ក្រសួងកសិកម្ម រុក្ខាប្រមាញ់ និងនេសាទ ណែនាំមន្រ្តីក្រោមឱវាទដែលពាក់ព័ន្ធទាំងអស់អនុវត្តវិធានការចាំបាច់មួយចំនួន សម្រាប់ការថែទាំស្រូវរដូវវស្សាឆ្នាំនេះ និងត្រៀមលក្ខណៈសម្រាប់ផលិកម្មស្រូវប្រាំងឆ្នាំ២០២០-២០២១។
សារាចរណែនាំរបស់ក្រសួងកសិកម្ម រុក្ខាប្រមាញ់ និងនេសាទ ចុះថ្ងៃទី០៧ ខែតុលា និងត្រូវបានផ្សព្វផ្សាយនៅថ្ងៃសុក្រនេះ បានលើកឡើងថា ដើម្បីធានាបាននូវសន្តិសុខស្បៀងនិងឈានសម្រេចបានតាមគោលនយោបាយជំរុញផលិតកម្មស្រូវ រួមនឹងការនាំចេញអង្កររបស់រាជរដ្ឋាភិបាល ក្រសួងណែនាំដល់អង្គភាពពាក់ព័ន្ធទាំងអស់ ត្រូវអនុវត្តតាមវិធានការចាំបាច់និងបន្ទាន់មួយចំនួនដែលបានដាក់ចេញ។
ក្រសួងបានបញ្ជាក់ពីវិធានការទាំងនោះ រួមមាន ត្រូវណែនាំកសិករឱ្យពិនិត្យស្រែជាប្រចាំនិងបិទភ្លឺរក្សាទុកទឹកសម្រាប់ប្រើប្រាស់ចុងរដូវ, ត្រូវចុះណែនាំបច្ចេកទេសថែទាំ បំប៉នជី និងត្រួតពិនិត្យកុំឱ្យសត្វចង្រៃរាតត្បាតក្នុងស្រែ និងចុះពិនិត្យតំបន់ដាំដុះស្រូវបង្កើនរដូវដែលទើបនឹងប្រមូលផលរួច។
ក្រសួងក៏បានណែនាំដល់មន្ត្រី ត្រូវចុះវាយតម្លៃឱ្យបានច្បាស់លាស់ពីស្ថានភាពទឹក ជូនដំណឹងដល់កសិករជាមុននូវតំបន់ដែលអាចដាំដុះបាននិងមិនអាចដាំដុះបាននៅរដូវប្រាំង, ណែនាំកសិករឱ្យត្រៀមឧបករណ៍ សម្ភារ និងគ្រាប់ពូជទុក និងត្រូវជំរុញការដាំដុះស្រូវប្រដេញទឹកតាមមាត់បឹងនិងទន្លេផងដែរ។
ក្រសួងបានបន្ថែមថា៖ «ត្រូវអប់រំកសិករអំពីការគ្រប់គ្រងកត្តាសត្វចង្រៃ ដូចជា សត្វកណ្តុរនិងសត្វល្អិត និងត្រៀមលក្ខណៈអន្តរាគមន៍ឱ្យបានទាន់ពេលវេលានិងប្រកបដោយប្រសិទ្ធភាពខ្ពស់»។
ក្រសួងក៏បានណែនាំឱ្យមន្ត្រីរបស់ខ្លួនជំរុញដល់អ្នកប្រមូលទិញស្រូវ រោងម៉ាស៊ីនកិនស្រូវ និងអ្នកនាំចេញអង្ករ ក្នុងការត្រៀមថវិកា មធ្យោបាយដឹកជញ្ជូន ឡសម្ងួត និងឃ្លាំងស្តុកស្រូវ សម្រាប់ប្រមូលទិញស្រូវពីកសិករក្នុងតម្លៃសមរម្យ ដើម្បីទប់ស្កាត់ការហូរស្រូវចេញទៅប្រទេសក្រៅ។
ការណែនាំរបស់ក្រសួងកសិកម្ម បានធ្វើឡើងស្របពេលមានប្រជាកសិករមួយចំនួនបានព្រួយបារម្ភពីការដាំដុះស្រូវរដូវប្រាំង ស្របពេលស្ថានភាពទឹកនៅអាងទន្លេមេគង្គ បឹងទន្លេសាប និងបឹងនានានៅឆ្នាំនេះ មានកម្ពស់ទាបជាងធម្មតា។
បើតាមក្រសួងកសិកម្ម រយៈពេល៩ខែឆ្នាំនេះ កសិករសម្រេចស្ទូង-ព្រោះបានចំនួន២ ៧១៤ ២១៦ហិតកា ស្មើនឹង១០៤,៨៧% នៃផែនការ២ ៥៨៨ ១៣០ហិកតា ក្នុងនោះស្រូវស្រាលមានចំនួន៨២៨ ៧៣៣ហិកតា និងស្រូវឡើងទឹកមានចំនួន៣៣ ៤៤៨ហិកតា។
ក្រសួងបន្តថា ទន្ទឹមនឹងនេះ ដំណាំស្រូវវស្សាក្នុងខេត្តមួយចំនួន ដូចជា ខេត្តពោធិ៍សាត់ បាត់ដំបង បន្ទាយមានជ័យ សៀមរាប និងកំពង់ធំ បានជួបប្រទះនឹងគ្រោះរាំងស្ងួត ដែលធ្វើឱ្យប៉ះពាល់ផ្ទៃដីដាំដុះចំនួន១៣៤ ៧៧០ហិកតា និងខូចខាតផ្ទៃដី១៣ ៤៨០ហិកតា៕