អគ្គនាយកដ្ឋានពន្ធដារកម្ពុជា បានប្រកាសថា ក្នុងរយៈពេល៩ខែឆ្នាំនេះ កម្ពុជាប្រមូលចំណូលពន្ធ-អាករ បានជាង២ពាន់លានដុល្លារអាមេរិក កើនឡើងជិត៤% បើធៀបនឹងរយៈពេលដូចគ្នាកាលពីឆ្នាំមុន។
សេចក្តីប្រកាសព័ត៌មានរបស់អគ្គនាយកដ្ឋានពន្ធដារកម្ពុជា ចុះថ្ងៃទី១២ ខែតុលា បានឱ្យដឹងថា ចំណូលពន្ធ-អាករ ដែលអគ្គនាយកដ្ឋានប្រមូលបានក្នុងរយៈពេល៩ខែឆ្នាំនេះ មានចំនួន ៩ ០១៥,០៨ ប៊ីលានរៀល ស្មើប្រមាណជាង ២ ២២៥ លានដុល្លារ កើនឡើងជាង ៨០លានដុល្លារ ឬស្មើនឹង ៣,៧១% បើធៀបនឹងរយៈពេលដូចគ្នាកាលពីឆ្នាំមុន។
ដោយឡែក សម្រាប់តែខែកញ្ញា ឆ្នាំ២០២០ អគ្គនាយកដ្ឋានប្រមូលពន្ធ-អាករបានជាង ១៨៦ លានដុល្លារ ស្មើនឹង ៦,៥៣% ដែលចំនួននេះមានការថយចុះជាង ៤២ លានដុល្លារ ស្មើនឹង ១៨,៧៥% បើធៀបនឹងខែកញ្ញាឆ្នាំមុន។
អគ្គនាយកនៃអគ្គនាយកដ្ឋានពន្ធដារកម្ពុជា លោក គង់ វិបុល បានថ្លែងក្នុងសេចក្តីប្រកាសព័ត៌មាននោះថា ឥទ្ធិពលនៃការរីករាលដាលនៃជំងឺកូវីដ១៩ បានបង្ហាញនូវសញ្ញានិងផលប៉ះពាល់ជាអវិជ្ជមានទៅលើចំណូលពន្ធ ជាពិសេសប្រភេទពន្ធនិងវិស័យសំខាន់ៗក្នុងត្រីមាសទី៣នេះ។
ករណីនេះ លោកបានក្រើនរំឭកដល់ប្រធានអង្គភាពក្រោមឱវាទទាំងអស់ ត្រូវពង្រឹងកិច្ចសហការរវាងអង្គភាពនិងអង្គភាព និងអន្តរក្រសួង-ស្ថាប័ន ដើម្បីបង្កើនប្រសិទ្ធភាពនិងតម្លាភាពដល់ការប្រមូលពន្ធ។
លោក គង់ វិបុល ក៏បានណែនាំដល់មន្ត្រីទាំងអស់ បន្តពង្រឹងវិធានការអន្តរាគមន៍បន្ទាន់របស់រដ្ឋាភិបាល ដើម្បីទ្រទ្រង់វិស័យទេសចរណ៍ អាកាសចរណ៍ កសិកម្មនិងការចិញ្ចឹមសត្វ និងវិស័យកាម្មន្តសាលទូទៅ រួមទាំងវិធានការអន្តរាគមន៍នានា ដើម្បីជំរុញកំណើនសេដ្ឋកិច្ច ស្របពេលដែលកម្ពុជាកំពុងជួបវិបត្តិជំងឺកូវីដ១៩។
