ការិយាល័យអចិន្ត្រៃយ៍នៃគណៈកម្មាធិការគ្រប់គ្រងគ្រោះមហន្តរាយវៀតណាម អះអាងថាអាជ្ញាធរបានជម្លៀសប្រជាជនរាប់ពាន់នាក់ពីខេត្តចំនួន៤ទៅរកទីតាំងមានសុវត្ថិភាព ខណៈអ្នកស្លាប់ដោយសារទឹកជំនន់កើនឡើងដល់៣៦នាក់និង១២នាក់បាត់ខ្លួន។
យោងតាមសារព័ត៌មានវៀតណាម VN Explorer បានឱ្យដឹងថា គិតត្រឹមថ្ងៃទី១៤ ខែតុលា ខេត្តក្វាងប៊ិញ ក្វាងទ្រី ក្វាងណាម និងខេត្តធួធៀនហឺ មានការជន់លិចខ្លាំងជាងបណ្តាខេត្តផ្សេងទៀត ស្របពេលដែលគណៈកម្មាធិការគ្រប់គ្រងគ្រោះមហន្តរាយបានរាយការណ៍ថា ផ្ទះចំនួន៥៤១ខ្នងបានបំផ្លិចបំផ្លាញ ផ្ទះចំនួន១៦០ ៧៨៤រងការជន់លិច ក្នុងនោះដំណាំចំនួន៤ ០០០ហិកតា និងស្ពានថ្នល់ជាច្រើនបានខូចខាតនិងបាក់។
គណៈកម្មាធិការដឹកនាំការស្រាវជ្រាវបង្ការគ្រោះមហន្តរាយ បានរាយការណ៍នៅថ្ងៃទី១៣ ខែតុលា ថាប្រជាពលរដ្ឋប្រមាណ១១ ៦៤០នាក់ ក្នុងខេត្តចំនួន៤ខាងលើ បានជួយសង្គ្រោះនិងជម្លៀសចេញពីតំបន់ទៅកាន់ទីទួលមានសុវត្ថិភាព។
កាលពីថ្ងៃទី១៣ ខែតុលាកន្លងទៅ កាកបាទក្រហមវៀតណាម បានផ្តល់ជំនួយប្រមាណ១,៤ពាន់លានដុង ដល់ខេត្តចំនួន៤ខាងលើដែលរងគ្រោះខ្លាំង។
គណៈកម្មាធិការគ្រប់គ្រងគ្រោះមហន្តរាយបាននិយាយថា ប្រជាពលរដ្ឋដែលរស់នៅលើទូកនិងរស់នៅលើនាវាបានជួយស្វែងរកទីជម្រកដែលមានសុវត្ថិភាព ខណៈពួកគេទទួលបានជំនួយសង្គ្រោះផ្នែកឧបភោគបរិភោគ។
យោងទៅតាមការចេញផ្សាយរបស់ក្រសួងធនធានទឹកនិងឧតុនិយមវៀតណាម បានឱ្យដឹងថា ព្យុះណានកាដែលព្យុះជាទី៧ ក្នុងឆ្នាំនេះ គឺបង្កឱ្យមានខ្យល់បក់ខ្លាំងនិងភ្លៀងខ្លាំង ដោយបង្កឡើងដោយជ្រលងសម្ពាធទាប ខណៈវាអូសបន្លាយយូរដែលធ្វើឱ្យមានទឹកជំនន់នៅតំបន់ភាគខាងជើងនិងខាងជើងភាគកណ្តាលនាពេលខាងមុខ៕
