូតូឌុបក្ស័យធន លក់ម៉ូតូចាយសិនទៅ រដ្ឋាភិបាលគ្មានលទ្ធភាពជួយនោះទេ»។
ក្នុងសុន្ទរកថានោះ លោកនាយករដ្ឋមន្ត្រី ហ៊ុន សែន បានមានប្រសាសន៍ថា៖ «ដូចដែលក្មួយសួរមកពូថា អ្នករត់ម៉ូតូឌុប គាត់ត្អូញត្អែរ តើមានរដ្ឋប៉ះប៉ូវទេ? លក់ម៉ូតចាយសិនទៅ ទិញអង្ករស៊ីសិនព្រោះបើមកឱ្យរដ្ឋប៉ះប៉ូវទាំងអស់ ងាប់បាត់! រដ្ឋឯណាមានលុយ»។
បន្ទាប់ពីការចាប់ខ្លួននេះ បណ្តាញព័ត៌មាន Deutsche Welle ដែលមានមូលដ្ឋាននៅប្រទេសអាល្លឺម៉ង់ បានផ្តល់ពានសេរីភាពនៃការបញ្ចេញមតិដល់លោក សុវណ្ណ រិទ្ធី៕
ប្រែសម្រួលពីអត្ថបទដើមជាភាសាអង់គ្លេសដោយ អ៊ូច សូនី
