មន្ត្រីឧទ្យានុរក្សនៃមន្ទីរបរិស្ថានខេត្តមណ្ឌលគិរី បានបង្ក្រាបបទល្មើសធនធានធម្មជាតិក្នុងរយៈពេល៩ខែឆ្នាំនេះ បានជាង១៥០០ករណី ក្នុងនោះបានបញ្ជូនសំណុំរឿងទៅតុលាការជាង៨០ករណី និងបានរឹបអូសវត្ថុតាងបទល្មើសមួយចំនួន។
យោងតាមរបាយការណ៍របស់មន្ទីរបរិស្ថានខេត្តមណ្ឌលគិរី ដែលបានផ្សព្វផ្សាយនៅថ្ងៃចន្ទនេះ បានឱ្យដឹងថា នៅក្នុងរយៈពេល៩ខែឆ្នាំ២០២០ មន្ត្រីឧទ្យានុរក្សបានចុះល្បាតក្នុងតំបន់ការពារធម្មជាតិចំនួន២៩៩៥លើក ដោយបានបង្ក្រាបបទល្មើសធនធានធម្មជាតិបានចំនួន១៥២៨ ករណី ក្នុងនោះបានបញ្ជូនសំណុំរឿងទៅតុលាការចំនួន៨៤ករណី, ពិន័យអន្តរការណ៍ចំនួន២៦ករណី, រឹបអូសរណារយន្តបានចំនួន៣៦៤គ្រឿង ចាប់ឃាត់រថយន្តចំនួន៣៤គ្រឿង និងដោះអន្ទាក់ដាក់សត្វព្រៃចម្រុះសរុបចំនួន២៩៥៧ខ្សែ។
ប្រធានមន្ទីរបរិស្ថានខេត្តមណ្ឌលគិរី លោក កែវ សុភ័ក្រ បានមានប្រសាសន៍ថា បទល្មើសធនធានធម្មជាតិដែលបានកើតឡើងក្នុងទ្រង់ទ្រាយតូចៗនេះ ភាគច្រើនជាបទល្មើសកាប់រានទន្ទ្រានដីរដ្ឋ ការបរបាញ់សត្វព្រៃ និងការកាប់បំផ្លាញព្រៃឈើដោយខុសច្បាប់។
លោកបន្តថា៖ «អ្វីដែលយើងជួបប្រទះ [បញ្ហាប្រឈម] នោះ គឺការបរបាញ់សត្វព្រៃ [របស់ជនខិលខូច] បានធ្វើឡើងនៅក្នុងព្រៃជ្រៅដែលពិបាកធ្វើដំណើរទៅដល់ ជាពិសេសក្នុងខែវស្សានេះ ហើយយើងឃើញហើយ នៅជុំវិញតំបន់ការពារនេះ យើងមានសហគមន៍ច្រើនរស់នៅជុំវិញច្រើន និងជាខេត្តមួយដែលជាប់ព្រំប្រទល់វៀតណាម ដូច្នេះយើងមានការពិបាកក្នុងការទប់ស្កាត់ព្រានព្រៃដែលឆ្លងប្រទេសចូលមក ដោយសារយើងមានការពិបាកទទួលព័ត៌មានផ្នែកព្រំដែន ហើយមួយចំនួនទៀតយើងមានបញ្ហាប្រឈមដោយសារកត្តាជួញដូរសត្វព្រៃនៅតាមបណ្តាខេត្តជាប់ព្រំដែន និងភូមិសាស្ត្រដែលនៅជុំវិញតំបន់ការពារទាំងនោះ»។
តែយ៉ាងណា លោកថា ជាយន្តការណ៍សម្រាប់មន្ទីរបរិស្ថានខេត្ត នៅតែបន្តសហការជាមួយអង្គការដៃគូបណ្តាខេត្តជាប់ព្រំប្រទល់និងសហគមន៍មូលដ្ឋាន ដើម្បីពង្រឹងការទប់ស្កាត់បទល្មើសធនធានធម្មជាតិឱ្យកាន់តែមានប្រសិទ្ធភាព។
ប្រធានការិយាល័យដែនជម្រកសត្វព្រៃកែវសីមា លោក ព្រំ វិបុលរ័ត្ននៈ មានប្រសាសន៍ថា ការបង្ក្រាបបទល្មើសធនធានធម្មជាតិនៅតំបន់ដែនជម្រកសត្វព្រៃកែវសីមា មានការថយចុះតិចតួចបើធៀបនឹងរយៈពេលដូចគ្នាកាលពីឆ្នាំមុន ខណៈមន្ត្រីឧទ្យានុរក្សបានបង្កើនសកម្មភាពចុះល្បាតនិងទប់ស្កាត់បទល្មើសទាំងនោះ។
រដ្ឋលេខាធិការក្រសួងបរិស្ថាន លោក នេត្រ ភក្ត្រា មានប្រសាសន៍ក្នុងអំឡុងពេលដឹកនាំគណៈប្រតិភូក្រសួងបរិស្ថាននិងក្រុមអ្នកសារព័ត៌មាន ចុះសិក្សាស្វែងយល់ពីការងារការពារនិងអភិរក្សធនធានធម្មជាតិនៅក្នុងភូមិសាស្ត្រខេត្តមណ្ឌលគិរី ថាតំបន់ការពារធម្មជាតិនៅក្នុងខេត្តមណ្ឌលគិរីមានចំនួន៦កន្លែង មានផ្ទៃដីសរុបប្រមាណ១លានហិកតា រួមមាន ដែនជម្រកសត្វព្រៃកែវសីមា ដែនជម្រកសត្វព្រៃស្រែពក ដែនជម្រកសត្វព្រៃណាមលៀរ ដែនជម្រកសត្វព្រៃលំផាត់ ដែនជម្រកសត្វព្រៃភ្នំព្រេច និងរបៀងអភិរក្សជីវៈចម្រុះឦសាន។
លោកបន្តថា ការគ្រប់គ្រងអភិរក្សតំបន់ការពារធម្មជាតិទាំងនេះ មន្ទីរបរិស្ថានខេត្តមានមន្ត្រីឧទ្យានុរក្សសរុបចំនួន១០៤នាក់ ដែលចំនួននេះនៅមិនទាន់ឆ្លើយតបនៅឡើយជាមួយទំហំដីដែលត្រូវអភិរក្សនិងការពារ។
លោកបានគូសបញ្ជាក់ថា៖ «ដោយការខិតខំប្រឹងប្រែងរបស់មន្ត្រីឧទ្យានុរក្សនៅក្នុងរយៈពេលជាច្រើនឆ្នាំមកនេះ បទល្មើសធនធានធម្មជាតិទ្រង់ទ្រាយធំលែងកើតមានទៀតហើយ តែនៅសល់បទល្មើសទ្រង់ទ្រាយតូចដែលចាំបាច់សមត្ថកិច្ចជំនាញ ត្រូវបន្តខិតខំបន្ថែមទៀតដើម្បីទប់ស្កាត់និងបង្ក្រាបដើម្បីថែរក្សាធនធានធម្មជាតិ ព្រៃឈើ សត្វព្រៃដែលកម្ពុជាមាន»។
លោក នេត្រ ភក្ត្រា បានបន្ថែមថា រហូតមកទល់ពេលនេះ ក្រសួងបានធ្វើឱ្យការការពារនិងអភិរក្សធនធានធម្មជាតិ កាន់តែមានភាពល្អប្រសើរ ដែលធ្វើឱ្យតំបន់ការពារធម្មជាតិខ្លះ ត្រូវបានវាយតម្លៃថាមានសុវត្ថិភាព ហើយឈានដល់ការលក់ឥណទានកាបូនទៅលើទីផ្សារស្ម័គ្រចិត្តអន្តរជាតិ ក្នុងនោះក៏មានដែនជម្រកសត្វព្រៃកែវសីមា ក្នុងខេត្តមណ្ឌលគិរី ដែលបានលក់ឥណទានកាបូនតាំងពីឆ្នាំ២០១៦មក។
លោក បៀល វណ្ណធី សមាជិកសហគមន៍ភូមិអណ្តូងក្រឡឹង ឃុំសែនមនោរម្យ ស្រុកអូររាំង ខេត្តមណ្ឌលគិរី និយាយថា សហគមន៍នេះបានចុះបញ្ជីដីសមូហភាពជនជាតិដើមភាគតិចនៅក្រសួងមហាផ្ទៃកាលពីឆ្នាំ២០០៧ និងទទួលបានបណ្ណកម្មសិទ្ធិពីក្រសួងរៀបចំដែនដីតាំងពីឆ្នាំ២០១២ លើដីទំហំជាង១៤០០ហិកតា។
លោកបន្តថា បើទោះជាមានការចុះបញ្ជីជាដីសមូហភាពជនជាតិដើមភាគតិច ប៉ុន្តែក៏នៅមានការលួចកាប់ព្រៃឈើនិងការទន្ទ្រានយកដីធ្វើកម្មសិទ្ធិពីប្រជាពលរដ្ឋមកពីតំបន់ផ្សេងៗនិងអ្នកមានអំណាចមួយចំនួនផងដែរ ក្នុងនោះមានដីបម្រុងសហគមន៍ចំនួន១១ហិកតាហើយដែលត្រូវបានទន្ទ្រានយកពីជនខិលខូចមួយចំនួន។
លោកថា៖ «ដូច្នេះ! ខ្ញុំសូមសំណូរពរដល់ក្រុមការងារពាក់ព័ន្ធ ដូចជា ក្រសួងបរិស្ថាន ក៏ដូចជាមន្ត្រីឧទ្យានុរក្ស ចូលរួមការពារ ហើយចុះល្បាតជាមួយគ្នាក្នុងដីដែនជម្រកសត្វព្រៃកែវសីមានិងដីសហគមន៍ផងដែរ»។
បើតាមក្រសួងបរិស្ថាន កម្ពុជាដែលបច្ចុប្បន្ននេះមានតំបន់ការពារធម្មជាតិនិងរបៀងអភិរក្សជីវៈចម្រុះសរុបចំនួន៦៦កន្លែង ដែលក្នុងនោះមានឧទ្យានជាតិ ដែនជម្រកសត្វព្រៃ តំបន់ប្រើប្រាស់ច្រើនយ៉ាង តំបន់ការពារទេសភាព និងតំបន់រ៉ាមសារ ដែលមានផ្ទៃដីសរុប៧,៣លានហិកតា ស្មើប្រមាណ៤១%នៃផ្ទៃដីសរុបរបស់ប្រទេសកម្ពុជា។
គួរបញ្ជាក់ថា ក្នុងអំឡុងពេលទស្សនកិច្ចនៅក្នុងដែនជម្រកសត្វព្រៃកែវសីមា ខេត្តមណ្ឌលគិរី លោក នេត្រ ភក្ត្រា ក៏បានដឹកនាំអ្នកសារព័ត៌មានជាង២០នាក់មកពីស្ថាប័នផ្សេងៗ ទៅទស្សនកិច្ចទីស្នាក់ការធំរបស់ដែនជម្រកសត្វព្រៃកែវសីមា ដែលមានផ្ទុកទៅដោយវត្ថុតាងបទល្មើស រួមមាន រថយន្តប្រមាណជាង៥០០គ្រឿង ម៉ូតូជិត១ពាន់គ្រឿង រណារយន្តជាង១ពាន់គ្រឿង អន្ទាក់ជាង២ម៉ឺន ហើយឈើដែលរឹបអូសបានជាច្រើន ដែលបានបន្សល់ទុកតាំងពីអំឡុងពេលនៃការគ្រប់គ្រងដោយរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ មុននឹងផ្ទេរមកស្ថិតក្រោមការគ្រប់គ្រងនិងអភិរក្សរបស់ក្រសួងបរិស្ថាន នៅខែឧសភា ឆ្នាំ២០១៦៕
យានយន្តនិងឧបករណ៍ដែលបានបង្ក្រាបក្នុងបទ ល្មើសធនធានធម្មជាតិ នៅដែនជម្រកសត្វព្រៃកែវសីមា ខេត្ត មណ្ឌលគិរី។ (ពេជ្រ សុធារី) 
យានយន្តនិងឧបករណ៍ដែលបានបង្ក្រាបក្នុងបទ ល្មើសធនធានធម្មជាតិ នៅដែនជម្រកសត្វព្រៃកែវសីមា ខេត្ត មណ្ឌលគិរី។ (ពេជ្រ សុធារី)
