លោកនាយករដ្ឋមន្ត្រី ហ៊ុន សែន បានប្រតិកម្មដោយមិនបញ្ចេញឈ្មោះទៅនឹងអ្នករិះគន់ថា ប្រទេសកម្ពុជាសម្បូរទៅដោយការស៊ីផឹក ដែលលោកថា «បើខិតខំរកហើយមិនផឹកមិនស៊ី ខំប្រឹងរកមកធ្វើអ្វី?»។
ប្រតិកម្មរបស់នាយករដ្ឋមន្ត្រីបែបនេះ ធ្វើឡើងនៅក្នុងពិធីសម្ពោធមជ្ឈមណ្ឌលកម្សាន្តមួយនៅស្រុកកៀនស្វាយ ស្ថិតនៅក្នុងខេត្តកណ្តាល នៅព្រឹកថ្ងៃនេះ។
លោក ហ៊ុន សែន ថ្លែងថា៖ «អ៊ីចឹង! ពិភពលោកផលិតស្រា ផលិតធ្វើអី? ផលិតបៀរយែ ផលិតធ្វើអី? ដែលខ្ញុំគ្រាន់តែឆ្លើយតបថា បើខិតខំរកហើយមិនស៊ីមិនផឹក តើរកធ្វើអ្វី?»។
រដ្ឋាភិបាលកម្ពុជាធ្លាប់បង្ហាញឆន្ទៈធ្វើសេចក្តីព្រាងច្បាប់ស្តីពីការត្រួតពិនិត្យផលិតផលគ្រឿងស្រវឹងដែលមាន១១ជំពូកនិង៣៩មាត្រា។
ប៉ុន្តែនៅក្នុងប្រជុំមួយនៅទីស្តីការគណៈរដ្ឋមន្ត្រី នាថ្ងៃទី១៩ ខែមិថុនា ឆ្នាំ២០១៩ រដ្ឋមន្ត្រីក្រសួងសុខាភិបាល លោក ម៉ម ប៊ុនហេង អះអាងថា សេចក្តីព្រាងច្បាប់នេះត្រូវបានលុបចោល ដោយដាក់បញ្ចូលក្នុងសេចក្តីព្រាងច្បាប់ស្តីពីសុវត្ថិភាពចំណីអាហារវិញ៕
