សំរាមគរខ្ពស់ឡើងៗនៅទូទាំងរាជធានី ដោយសារតែកម្មករប្រមូលសំរាមក្នុងរាជធានីភ្នំពេញជាង២ ០០០នាក់ធ្វើកូដកម្ម ដើម្បីទាមទារប្រាក់ដំណាច់ឆ្នាំរបស់ខ្លួន មុនពេលសាលារាជធានីរុះរើក្រុមហ៊ុនទទួលសិទ្ធិប្រតិបត្តិការគ្រប់គ្រងកាកសំណល់។
នៅសង្កាត់ជ័យជម្នះ ខណ្ឌដូនពេញ សំរាមគរឡើងខ្ពស់រហូតទៅជិតមួយម៉ែត្រពីដី នៅមុខតូបលក់គ្រឿងទេសរបស់អ្នកស្រី សុខ បូរិន។ ស្រ្តីវ័យ៦៦ឆ្នាំរូបនេះ បានប្រាប់ VOD ឱ្យដឹងថា នៅពេលកម្មករប្រមូលសំរាមរបស់ក្រុមហ៊ុន ស៊ីនទ្រី បញ្ឈប់ប្រតិបត្តិការប្រមូលសំរាមប្រចាំថ្ងៃនៅពីរបីថ្ងៃចុងក្រោយ ក្លិនស្អុយចេញពីសំរាមមានសភាពកាន់តែខ្លាំងឡើងៗ។
អ្នកស្រីបានពោលដូច្នេះថា៖ «គេជិតៗហ្នឹងយកថង់សំរាមមកដាក់នៅហ្នឹងកាន់តែច្រើនឡើងទៀតហ្នឹងណា។ ខ្ញុំមិនដឹងថា ពេលណាគេមកប្រមូលទេ»។
អ្នកស្រី បូរិន ព្រួយបារម្ភថា ក្នុងពេលឆាប់ៗនេះ នឹងមានដង្កូវគ្រប់ទីកន្លែង។
កញ្ញា តែន ចិត្រា អាយុ២២ឆ្នាំ ធ្វើការផ្នែកម្អូបអាហារមួយនៅភោជនីយដ្ឋានក្បែរតូបរបស់អ្នកស្រី បូរិន លើកឡើងថា នាងដាក់កៅស៊ូតង់គ្របលើគំនរសំរាមនោះ ហើយសុំឱ្យអតិថិជនរបស់នាងអង្គុយខាងក្នុង។
កញ្ញា ចិត្រា និយាយថា៖ «វាប៉ះពាល់កន្លែងយើង ពេលមានក្លិនមិនល្អចេញពីសំរាមមក»។
អ្នករត់ម៉ូតូឌុបម្នាក់ឈ្មោះ នាង សម្បត្តិ អាយុ៥៥ឆ្នាំ បានលើកឡើងថា ជាធម្មតា គាត់រង់ចាំអតិថិជននៅកែងផ្លូវដែលមានគំនរសំរាមនោះ ប៉ុន្តែពេលនេះគាត់ពិបាកអង្គុយនៅទីនោះណាស់។
លោក សម្បត្តិ និយាយថា៖ «ខ្ញុំអង្គុយនៅហ្នឹងមិនកើតទេ។ ក្លិនស្អុយខ្លាំងណាស់»។
លោក គីម វុត្ថា ប្រធានផ្នែកសណ្តាប់ធ្នាប់សាធារណៈខណ្ឌដូនពេញ បានឱ្យដឹងថា រថយន្តដឹកសំរាមបួនគ្រឿងនិងកម្លាំងសណ្តាប់ធ្នាប់ចំនួន១៥០នាក់ កំពុងខិតខំប្រមូលសំរាមជំនួសកម្មករដែលកំពុងធ្វើកូដកម្ម ប៉ុន្តែពួកគេមិនអាចប្រមូលបានអស់នោះទេ។
លោកបន្ថែមថា នៅក្នុងខណ្ឌដូនពេញ ក្នុងមួយថ្ងៃៗមានសំរាមប្រហែល៣០០តោន ហើយក្រុមការងារប្រមូលសំរាមផ្លាស់វេនគ្នាប្រមូលបានប្រមាណជាពី១៥០ទៅ២០០តោនក្នុងមួយថ្ងៃៗ។
លោក វុត្ថា បានមានប្រសាសន៍ថា៖ «ឡានគេ [ស៊ីនទ្រី] ប្រើប្រាស់ឡាន១០គ្រឿង យើងមានតែ៤គ្រឿងទេ អ៊ីចឹងទោះយ៉ាងណា យើងមិនអាចដឹកចេញទាំងអស់បានទេ […] តែបើយើងមិនធ្វើខ្លះ សំរាមហ្នឹងវាកាន់តែខ្លាំង»។
ប្រធានសហជីពកម្មករនិយោជិតវិស័យទេសចរណ៍នៃក្រុមហ៊ុន ស៊ីនទ្រី លោក កៅ សុខវ៉ាត់ បានឱ្យដឹងថា មានកិច្ចចរចាគ្នាកាលពីថ្ងៃចន្ទ ជាមួយសាលារាជធានីភ្នំពេញ មន្ត្រីសាលាខណ្ឌ ក្រសួងការងារ និងគណៈគ្រប់គ្រងក្រុមហ៊ុន ប៉ុន្តែកិច្ចប្រជុំនោះមិនបានឈានដល់ចំណុចយល់ស្របគ្នាណាមួយទេ។ លោក សុខវ៉ាត់ បន្តថា ចំណុចទាមទារទាំងប្រាំរបស់ភាគីកម្មករពាក់ព័ន្ធនឹងប្រាក់អតីតភាពការងារនិងប្រាក់ទូទាត់ចុងក្រោយ សុទ្ធតែត្រូវបានច្រានចោលទាំងអស់។
លោក សុខវ៉ាត់ អះអាងថា កម្មករម្នាក់ៗក្នុងចំណោមអ្នកធ្វើកូដកម្មជាង២០០០នាក់នោះ អាចទទួលអត្ថប្រយោជន៍ចុងក្រោយខ្ទង់១ ០០០ដុល្លារដែរ តាមច្បាប់ការងារ បូករួមទាំងប្រាក់អតីតភាពផងដែរ។
លោក សុខវ៉ាត់ មានប្រសាសន៍ថា៖ «យើងនៅតែទាមទារ ហើយគេនៅតែបដិសេធ។ អ៊ីចឹង លទ្ធផលគ្មានបានស្អីទេ»។
ក្រុមហ៊ុន ស៊ីនទ្រី ត្រូវបានដាក់ឱ្យស្ថិតក្រោមការគ្រប់គ្រងរបស់រដ្ឋបាលក្រុងកាលពីមួយឆ្នាំមុន នៅពេលមានការរិះគន់ដដែលៗថា ក្រុមហ៊ុននេះផ្តល់សេវាមិនល្អ។ នៅពេលនោះ រដ្ឋាភិបាលបានលើកឡើងថា ប្រតិបត្តិការប្រមូលសំរាមត្រូវចែកឱ្យក្រុមហ៊ុនចំនួនបួនទទួលបន្ទុកដើម្បីកែលម្អសេវាកម្មនេះឡើងវិញ។
លោក សុខវ៉ាត់ បានឱ្យដឹងថា កម្មវិធីដេញថ្លៃសម្រាប់ទទួលបានសិទ្ធិប្រតិបត្តិករប្រមូលសំរាមនឹងត្រូវធ្វើឡើងនៅសប្តាហ៍ក្រោយ ដែលជាហេតុបណ្តាលឱ្យកម្មករទាមទារអត្ថប្រយោជន៍ផ្សេងៗជាបន្ទាន់។
លោក ម៉ី ផាន់ សមាជិកសហជីពម្នាក់ទៀត បានឱ្យដឹងផងដែរថា ក្រុមហ៊ុន ស៊ីនទ្រី បានបញ្ជាក់ថា ក្រុមហ៊ុននឹងទូទាត់តែប្រាក់ដំណាច់ឱ្យកម្មកររបស់ខ្លួន នៅពេលណាដែលក្រុមហ៊ុនក្ស័យធនប៉ុណ្ណោះ។
លោក ផាន់ បានឱ្យដឹងទៀតថា កម្មករក៏បារម្ភផងដែរថា ពួកគេនឹងបាត់បង់អំណាចចរចានៅពេលដែលកម្លាំងពលករត្រូវបានបែងចែកទៅធ្វើការនៅក្រុមហ៊ុនផ្សេងៗគ្នានោះ។
លោកបានមានប្រសាសន៍ថា៖ «វាមានន័យថា កម្មករនឹងលែងមានកម្លាំងរួមរឹងមាំហើយ»។
លោក រ៉ុង សារ៉ាយ បុគ្គលិកផ្នែកជួសជុលរថយន្តដឹកសំរាម បានប្រាប់ថា កម្មករត្រៀមបន្តធ្វើកូដកម្មរហូតទាល់តែពួកគេទទួលបានអ្វីដែលពួកគេទាមទារ។ លោកបន្តថា ពួកគេខ្លាចបាត់បង់ប្រាក់អតីតភាពរបស់ខ្លួនប្រសិនបើពួកគេប្តូរក្រុមហ៊ុន។
លោកនិយាយថា៖ «កម្មករយើងនឹងនៅតែរក្សាជំហររឹងដដែល។ ខ្ញុំមានអារម្មណ៍ថា សោកស្តាយដែលគេមិនខ្វល់អំពីកម្មករនិងបុគ្គលិកបែបហ្នឹង»។
ទោះជាយ៉ាងណាក្តី អ្នកនាំពាក្យសាលារាជធានីភ្នំពេញ លោក ម៉េត មាសភក្តី បានលើកឡើងថា ចំណុចទាមទាររបស់កម្មករប្រមូលសំរាម គឺខុសច្បាប់។ លោកបន្តថា សាលារាជធានីបានចាប់ផ្តើមជ្រើសរើសកម្មករថ្មីៗកាលពីរសៀលថ្ងៃចន្ទ ដើម្បីឆ្លើយតបទៅនឹងកូដកម្មនោះ។
លោក មាសភក្តី មានប្រសាសន៍ថា៖ «ដោយសារតែកិច្ចចរចាមិនទាន់ទទួលជោគជ័យ ហើយកម្មករនៅតែទាមទារតាមចំណុចរបស់ពួកគេដែលខុសនឹងច្បាប់នោះ ពួកយើងមានតែបង្ខំចិត្តជ្រើសរើសអ្នកថ្មីឱ្យមកបន្តធ្វើការ និងធានាសេវាកម្មប្រមូលសំរាម»។
លោកបន្ថែមទៀតថា មានក្រុមហ៊ុនចំនួនបីដែលនឹងត្រូវបានជ្រើសរើសដើម្បីប្រមូលនិងគ្រប់គ្រងសំរាមចេញពីទីក្រុងនៅបីតំបន់ ប៉ុន្តែលោកបានបដិសេធមិនបញ្ចេញឈ្មោះក្រុមហ៊ុនទាំងនោះ ហើយក៏មិនបង្ហើបឱ្យដឹងថា តើមានក្រុមហ៊ុន ស៊ីនទ្រី ស្ថិតក្នុងចំណោមក្រុមហ៊ុនជាប់បញ្ជីសម្រាំងនោះដែរឬក៏អត់ទេ។ សេចក្តីសម្រេចនឹងចេញនៅថ្ងៃទី១៦ ខែតុលា ឆ្នាំ២០២០៕
ប្រែសម្រួលពីអត្ថបទដើមជាភាសាអង់គ្លេសដោយ កង សុធា
ចំណាំ៖ «អត្ថបទនេះត្រូវបានផលិតឡើងដោយមានការគាំទ្រពីមូលនិធិ Rosa Luxemburg ក្រោមជំនួយហិរញ្ញវត្ថុរបស់ក្រសួងសហព័ន្ធនៃកិច្ចសហប្រតិបត្តិការសេដ្ឋកិច្ច និងការអភិវឌ្ឍ»។
គាំទ្រដោយ៖