គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា ស្ថានភាពជំនន់ទឹកភ្លៀងរហូតមកដល់រសៀលថ្ងៃនេះ ហាក់មានការស្រកតិចតួចប៉ុណ្ណោះ ប៉ុន្តែកម្ពស់ទឹកអាចនឹងហក់ឡើងវិញ ខណៈកម្ពុជានឹងរងប្រព័ន្ធសម្ពាធទាបនិងឥទ្ធិពលនៃព្យុះទី១៧។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា មានប្រសាសន៍ថា រហូតមកថ្ងៃទី១៥ ខែតុលានេះ គឺស្ថានភាពទឹកជំនន់មានការស្រកតិចតួចប៉ុណ្ណោះ ដូចជា នៅខេត្តពោធិ៍សាត់ បាត់ដំបង និងនៅរាជធានីភ្នំពេញ។ ប៉ុន្តែលោកថា កម្រិតទឹកអាចនឹងហក់ឡើងវិញ ដោយសារកម្ពុជានឹងរងប្រព័ន្ធសម្ពាធទាបនិងឥទ្ធិពលនៃព្យុះទី១៧ ឈ្មោះ សូឌែល (Saudel) ចាប់ពីថ្ងៃទី១៧ ដល់ថ្ងៃទី១៩ ខែតុលានេះ។
បើតាមអ្នកនាំពាក្យរូបនេះ រដ្ឋាភិបាលបានបញ្ជូនកម្លាំងទ័ពជាង១ពាន់នាក់និងអាជ្ញាធរចម្រុះរាប់រយនាក់ទៀត ដើម្បីជួយនិងត្រៀមជួយប្រជាពលរដ្ឋដែលរងគ្រោះទឹកជំនន់នៅទូទាំងប្រទេស។
លោកបន្ថែមថា៖ «យើងត្រូវត្រៀមដើម្បីជម្លៀសខ្លួនចេញពីកន្លែងដែលរងគ្រោះធ្ងន់ធ្ងរ ជាពិសេសប្រជាពលរដ្ឋដែលរស់នៅតាមតំបន់ទំនាប អាចលិចលង់ខ្លាំង ដូច្នេះត្រូវតាមដាន ហើយប្រុងប្រៀបខ្លួនជាស្រេចនូវមធ្យោបាយដែលជម្លៀសខ្លួនទៅឱ្យបានទាន់ពេល ដូចជា មានពាក់សម្ភារនិងស្បៀងអាហារដែលខ្លួនអាចយកទៅបាន ដើម្បីជួយសម្រួលនិងកាត់បន្ថយការលំបាក»។
របាយការណ៍របស់គណៈកម្មាធិការជាតិនៅព្រឹកថ្ងៃព្រហស្បតិ៍នេះ បានឱ្យដឹងថា គិតចាប់ពីថ្ងៃទី១ ខែកញ្ញា ដល់ថ្ងៃទី១៥ ខែតុលា ជំនន់ទឹកភ្លៀងបានបង្កឱ្យប្រជាពលរដ្ឋជិត២០ម៉ឺននាក់និងផ្ទះជិត៥ម៉ឺនខ្នង រងផលប៉ះពាល់ ក្នុងនោះខូចខាតផ្ទះ៥០ខ្នង ខណៈមនុស្សស្លាប់បានកើនដល់១៣នាក់។
របាយការណ៍ដដែលនេះ ឱ្យដឹងទៀតថា ដំណាំស្រូវចំនួន១៣១ ៣២៩ហិកតា ត្រូវលិចទឹក ក្នុងនោះខូចខាតប្រមាណ៦ ៦៥៧ហិកតា និងដំណាំរួមផ្សំ៥៥ ៣៦០កិកតា ក្នុងនោះខូចខាតប្រមាណ៦ ៣១០ហិកតា រួមទាំងប៉ះពាល់ដល់ហេដ្ឋារចនាសម្ព័ន្ធជាច្រើនទៀត។
អាជ្ញាធររាជធានីភ្នំពេញ កាលពីល្ងាចថ្ងៃម្សិលមិញមកដល់ថ្ងៃនេះ បានបិទចរាចរណ៍មិនឱ្យធ្វើដំណើរឆ្លងកាត់កំណាត់ផ្លូវលេខ២១៧ ចាប់ពីស្ពានព្រែកជ្រៃ ដល់រង្វង់មូលកួរស្រូវ ផ្លូវជាតិលេខ២ ស្ថិតក្នុងខណ្ឌដង្កោ ជាបណ្តោះអាសន្ន ដោយសារទឹកជំនន់ហូរកាត់និងមានការជន់លិចខ្លាំង។ លំនៅដ្ឋានក្នុងបុរីមួយចំនួននៅតំបន់នោះបានរងការជន់លិច ខណៈពលរដ្ឋជាច្រើនគ្រួសារត្រូវបានជម្លៀសចេញទៅកាន់ទីទួលសុវត្ថិភាព។ នេះបើតាមការបញ្ជាក់របស់អាជ្ញាធរ។
អភិបាលរាជធានីភ្នំពេញ លោក ឃួង ស្រេង មានប្រសាសន៍ថា បញ្ហាគ្រោះទឹកជំនន់ប៉ុន្មានថ្ងៃមកនេះ បានបណ្តាលឱ្យសង្កាត់ចំនួន៦ ក្នុងខណ្ឌដង្កោ រងផលប៉ះពាល់ខ្លាំង។ លោកបន្តថា អាជ្ញាធរបានដាក់កម្លាំងសមត្ថកិច្ចជាង៦០០នាក់ និងឧបករណ៍ជួយសង្គ្រោះជាអូប័រជាង៦០គ្រឿង ដើម្បីជួយសង្គ្រោះប្រជាពលរដ្ឋដែលរងគ្រោះ។
លោកបន្ថែមថា៖ «យើងខិតខំប្រឹងប្រែងធ្វើយ៉ាងណាទប់ស្កាត់និងជួយសង្គ្រោះដល់បងប្អូនប្រជាពលរដ្ឋយើងឱ្យរួចផុតពីគ្រោះកាចនេះ មិនឱ្យមកយ៉ាយីដល់អាយុជីវិតបងប្អូនប្រជាពលរដ្ឋយើងឡើយ»។
ពាក់ព័ន្ធការជន់លិចដោយទឹកជំនន់នេះ លោក ឃួង ស្រេង នៅមិនទាន់អាចបញ្ជាក់ពីចំនួនប្រជាជនដែលត្រូវបានជួយសង្គ្រោះ និងការខូចទ្រព្យសម្បត្តិនិងផលដំណាំនៅក្នុងភូមិសាស្ត្ររាជធានីភ្នំពេញបាននៅឡើយទេ។ ប៉ុន្តែលោកបានអំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់។
ពលរដ្ឋម្នាក់ដែលត្រូវបានជួយសង្គ្រោះ អ្នកស្រី មាស សុធី មានស្រុកកំណើតនៅខេត្តស្វាយរៀង និងបានជួលផ្ទះនៅភូមិព្រែកជ្រៃ ខណ្ឌដង្កោ បានរៀបរាប់ទាំងអួលដើមកថា អ្នកស្រីមានការតក់ស្លុតនិងភិតភ័យខ្លាំង ដោយសារទឹកជន់ឡើងលឿនពេក ដែលធ្វើឱ្យអ្នកស្រីនិងគ្រួសារមិនអាចប្រមូលយកសម្ភារប្រើប្រាស់នានាទៅកាន់ទីទួលសុវត្ថិភាពបានទាន់ពេល។
អ្នកស្រីថា៖ «ខ្ញុំស្មានមិនដល់ ព្រោះកាលពីល្ងាច វាហូររឹមៗត្រឹមភ្នែកគោរទេ ប៉ុន្តែស្រាប់តែកន្លះម៉ោង វាហូរឡើងមកស្រឺតៗ វាបុកយកតែម្តង។ ម៉ូតូ០១៩មួយគ្រឿងកប់ចោលនៅ [ក្នុងផ្ទះជួល] ហ្នឹង ឥលូវដល់ថ្ងៃបង់រំលោះគេទៀត»។
ពាក់ព័ន្ធបញ្ហាគ្រោះទឹកជំនន់នេះដែរ មន្ទីរសាធារណការ និងដឹកជញ្ជូនខេត្តកណ្តាល បានជូនដំណឹងពីការបិទចរាចរណ៍រថយន្តដឹកទំនិញធុនធំគ្រប់ប្រភេទ នៅលើកំណាត់ផ្លូវជាតិតូចធំចំនួន៩ខ្សែ ក្នុងភូមិសាស្ត្រខេត្តនេះជាបណ្ដោះអាសន្ន។
រដ្ឋបាលខេត្តតាកែវ កាលពីថ្ងៃម្សិលមិញ ក៏បានជូនដំណឹងពីការបិទចរាចរណ៍លើកំណាត់ផ្លូវជាតិលេខ២ និងលេខ៣ ស្ថិតក្នុងភូមិសាស្ត្រខេត្តតាកែវ ជាបណ្តោះអាសន្ន ដោយសារមានការជន់លិចដោយទឹកជំនន់។
សេចក្តីជូនដំណឹងបានបញ្ជាក់ថា ការផ្អាកការធ្វើដំណើរបណ្តោះអាសន្នចំពោះផ្លូវជាតិលេខ២ ពីគីឡូម៉ែត្រលេខ៣១ ដល់គីឡូម៉ែតលេខ៧៤ ត្រង់រង្វង់មូលអូរចំបក់ ដល់កំពង់ដង្កោ ព្រំប្រទល់ខេត្តកណ្តាល ខណៈផ្លូវជាតិលេខ៣ ចាប់ពីអង្គតាសោម ដល់គីឡូម៉ែត្រ៣៦ ព្រំប្រទល់ខេត្តកណ្តាល។
ក្រសួងធនធានទឹក និងឧតុនិយម ឱ្យដឹងដែរថា រាជធានី-ខេត្តស្ទើរទូទាំងប្រទេស នឹងមានភ្លៀងធ្លាក់ពីបង្គួរទៅច្រើន ចាប់ពីថ្ងៃទី១៧ ដល់ថ្ងៃទី១៩ ខែតុលានេះ ដោយសារកម្ពុជារងប្រព័ន្ធសម្ពាធទាបនិងឥទ្ធិពលនៃព្យុះទី១៧ ឈ្មោះ សូឌែល (Saudel)។
ក្រសួងបញ្ជាក់ថា ឥទ្ធិពលព្យុះទី១៧ និងប្រព័ន្ធសម្ពាធទាប បាននិងកំពុងបន្តអូសបន្លាយលើប្រទេសកម្ពុជា ដែលស្ថានភាពនេះនឹងធ្វើឱ្យមានភ្លៀងធ្លាក់ច្រើនជាប់ជាបន្ត នៅតំបន់វាលទំនាប ក្នុងនោះមានរាជធានីភ្នំពេញ ខេត្តសៀមរាប បន្ទាយមានជ័យ បាត់ដំបង ពោធិ៍សាត់ កំពង់ធំ កំពង់ឆ្នាំង កំពង់ស្ពឺ និងកណ្តាល។
ចំពោះបណ្តាខេត្តនៅតំបន់ជួរភ្នំដងរែក ខ្ពង់រាបឦសាន ខេត្តជាប់ព្រំដែនប្រទេសវៀតណាម និងខេត្តនៅតំបន់មាត់សមុទ្រ ក្រសួងថា នឹងមានភ្លៀងធ្លាក់ពីបង្គួរទៅច្រើននិងរលកសមុទ្រខ្ពស់ៗ។
លោកនាយករដ្ឋមន្ត្រី ហ៊ុន សែន បានឱ្យដឹងក្នុងទំព័រហ្វេសប៊ុករបស់លោកថា ថវិកាដែលលោកទទួលបានពីសប្បុរសជននានាដែលបានចូលរួមជួយប្រជាជនក្នុងគ្រោះទឹកជំនន់ គិតមកដល់ម៉ោងជាង១២ថ្ងៃត្រង់ ថ្ងៃព្រហស្បតិ៍នេះ សរុបចំនួន ៥ ៨៤៨ ០០០ ដុល្លារ (ជាង៥លាន៥សែនដុល្លារ) និង ២០៤ លានរៀល៕
