គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងនៅថ្ងៃសុក្រនេះថា ចំនួនអ្នកស្លាប់ដោយគ្រោះទឹកជំនន់បានកើនដល់១២នាក់ ខណៈពលរដ្ឋដែលរងផលប៉ះពាល់បានកើនដល់ជិត១៦ម៉ឺននាក់។
របាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា គិតត្រឹមរសៀលថ្ងៃទី១៤ ខែតុលានេះ ចំនួនអ្នកស្លាប់ក្នុងគ្រោះមហន្តរាយជំនន់ទឹកភ្លៀង បានកើនដល់១២នាក់ (កុមារ៥នាក់) ក្នុងនោះ នៅខេត្តបន្ទាយមានជ័យ មានអ្នកស្លាប់៥នាក់, ខេត្តព្រះសីហនុ ២នាក់, ខេត្តពោធិ៍សាត់ ៣នាក់, ខេត្តប៉ៃលិន ១នាក់ និងខេត្តកំពង់ធំ ១នាក់។
របាយការណ៍ដដែល បន្តថា ខេត្តដែលរងផលប៉ះពាល់បានកើនដល់១៩រាជធានី-ខេត្ត និងមានប្រជាពលរដ្ឋរងផលប៉ះពាល់ជាង១៥ម៉ឺន៨ពាន់នាក់ ខណៈពលរដ្ឋជាង១១ម៉ឺននាក់ត្រូវបានជម្លៀសទៅកាន់ទីទួលសុវត្ថិភាព។
របាយការណ៍បន្ថែមថា ជំនន់ទឹកភ្លៀងក៏បានបង្កឱ្យខូចខាតផ្ទះសម្បែងពលរដ្ឋចំនួន៣០ខ្នង លិចស្រូវជាង១១ម៉ឺនហិកតា និងដំណាំរួមផ្សំផ្សេងៗជាង៥ម៉ឺន៥ពាន់ហិកតា។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា ប្រាប់វីអូឌីនៅថ្ងៃនេះថា ខេត្តដែលរងផលប៉ះពាល់ដោយជំនន់ទឹកភ្លៀងទាំង១៩នោះ រួមមាន រាជធានីភ្នំពេញ ពោធិ៍សាត់ បាត់ដំបង បន្ទាយមានជ័យ ប៉ៃលិន ព្រះសីហនុ ស្វាយរៀង ឧត្តរមានជ័យ សៀមរាប តាកែវ កំពង់ស្ពឺ មណ្ឌលគិរី កោះកុង កំពង់ឆ្នាំង កណ្ដាល កំពង់ធំ ព្រះវិហារ កំពង់ចាម និងស្ទឹងត្រែង។
លោកថា៖ «ក្រុមការងារថ្នាក់ជាតិនិងកងកម្លាំងយោធាដែលជាកម្លាំងរុករកនិងសង្គ្រោះ បាន ប្រមាណជា១ពាន់នាក់បានចុះទៅគោលដៅខេត្តដែលរងគ្រោះ ហើយកំពុងតែសង្គ្រោះ ហើយនឹងត្រៀមលក្ខណៈសង្គ្រោះ។ ថ្នាក់ដឹកនាំបានសហការជាមួយអាជ្ញាធរខេត្តនិងអង្គភាពដែលពាក់ព័ន្ធក្នុងការចែកស្បៀង ទឹក ហើយនិងសម្ភារមួយចំនួនទៀតដល់ជនរងគ្រោះ»។
រដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល មានប្រសាសន៍ពេលចុះត្រួតពិនិត្យស្ថានភាពទឹកជំនន់នៅក្នុងខណ្ឌដង្កោ រាជធានីភ្នំពេញ នៅថ្ងៃនេះថា ជំនន់ទឹកភ្លៀង បានបង្កផលប៉ះពាល់ដល់ផ្លូវចំនួន៨៧ខ្សែ ដែលមានប្រវែង២៤៣គីឡូម៉ែត្រ ស្មើនឹង១៩៩កំណាត់ នៅក្នុងខេត្តចំនួន១៣។
លោកថា៖ «មន្ត្រីជំនាញយើងកំពុងរកមធ្យោបាយធ្វើម៉េចកុំឱ្យទឹកហូរកាត់ផ្លូវ»។
លោក ស៊ុន ចាន់ថុល បន្តថា មកដល់ពេលនេះ ក្រុមការងារក្រសួងកំពុងបន្តចុះតាមដាននិងវាយតម្លៃស្ថានភាពផ្លូវដែលរងការខូចខាត ដើម្បីត្រៀមជួសជុលឡើងវិញក្រោយពេលជំនន់ទឹកភ្លៀងស្រកចុះវិញ។
កាលពីរសៀលថ្ងៃម្សិលមិញ អាជ្ញាធរខេត្តកំពង់ស្ពឺ បានប្រកាសថា ទំនប់ចម្ការតែនៅខ្នងភ្នំគិរីរម្យដែលស្តុកទឹក៥លានម៉ែត្រគូប បានបាក់ដោយសារតែមានភ្លៀងធ្លាក់ច្រើនជាបន្តបន្ទាប់។
អាជ្ញាធរខេត្តបានបន្តថា ការបាក់ទំនប់ដែលស្តុកទឹកដ៏ច្រើននេះ បានបង្កផលប៉ះពាល់ដល់ឃុំមួយចំនួននៅក្រុងស្រុកសំរោងទង និងតំបន់តាមបណ្តោយស្ពានព្រែកត្នោត ដែលតម្រូវឱ្យប្រជាពលរដ្ឋបង្កើនការប្រុងប្រយ័ត្ន។
នៅថ្ងៃពុធនេះ រដ្ឋបាលខេត្តកំពង់ស្ពឺ បានបញ្ជាក់បន្ថែមថា កម្រិតកម្ពស់ទឹកនៅទំនប់ពាមឃ្លៃ និងទ្វារទឹករលាំងជ្រៃ ក៏បានឡើងខ្ពស់ដល់កម្រិតប្រកាសអាសន្នដែរ ក្រោយទទួលរងឥទ្ធិពលព្យុះនិងមានភ្លៀងធ្លាក់យ៉ាងច្រើនជាបន្តបន្ទាប់។
ករណីនេះ រដ្ឋបាលខេត្ត បានជូនដំណឹងដល់ប្រជាពលរដ្ឋរស់នៅភូមិមួយចំនួនក្នុងស្រុកសំរោងទងនិងក្រុងច្បារមន រៀបចំរើទុកដាក់សម្ភារសំខាន់ៗទៅកាន់ទីទួលសុវត្ថិភាពឱ្យបានត្រឹមត្រូវ ជាពិសេស មនុស្សចាស់ជរានិងកុមារតូចៗ ត្រូវទៅកាន់ទីទួសសុវត្ថិភាពមុនគេ និងត្រូវប្រុងប្រយ័ត្នចំពោះខ្សែអគ្គិសនី។
ការបាក់ទំនប់ចម្ការតែ ក៏បានបណ្តាលឱ្យតំបន់មួយចំនួននៅជាយរាជធានីភ្នំពេញរងផលប៉ះពាល់ដោយជំនន់ទឹកភ្លៀងផងដែរ ជាពិសេសនៅក្នុងខណ្ឌដង្កោ។
ចំណែករដ្ឋបាលខេត្តកណ្ដាល នៅថ្ងៃពុធនេះ បានជូនដំណឹងពីស្ថានភាពទឹកទំនប់៧មករា (កំពង់ទួល) និងស្ទឹងព្រែកត្នោត ដែលនៅតែបន្ដជន់ឡើងខ្លាំងលើសកម្រិតប្រកាសអាសន្ន។
រដ្ឋបាលខេត្តបានបញ្ជាក់ថា ស្ថានភាពនេះ អាចបណ្ដាលឱ្យមានផលប៉ះពាល់ដល់ភូមិសាស្ដ្រខេត្តកណ្ដាល រួមមាន ក្រុងតាខ្មៅ ស្រុកអង្គស្នួល និងស្រុកកណ្ដាលស្ទឹង។
រដ្ឋបាលខេត្ត បានអំពាវនាវដល់ប្រជាពលរដ្ឋរស់នៅស្រុកទាំង៣នេះ ត្រៀមបង្ការនិងប្រុងប្រយ័ត្នខ្ពស់ ហើយអាជ្ញាធរមូលដ្ឋានគ្រប់លំដាប់ថ្នាក់ ត្រូវយកចិត្តទុកដាក់និងរៀបចំផែនការអន្ដរាគមន៍ ដោយត្រៀមកម្លាំងក្នុងការទប់ស្កាត់និងត្រៀមទីទួលសុវត្ថិភាពឱ្យបានច្បាស់លាស់។
កាលពីថ្ងៃទី១៣ ខែតុលា ក្រសួងធនធានទឹក និងឧតុនិយម បានអំពាវនាវដល់ប្រជាពលរដ្ឋឱ្យប្រុងប្រយ័ត្នចំពោះជំនន់ទឹកភ្លៀង ដោយថា ចាប់ពីថ្ងៃទី១៨ ដល់ថ្ងៃទី២០ ខែតុលានេះ កម្ពុជានឹងទទួលរងឥទ្ធិពលព្យុះទី១៦ ឈ្មោះ ណាងកា (Nangka) និងព្យុះទី១៧ ឈ្មោះ សូដែល (Saudel) ដែលនាំឱ្យមានភ្លៀងធ្លាក់ បាតុភូតផ្គរ រន្ទះ ខ្យល់កន្ត្រាក់ និងរលកសមុទ្រខ្ពស់ៗផងដែរ៕
