ប្រជាពលរដ្ឋប្រមាណ៣០គ្រួសារដែលរស់នៅតាមបណ្តោយព្រំដែនកម្ពុជា-ថៃ ស្ថិតក្នុងស្រុកអូរជ្រៅ ខេត្តបន្ទាយមានជ័យ ត្រូវបានជម្លៀសទៅទីទួលសុវត្ថិភាព ក្រោយផ្ទះសម្បែងរបស់ពួកគេរងការលិចលង់ដោយទឹកជំនន់ធ្លាក់មកពីប្រទេសថៃ។
នាយករដ្ឋបាលខេត្តបន្ទាយមានជ័យ លោក ឈឿន ត្រៃយ៉ុង ប្រាប់វីអូឌីនៅថ្ងៃចន្ទនេះថា ផ្ទះជាច្រើនខ្នងរបស់ប្រជាពលរដ្ឋរស់នៅភូមិវត្តចាស់ ឃុំអូរបីជាន់ បានលិចលង់ក្នុងជំនន់ទឹកភ្លៀងនិងទឹកជំនន់ហូរធ្លាក់ពីប្រទេសថៃ ដោយបង្ខំឱ្យមានការជម្លៀសពលរដ្ឋប្រមាណ៣០គ្រួសារ ទៅស្នាក់នៅសាលាឃុំអូរបីជាន់បណ្តោះអាសន្ន។
មន្ត្រីសាលាខេត្តរូបនេះ បន្តថា នៅរសៀលថ្ងៃនេះ ទឹកបានស្រកវិញខ្លះហើយ ប៉ុន្តែលោកថា ពលរដ្ឋបន្តសម្រាកនៅទីទួលសុវត្ថិភាពបន្ថែមទៀតសិន ដោយបារម្ភខ្លាចទឹកជន់មកទៀត។
លោក ឈឿន ត្រៃយ៉ុង ប្រាប់ថា៖ «រហូតមកដល់ពេលនេះ វាស្រកវិញអស់ហើយ។ វាអត់មានអីគួរឱ្យចាប់អារម្មណ៍ទេ ព្រោះអត់មានជំនន់លិចប៉ុន្មានទេ លិចប្រហែលត្រឹមជង្គង់ទេ»។
បើទោះបីជាទឹកមានការស្រកខ្លះ ប៉ុន្តែលោក ឈឿន ត្រៃយ៉ុង ក៏អំពាវនាវដល់ប្រជាពលរដ្ឋដែលរស់នៅតាមបណ្តោយព្រំដែនកម្ពុជា-ថៃ ឱ្យមានការប្រុងប្រយ័ត្នខ្ពស់ផងដែរ ដើម្បីចៀសវាងគ្រោះថ្នាក់ផ្សេងៗដែលអាចកើតមានជាយថាហេតុ។
ទន្ទឹមគ្នានេះ ក្រសួងធនធានទឹក និងឧតុនិយម បានក្រើនរំឭកពលរដ្ឋឱ្យប្រុងប្រយ័ត្នចំពោះខ្យល់បក់បោកខ្លាំងនិងភ្លៀងធ្លាក់ច្រើនចន្លោះពីថ្ងៃពុធទៅដល់ថ្ងៃសុក្រក្នុងសប្ដាហ៍នេះ បន្ទាប់ពីសង្កេតឃើញប្រព័ន្ធសម្ពាធទាបកំពុងមានឥទ្ធិពលមកលើភាគខាងត្បូងប្រទេសវៀតណាមចាប់ពីថ្ងៃខានស្អែកនេះ៕
