ក្រសួងសុខាភិបាល រកឃើញអ្នកឆ្លងជំងឺកូវីដ១៩ថ្មីម្នាក់ទៀត ជាជនជាតិបារាំង ដែលនាំឲ្យអ្នកឆ្លងជំងឺនេះកើនឡើងដល់២៨៣នាក់។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី១០ ខែតុលា ឆ្នាំ២០២០ បានលើកឡើងថា បុរសជាជនជាតិបារាំង អាយុ ៣៣ឆ្នាំ ដែលរកឃើញវិជ្ជមានជំងឺកូវីដ១៩ មានអាសយដ្ឋានស្នាក់នៅសណ្ឋាគារមួយក្នុងខេត្តព្រះសីហនុ។ ជនជាតិបារាំងនោះ បានធ្វើដំណើរពីប្រទេសកូរ៉េខាងត្បូង មកដល់ប្រទេសកម្ពុជា នៅថ្ងៃទី០៨ ខែតុលា។
ក្រសួងបន្តថា ជើងហោះហើរដែលបុរសនោះធ្វើដំណើរ មានអ្នកដំណើរសរុបចំនួន ៥៩នាក់ ។ ចំណែក ៥៨នាក់ ត្រូវបានដាក់ឲ្យធ្វើចត្តាឡីស័ក្តចំនួន១៤ថ្ងៃ នៅវិទ្យាល័យ១០០ខ្នងចំនួន៦នាក់ នៅសណ្ឋាគារចំនួន៥ផ្សេងគ្នាក្នុងរាជធានីភ្នំពេញ មានចំនួន៥២នាក់។
បើតាមក្រសួងសុខាភិបាល គិតមកដល់ម៉ោង ៧ព្រឹក ថ្ងៃទី១០ ខែតុលា ឆ្នាំ២០២០នេះ កម្ពុជា បានរកឃើញអ្នកឆ្លងជំងឺកូវីដ១៩ សរុបចំនួន ២៨៣នាក់ ក្នុងនោះបានព្យាបាលជាសះស្បើយចំនួន ២៧៧នាក់ និងកំពុងសម្រាកព្យាបាលនៅមន្ទីរពេទ្យចំនួន ៦នាក់៕
