អង្គការស្បៀង និងកសិកម្មនៃសហប្រជាជាតិ (FAO) អំពាវនាវឱ្យមានការផ្លាស់ប្តូរប្រព័ន្ធស្បៀងអាហារ ដើម្បីធានារបបអាហារប្រកបដោយសុខភាពក្នុងពេលមានវិបត្តិជំងឺកូវីដ១៩ ខណៈអង្គការនេះរកឃើញថា កុមារអាយុក្រោម៥ឆ្នាំប្រមាណ៤២% មានជំងឺក្រេះក្រិននិងស្គមស្គាំង។
សេចក្តីប្រកាសព័ត៌មានរបស់អង្គការ FAO ក្នុងទិវាស្បៀងអាហារពិភពលោក និងខួបទី៧៥របស់ខ្លួន នៅថ្ងៃទី១៦ ខែតុលា ឆ្នាំ២០២០នេះ អង្គការ FAO បានអំពាវនាវឱ្យមានការចូលរួមពីគ្រប់វិស័យ ដើម្បីធ្វើឱ្យប្រព័ន្ធស្បៀងអាហារកាន់តែរឹងមាំ មានភាពធន់ និងមាននិរន្តរភាព និងធានាថារបបអាហារប្រកបដោយសុខភាព ហើយប្រជាជនកម្ពុជាទាំងអស់មានលទ្ធភាពទទួលបាន ជាពិសេសសម្រាប់ជនងាយរងគ្រោះបំផុត។
អង្គការនេះ បានលើកឡើងថា៖ «យើងត្រូវតែផ្លាស់ប្តូររបៀបនៃការផលិត របៀបនៃការកែច្នៃ ការធ្វើអាជីវកម្ម និងរបៀបនៃការបរិភោគអាហារ ដើម្បីធានាថា យើងអាចបំពេញតម្រូវការរបស់យើងនាពេលអនាគត ដោយមិនខ្ជះខ្ជាយ មិនបំផ្លាញជីវចម្រុះ និងធនធានធម្មជាតិផ្សេងទៀតដែលយើងពឹងផ្អែកក្នុងការរស់នៅ»។
អង្គការ FAO បានឱ្យដឹងដែរថា នៅកម្ពុជា ទោះបីមានការរីកចម្រើនគួរឱ្យកត់សម្គាល់ ប៉ុន្តែកង្វះអាហារូបត្ថម្ភនៅជាក្តីបារម្ភ ដោយសារមានកុមារអាយុក្រោមប្រាំឆ្នាំប្រមាណ៣២ភាគរយ មានជំងឺក្រេះក្រិន និង១០ភាគរយផ្សេងទៀតមានបញ្ហាស្គមស្គាំង ខណៈពួកគេមានបញ្ហាកង្វះអាហារូបត្ថម្ភ កង្វះមីក្រូសារជាតិ ដែលអាចជាដើមហេតុប៉ះពាល់ដល់វ័យបន្តពូជ។
អង្គការបានបន្ថែមថា៖ «នៅប្រទេសកម្ពុជា ផលប៉ះពាល់នៃជំងឺកូវីដ១៩ទៅលើសេដ្ឋកិច្ចដែលបណ្តាលឱ្យមនុស្សជាច្រើនបានបាត់បង់ការងារឬប្រាក់ចំណូល ជាហេតុធ្វើឱ្យភាពទទួលបានស្បៀងអាហាររឹតតែលំបាកថែមទៀត ជាពិសេសសម្រាប់គ្រួសារដែលងាយរងគ្រោះ។ ជាការឆ្លើយតប រាជរដ្ឋាភិបាលកម្ពុជាបានដាក់ចេញនូវវិធានការណ៍គាំពារសង្គមបន្ថែមទៀត ដើម្បីដោះស្រាយបញ្ហាប្រឈមទាំងនេះ»។
តំណាងអង្គការ FAO ប្រចាំនៅកម្ពុជា លោក Alexandre Huynh មានប្រសាសន៍ថា៖ «ការធានាឱ្យទទួលបាននូវអាហារសុវត្ថិភាពនិងអាហារូបត្ថម្ភ គឺមានសារៈសំខាន់ណាស់ ហើយប្រការនេះ គឺចាំបាច់និងបន្តនៅតែចាំបាច់ក្នុងការឆ្លើយតបទៅនឹងវិបត្តិជំងឺកូវីដ១៩ ជាពិសេសសម្រាប់សហគមន៍ក្រីក្រនិងងាយរងគ្រោះ ដែលជាក្រុមទទួលរងផលប៉ះពាល់អវិជ្ជមានធ្ងន់ធ្ងរបំផុតដោយសារតែវិបត្តិមួយនេះ»។
នៅថ្ងៃសុក្រនេះ ក្រសួងកសិកម្ម រុក្ខាប្រមាញ់ និងនេសាទ ក្រោមកិច្ចសហការជាមួយអង្គការស្បៀង និងកសិកម្មនៃសហប្រជាជាតិ ក៏បានរៀបចំប្រារព្ធទិវាស្បៀងអាហារពិភពលោក ខួបលើកទី៤០ នៅខេត្តសៀមរាបផងដែរ ក្រោមប្រធានបទ «រួមគ្នាផលិតស្បៀងសម្រាប់មនុស្ស និងនិរន្តរភាពផែនដី»។
បើតាមរបាយការណ៍ស្តីពីស្ថានភាពសន្តិសុខស្បៀងនិងអាហារូបត្ថម្ភនៅក្នុងពិភពលោក ឆ្នាំ២០២០ មនុស្សប្រមាណជាង២ពាន់លាននាក់ គ្មានលទ្ធភាពទទួលបានអាហារគ្រប់គ្រាន់ មានសុវត្ថិភាព និងអាហារូបត្ថម្ភគ្រប់គ្រាន់ ខណៈមនុស្សជិត៧០០លាននាក់ផ្សេងទៀត ចូលគេងទាំងមានការស្រេកឃ្លាននៅទូទាំងពិភពលោក។
របាយការណ៍ដដែលបន្តថា ក្នុងបរិបទនៃការរីករាលដាលជំងឺកូវីដ១៩នេះ បានរុញច្រានឱ្យប្រជាជនប្រមាណ១៣០លាននាក់ផ្សេងទៀតនៅទូទាំងពិភពលោក ធ្លាក់ក្នុងភាពអត់ឃ្លាននៅចុងឆ្នាំនេះ៕