អាជ្ញាធររាជធានីភ្នំពេញបានបង្ហាញការសោកស្ដាយចំពោះការបន្តធ្វើកូដកម្មបន្តទៀតរបស់ក្រុមកម្មករប្រមូលសំរាមនៃក្រុមហ៊ុនស៊ីនទ្រី ប៉ុន្តែប្ដេជ្ញាបញ្ចេញកម្លាំងប្រមូលសំរាមដែលកកស្ទះនៅក្នុងរាជធានីភ្នំពេញឱ្យអស់ក្នុងរយៈពេលដ៏ខ្លីខាងមុខនេះ។
សាលារាជធានីភ្នំពេញបាននិយាយថា តំណាងកម្មករប្រមូលសំរាម តំណាងក្រុមហ៊ុនស៊ីនទ្រី និងអាជ្ញាធររាជធានីភ្នំពេញ បានជួបជជែកគ្នាកាលពីថ្ងៃម្សិលមិញនេះ ដើម្បីស្វែងរកដំណោះស្រាយឆ្លើយតបនឹងការទាមទាររបស់ក្រុមកម្មករ។
សាលារាជធានីភ្នំពេញបាននិយាយបន្តថា ក្រោយជួបជជែកគ្នា ក្រុមកម្មករបានយល់ព្រមវិលត្រឡប់ទៅប្រមូលសំរាមវិញនៅល្ងាចថ្ងៃម្សិលមិញនេះ ហើយសាលារាជធានីភ្នំពេញធានាលើអត្ថប្រយោជន៍និងការងាររបស់ក្រុមកម្មករ។
ប៉ុន្តែលេខាធិការសហជីពកម្មករនិយោជិតវិស័យទេសចរណ៍ប្រចាំនៅក្រុមហ៊ុនស៊ីនទ្រី លោក មី ផាន ប្រាប់វីអូឌីនៅព្រឹកថ្ងៃនេះថា ក្រុមកម្មករប្រមូលសំរាមសម្រេចបន្តកូដកម្មបន្តទៀតនៅថ្ងៃនេះ ដោយមិនចេញទៅប្រមូលសំរាមនោះឡើយ។
តំណាងក្រុមកម្មករប្រាប់ថា ក្រុមកម្មករទាមទារទៅក្រុមហ៊ុនស៊ីនទ្រីឱ្យទូទាត់ប្រាក់អត្ថប្រយោជន៍ផ្សេងៗដល់ពួកគេឱ្យរួចរាល់ ជាជាងទូទាត់ជាដំណាក់កាលៗ។
ក្រោយក្រុមកម្មករសម្រេចបែបនេះ សាលារាជធានីភ្នំពេញបានបង្ហាញការសោកស្ដាយ ប៉ុន្តែអាជ្ញាធរបានប្រកាសថា នឹងចាត់កម្លាំងដើម្បីប្រមូលសំរាមកកស្ទះនៅក្នុងរាជធានីភ្នំពេញឱ្យអស់នៅក្នុងរយៈពេលដ៏ខ្លីខាងមុខនេះ។
ក្រុមកម្មករប្រមូលសំរាមក្រុមហ៊ុនស៊ីនទ្រី បានធ្វើកូដកម្មដោយមិនទៅប្រមូលសំរាមចាប់តាំងពីថ្ងៃសៅរ៍សប្ដាហ៍មុន ដោយពួកគេទាមទារទៅក្រុមហ៊ុនស៊ីនទ្រីឱ្យទូទាត់ប្រាក់អត្ថប្រយោជន៍ផ្សេងៗដល់ពួកគេ នៅចំពោះមុខនៃការកែប្រែប្រព័ន្ធគ្រប់គ្រងនិងប្រមូលសំរាមនៅរាជធានីភ្នំពេញ។
សំរាមរាប់ម៉ឺនតោនត្រូវបានប៉ាន់ប្រមាណថា កកស្ទះនៅតាមគេហដ្ឋាននិងតាមដងផ្លូវនានាក្នុងរាជធានីភ្នំពេញ ក្រោយក្រុមកម្មករធ្វើកូដកម្មអស់រយៈពេលជិត១សប្ដាហ៍មកហើយនោះ៕
