រដ្ឋបាលខេត្តព្រះសីហនុ ព្រមានចាត់វិធានការផ្លូវច្បាប់ចំពោះប្រជាពលរដ្ឋទាំងឡាយណា ដែលនៅបន្តធ្វើសកម្មភាពទន្ទ្រានដីរដ្ឋនិងសាងសង់ខ្ទមខុសច្បាប់ នៅទីតាំងដីសម្បទានសង្គមកិច្ចរបស់រដ្ឋ ក្នុងភូមិ១ ឃុំទំនប់រលក ស្រុកស្ទឹងហាវ។
សេចក្តីប្រកាសព័ត៌មានរបស់រដ្ឋបាលខេត្តព្រះសីហនុ កាលពីថ្ងៃទី០៨ ខែតុលា បានបញ្ជាក់ថា ប៉ុន្មានថ្ងៃចុងក្រោយនេះ មានចលនានៃការចូលបោះបង្គោលដីនិងសាងសង់ខ្ទមយ៉ាងអនាធិបតេយ្យនៅទីតាំងដីសម្បទានសង្គមកិច្ចរបស់រដ្ឋ ប៉ុន្តែអាជ្ញាធរស្រុកស្ទឹងហាវ បានធ្វើការទប់ស្កាត់ទាន់ពេល។
រដ្ឋបាលខេត្ត បន្តថា ក្រុមប្រជាពលរដ្ឋដែលមានការដឹកនាំបញ្ជាពីមេខ្យល់ បាននាំគ្នាចេញមកតវ៉ានិងរារាំងការងាររបស់អាជ្ញាធរស្រុក ព្រមទាំងបាននាំគ្នាតវ៉ាបិទកំណាត់វិថីសម្តេចសង្ឃរាជទេពវង្ស បណ្តាលឱ្យមានការកកស្ទះចរាចរណ៍ផងដែរ។ ករណីនេះ រដ្ឋបាលខេត្តបានអំពាវនាវដល់ប្រជាពលរដ្ឋទាំងនោះ បញ្ឈប់សកម្មភាពតវ៉ារបស់ពួកគេជាបន្ទាន់ បើពុំនោះទេ អាជ្ញាធរនឹងចាត់វិធានការតាមផ្លូវច្បាប់។
រដ្ឋបាលខេត្តបានគូសបញ្ជាក់ថា៖ «ក្នុងករណីបងប្អូននៅតែបន្តធ្វើសកម្មភាពដែលប្រាសចាកពីផ្លូវច្បាប់បន្តទៀត រដ្ឋបាលខេត្តនឹងចាត់វិធានការតាមផ្លូវច្បាប់ ដោយគ្មានការលើកលែងនោះឡើយ»។
លោក សយ ធី អាយុ៤០ឆ្នាំ អះអាងជាពលរដ្ឋដែលរស់នៅឃុំទំនប់រលក ស្រុកស្ទឹងហាវ បាននិយាយថា ពលរដ្ឋដែលរងផលប៉ះពាល់និងតវ៉ានេះមានប្រមាណ២០០គ្រួសារ។ លោកបន្តថា អាជ្ញាធរបានយកគ្រឿងចក្រទៅវាយកម្ទេចផ្ទះរបស់ពួកគាត់ ដោយមិនបានជូនដំណឹងមុនទេ ខណៈដែលពួកគាត់បានរស់នៅលើដីនោះរយៈពេល៥ឆ្នាំមកហើយ បន្ទាប់ពីអាជ្ញាធរឃុំនិងស្រុក ចែកដីឱ្យពួកគាត់ក្នុងមួយគ្រួសារទទួលបានដីទំហំ៣០ទៅ៤០ម៉ែត្រ។
លោកបន្តថា៖ «គាត់ចុះទៅវាយហ្នឹងហ្មង យកគ្រឿងចក្រវាយហ្នឹងហ្មង អត់មានផ្តល់ដំណឹងថាបងប្អូនប្រជាពលរដ្ឋនៅហ្នឹងទាំងអស់គ្នា ខ្ញុំដាក់ពេលឱ្យបីថ្ងៃបួនថ្ងៃ បងប្អូនរុះផ្ទះចេញទៅព្រោះដីនេះគេត្រូវការឈូសឆាយអីក៏ខ្ញុំអស់ចិត្តដែរ តែនេះអត់ទេ គាត់ចុះទៅ គាត់អាងអំណាច មានសិទ្ធិ គាត់ធ្វើអីតាមតែចិត្តគាត់ទៅ យើងទៅឃាត់គាត់ ក៏គាត់មិនស្តាប់យើងដែរ»។
បើតាមលោក សយ ធី នៅថ្ងៃសុក្រនេះ ប្រជាពលរដ្ឋជាង៥០គ្រួសារ នៅឃុំទំនប់រលកនេះ បាននាំគ្នាទៅប្រមូលផ្តុំតវ៉ានៅមុខសាលាខេត្តព្រះសីហនុ ដើម្បីរង់ចាំដំណោះស្រាយពីអាជ្ញាធររឿងដីធ្លីនេះផងដែរ។
មន្ត្រីអង្គការការពារសិទ្ធិមនុស្សលីកាដូប្រចាំខេត្តព្រះសីហនុ លោក ស្រេង វ៉ាន់លី ដែលតាមដានករណីនេះ មានប្រសាសន៍ថា ប្រជាពលរដ្ឋទាំងនោះបានរស់នៅលើដីនោះតាំងពីឆ្នាំ២០១៥មក ប៉ុន្តែលោកពុំទាន់អាចបញ្ជាក់បានទេថា តើដីនោះជាដីសម្បទានសង្គមកិច្ចរបស់រដ្ឋឬជាដីរបស់ប្រជាពលរដ្ឋ។
ទោះជាយ៉ាងណា លោកថា៖ «ការចុះវាយកម្ទេច ខ្ញុំឃើញថា វាស្របពេលរដ្ឋបាលខេត្តជូនដំណឹងឱ្យប្រជាពលរដ្ឋដាក់ពាក្យ ដើម្បីរង់ចាំដីគម្របព្រៃ ខ្ញុំគិតថា ប្រសិនរដ្ឋបាលខេត្តមេត្តាពន្យារពេលបន្តិច ដើម្បីឱ្យពួកគាត់ [ពលរដ្ឋ] ធ្វើការស្នើសុំ ហើយរង់ចាំពិនិត្យក្នុងការដោះស្រាយឡើងវិញ ជាជាងចុះទៅវាយកម្ទេចផ្ទះពួកគាត់នៅរដូវភ្លៀង ដែលធ្វើឱ្យគាត់ពិបាករស់នៅ»។
បើតាមការបញ្ជាក់របស់រដ្ឋបាលខេត្តព្រះសីហនុ កន្លងមក មានមេខ្យល់មួយចំនួនបានបំផុសប្រជាពលរដ្ឋឱ្យចូលទៅបោះបង្គោលរបងចាប់យកដីនិងសាងសង់ខ្ទមនៅទីតាំងនោះ និងត្រូវបានអាជ្ញាធរស្រុកចុះណែនាំឱ្យពលរដ្ឋចាកចេញពីដីនោះ និងរុះរើខ្ទមនិងបង្គោលរបងចំនួន៤លើកមកហើយ៕
