ក្រុមកម្មកររាប់សិបនាក់ដែលធ្វើការនៅក្រុមហ៊ុនប្រមូលសំរាម ស៊ីនទ្រី នៅព្រឹកថ្ងៃពុធនេះ បានប្រមូលផ្តុំគ្នានៅមុខទីតាំាងចំណតរថយន្ត ស៊ីនទ្រី ស្ថិតនៅភូមិម័ល សង្កាត់ដង្កោ ខណ្ឌដង្កោ រាជធានីភ្នំពេញ ដើម្បីរង់ចាំដំណោះស្រាយរឿងវិវាទការងារពីអាជ្ញាធរពាក់ព័ន្ធ។
កម្មការិនីផ្នែកបោសសម្អាតធ្វើការនៅក្រុមហ៊ុន ស៊ីនទ្រី អ្នកស្រី សន ម៉េត មានប្រសាសន៍ថា ការដែលពួកគាត់ទៅប្រមូលផ្តុំគ្នានេះ ក្នុងគោលបំណងរង់ចាំដំណោះស្រាយពីរដ្ឋបាលរាជធានីភ្នំពេញ លើអ្វីដែលកម្មករបានស្នើសុំ ខណៈការងាររបស់ពួកគាត់មានការប្រឈមច្រើន ទាំងបញ្ហាសុខភាពនិងសុវត្ថិភាព។
អ្នកស្រីថា៖ «ពួកខ្ញុំតស៊ូមកដល់ថ្ងៃហ្នឹង ដើម្បីអី? ដើម្បីលុយដំណាច់ឆ្នាំ លុយថ្លៃបាយ លុយធ្វើដំណើរ អត់មានចង់បានលោភលន់អីទេ ហើយក្រុមកម្មករពួកខ្ញុំមិនមែនចង់ធ្វើបាតុកម្មឬចង់បះបោរអីទេ គឺចង់ឱ្យចៅហ្វាយក្រុងជួយដោះស្រាយឱ្យបានសម្រេចដល់ពួកខ្ញុំទៅ…ពេលកើតជំងឺកូវីដហ្នឹង មានតែកម្មករស៊ីនទ្រីធ្វើការទាំងយប់ទាំងថ្ងៃ ទាំងកម្មករឡាន កម្មករបោសសម្អាត កម្មករអូសរទេះ ដើម្បីអី? ដើម្បីប្រជាពលរដ្ឋខ្មែរយើង ធ្វើម៉េចសំរាមស្អុយពេញទីក្រុង ដល់ឥលូវមានផលប្រយោជន៍តិចតួច គាត់អត់មានដោះស្រាយឱ្យពួកខ្ញុំទេ»។
ក្រុមកម្មករជាង២ពាន់នាក់របស់ក្រុមហ៊ុនប្រមូលសំរាម ស៊ីនទ្រី បាននាំគ្នាធ្វើការតវ៉ាអត់ចូលធ្វើការតាំងពីថ្ងៃទី២ ខែតុលា មកដល់បច្ចុប្បន្ន ដើម្បីទាមទារទៅថៅកែទូទាត់ប្រាក់អត្ថប្រយោជន៍៥ចំណុច រួមមាន ប្រាក់អតីតភាពការងារ ប្រាក់ជំងឺចិត្ត ប្រាក់ជួសឱ្យការជូនដំណឹងមុន ប្រាក់ដំណាច់ឆ្នាំដែលនៅសល់ និងប្រាក់ខែចុងក្រោយ ខណៈការគ្រប់គ្រងសំរាមនៅរាជធានីភ្នំពេញ កំពុងឈានទៅរកការបែងចែកឡើងវិញជាមួយក្រុមហ៊ុនថ្មីចំនួន២ទៀត។
វីអូឌី នៅពុំទាន់អាចសុំការអត្ថាធិប្បាយពីអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តី បានទេនៅព្រឹកថ្ងៃពុធនេះ។
កាលពីថ្ងៃទី១២ ខែតុលានេះ រដ្ឋបាលរាជធានីភ្នំពេញ បានចេញសេចក្តីជូនដំណឹងមួយដោយលើកឡើងថា កម្មករបើកបរនិងកម្មករប្រមូលសំរាមរបស់ក្រុមហ៊ុន ស៊ីនទ្រី នៅតែបន្តធ្វើកូដកម្មខុសច្បាប់មិនចេញប្រមូលសំរាមឡើយ លើកលែងតែកម្មករបោសសម្អាតផ្លូវតែប៉ុណ្ណោះបានចូលធ្វើការងារវិញ កាលពីថ្ងៃទី១០ ខែតុលា។
ក្នុងសេចក្តីជូនដំណឹងដដែល បានអំពាវនាវដល់កម្មករប្រមូលសំរាមទាំងអស់ឱ្យចូលធ្វើការងារវិញ ដើម្បីកុំឱ្យបាត់បង់អត្ថប្រយោជន៍ផ្សេងៗដែលច្បាប់បានកំណត់។
រដ្ឋបាលរាជធានីភ្នំពេញ បានឱ្យដឹងដែរថា ពាក់ព័ន្ធនឹងវិវាទការងារនេះ អាជ្ញាធរពាក់ព័ន្ធបានចុះសម្របសម្រួលដោះស្រាយជាច្រើនលើកច្រើនសារហើយ រហូតមានកិច្ចព្រមព្រៀងមួយកាលពីថ្ងៃទី៧ ខែតុលា ប៉ុន្តែចុងក្រោយ ក្រុមកម្មករនៅតែមិនគោរពកិច្ចព្រមព្រៀងនោះ ហើយបន្តធ្វើកូដកម្មទាមទារអត្ថប្រយោជន៍ខុសច្បាប់ ដែលសាលារាជធានីភ្នំពេញមិនអាចដោះស្រាយជូនបានឡើយ៕
