ឈើជាច្រើនដើមបានដាច់ហូរចេញពីឧទ្យានជាតិខៅយ៉ៃចូលទៅក្នុងទំនប់ឡាំតាខុងដែលបណ្តាលឱ្យប្រឡាយដ៏ធំមួយបានហូរហៀរនិងជន់លិចតំបន់ជាច្រើនក្នុងស្រុកប៉ាកឆុង (Pak Chong) ខេត្តណាខនរាជសីមា (Nakhon Ratchasima) ភាគកណ្តាលប្រទេសថៃ។ តាមការចុះផ្សាយរបស់បាងកកប៉ុស្តិ៍ នេះជាគ្រោះទឹកជំនន់ដ៏អាក្រក់ដែលកើតឡើងក្នុងតំបន់នារយៈពេល១៥ឆ្នាំចុងក្រោយនេះ។
ភ្លៀងធ្លាក់ខ្លាំងចាប់តាំងពីថ្ងៃពុធ បានធ្វើឱ្យដាច់ហូរឈើជាច្រើនចេញពីឧទ្យានទៅទើរនឹងផ្លូវដែលជន់លិច ការិយាល័យរដ្ឋាភិបាល ផ្ទះសម្បែង និងដីស្រែចម្ការចំនួន៧តំបន់នៅក្នុងស្រុកប៉ាកឆុង។ អ្វីដែលកាន់តែអាក្រក់ជាងនេះទៅទៀតនោះ គឺថា ឈើដែលដាច់នោះបានហូរចូលទៅទំនប់ឡាំតាខុងនៅយប់ថ្ងៃសុក្រ បណ្តាលឱ្យទឹកហូរជាច្រើនហៀរចេញពីទំនប់ ដែលបណ្តាលឱ្យទឹកហូរយ៉ាងខ្លាំងនៅទីប្រជុំជនប៉ាកឆុង ដែលកម្ពស់ទឹកប្រមាណជា៥០សង់ទីម៉ែត្រទៅ១ម៉ែត្រ។
ឧទ្យានជាតិខៅយ៉ៃរបស់ថៃត្រូវបានបិទទ្វារកាលពីចុងសប្តាហ៍ ដោយសារតែហានិភ័យនៃទឹកជំនន់និងការបាក់ដីកាន់តែច្រើន។
ផ្ទះសម្បែងប្រជាជនជាង២០០គ្រួសារនៅតំបន់ណង់ណាមឌែង ខាណុងប្រា និងមូស៊ិ ត្រូវបានលិចលង់។ អាជ្ញាធរនិងប្រជាជនក្នុងតំបន់បាននិយាយថា វាជាទឹកជំនន់ដ៏អាក្រក់បំផុតនៅក្នុងប៉ុន្មានឆ្នាំនេះ។
ទឹកជំនន់បានធ្វើឱ្យផ្លូវណងសារ៉ាយ-ប៉ាក់ឆុង មិនអាចបើកបរបានសម្រាប់យានយន្តតូចៗ។ ផ្សារ ការិយាល័យស្រុកប៉ាកឆុង ស្ថានីយប៉ូលិស ប្រាសាទ និងសណ្ឋាគារនៅតំបន់ក្រុងបានលិចលង់។
លោក វិឈៀន ចាន់តារាណូថៃ អភិបាលខេត្តណាខនរាជសីមា កាលពីម្សិលមិញ បានជួបជាមួយមន្រ្តីមកពីទីភ្នាក់ងាររដ្ឋាភិបាលជាច្រើននៅក្នុងការិយាល័យស្រុក ដើម្បីរៀបចំវិធានការទប់ទល់នឹងស្ថានភាពទឹកជំនន់។
អាជ្ញាធរបានបង្កើតជម្រកបណ្តោះអាសន្នចំនួន៥កន្លែងដែលរួមមានក្នុងមន្ទីរពេទ្យប៉ាកឆុង និងសាលារៀនជាដើម សម្រាប់ប្រជាជនដែលរងផលប៉ះពាល់។
ទូកនិងកងកម្លាំងជាច្រើនក៏ត្រូវបានបញ្ជូនទៅជួយជម្លៀសប្រជាជននៅតាមតំបន់រងគ្រោះដោយទឹកជំនន់ផងដែរ។
លោក ស៊ូរ៉ាផាន់ ស៊ីលប៉ាស៊ូវ៉ាន់ អភិបាលស្រុកប៉ាកឆុង បាននិយាយថា មិនមានទឹកហូរចេញពីឧទ្យានដែលហូរចូលទីប្រជុំជនប៉ាកឆុងទៀតទេ ហើយទឹកនឹងត្រូវបង្ហូរចេញក្នុងរយៈពេលពីរថ្ងៃទៀត។
លោកបាននិយាយថា មន្រ្តីស្រុកកំពុងធ្វើការប៉ាន់ស្មានការខូចខាតដែលបណ្តាលមកពីទឹកជំនន់ហើយកំពុងពិចារណាពីការជួយដល់អ្នកដែលរងគ្រោះដោយទឹកជំនន់៕