ក្រសួងកសិកម្ម អះអាងថា បើទោះជាមានការប្រឈមនឹងជំនន់ទឹកភ្លៀង បណ្តាលឱ្យប៉ះពាល់ដំណាំស្រូវជាង១៣ម៉ឺនហិកតានៅទូទាំងប្រទេស ប៉ុន្តែមិនបានធ្វើឱ្យកម្ពុជាខ្វះស្បៀងនិងប៉ះពាល់ដល់ការនាំចេញអង្ករទៅក្រៅប្រទេសនៅឡើយទេ។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា ចាប់ពីថ្ងៃទី១ ខែកញ្ញា មកដល់ព្រឹកថ្ងៃទី១៦ ខែតុលា ឆ្នាំ២០២០នេះ ជំនន់ទឹកភ្លៀងបានបង្កឱ្យមានផលប៉ះពាល់ដល់រាជធានី-ខេត្តចំនួន១៩ ក្នុងនោះប៉ះពាល់ដំណាំស្រូវប្រមាណ១៣៧ ១៦០ហិកតា ហើយស្រូវដែលរងការខូចខាតទាំងស្រុង ចំនួន៧ ៥៧០ហិកតា ខណៈដំណាំរួមផ្សំជិត៧ម៉ឺនហិកតា បានរងការជន់លិច។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន មានប្រសាសន៍ប្រាប់វីអូឌីនៅថ្ងៃសុក្រនេះ បច្ចុប្បន្ន ខេត្តដែលរងផលប៉ះពាល់ដំណាំស្រូវខ្លាំងជាងគេ គឺខេត្តបាត់ដំបង និងបន្ទាយមានជ័យ។ លោកបន្តថា ជារៀងឆ្នាំ រដ្ឋាភិបាលបានត្រៀមគ្រាប់ពូជស្រូវប្រហែល២ ០០០តោន សម្រាប់ផ្ដល់ជូនដល់កសិករដែលរងផលប៉ះពាល់ដោយទឹកជំនន់។
លោកបន្តថា៖ «យើងដឹងហើយ ប៉ះពាល់ជារៀងរាល់ឆ្នាំ ផលប៉ះពាល់វាអាចកើនឡើងដល់កម្រិតមួយ ១០ភាគរយ រាំងស្ងួតនិងទឹកជំនន់។ អ៊ីចឹងយើងបានត្រៀមរហូតមក ប្រចាំ២ ០០០តោន ឥលូវនៅសល់១ ៨០០តោន ហើយពូជដែលប្រើប្រាស់បាន១ ៧០០តោន អ៊ីចឹងអាចសមស្របជួយដល់កសិករបាន ខ្លាចតែការខូចខាតកើនឡើងកម្រិតខ្ពស់មួយដែលយើងត្រូវរកពូជបន្ថែមទៀត»។
លោករដ្ឋមន្ត្រីបានបញ្ជាក់ថា ទោះបីជាឆ្នាំនេះជំនន់ទឹកភ្លៀងបានជន់លិចដល់ដំណាំស្រូវកសិករ ប៉ុន្តែលោកថា នឹងមិនធ្វើឱ្យកម្ពុជាខ្វះស្បៀងនិងប៉ះពាល់ការនាំអង្ករចេញទៅក្រៅប្រទេសនោះទេ ដោយសារកម្ពុជាផលិតស្រូវសល់ជាង៥លានតោនជារៀងរាល់ឆ្នាំ។
កសិកររស់នៅស្រុកថ្មគោល ខេត្តបាត់ដំបង លោក អាន់ វី និយាយថា ស្រូវរបស់គាត់ជាច្រើនហិកតាបានរងនូវការជន់លិច ដែលធ្វើឱ្យប៉ះពាល់ដល់ជីវភាពគ្រួសារយ៉ាងខ្លាំង ខណៈគ្រួសារគាត់បានខ្ចីលុយពីធនាគារចំនួន២ម៉ឺនដុល្លារដើម្បីទិញដីសម្រាប់ធ្វើស្រែយកស្រូវលក់។
លោកថា៖ «ខ្ញុំគិតថា ធ្វើស្រែ៤ទៅ១០ហិកតា នឹងអាចរត់រួច ដល់អ៊ីចឹងស្លាប់ហើយ។ ឆ្នាំនេះ រាំងសឹងតែដាច់៤ទៅ៥ខែ ហើយឥលូវចំទឹកជំនន់ទៀត ហើយក្នុង១ហិកតា៤០បាវ ស្មើនឹង៣ទៅ៤តោន ប៉ុន្តែឥលូវនេះចប់ហើយ»។
ករណីនេះ លោកស្នើទៅរដ្ឋាភិបាលជួយអន្តរាគមន៍ ដោយផ្ដល់ពូជស្រូវដល់ពួកគេដែលរងផលប៉ះពាល់ដោយសារទឹកជំនន់។
ចំណែកកសិករម្នាក់ទៀតនៅស្រុកថ្មគោល ខេត្តបាត់ដំបង ដែរនោះ លោក យឿម សូរ និយាយថា ស្រូវរបស់គាត់ដែលទុំជិតបានច្រូតទំហំ៦០ហិកតា ត្រូវបានទឹកជន់លិចអស់ចាប់តាំងពីថ្ងៃទី៨ ខែតុលា ហើយស្រូវប្រហែលជិត៥០ហិកតាទៀតដែលទើបនឹងរៀបឱនដាក់គ្រាប់ ក៏កំពុងប្រឈមនឹងទឹកជន់លិចផងដែរ។
លោកថា៖ «ឆ្នាំក្រោយប្រហែលអស់ពូជ អត់មានអីធ្វើពូជសម្រាប់ឆ្នាំក្រោយទេ ព្រោះឆ្នាំនេះ តំបន់ខ្ញុំវាធ្វើអត់កើតទេ ធ្វើបានតែម្ដងទេ កាលណាទឹកស្រក វាអត់មានប្រភពទឹកមកទេ»។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា ការខូចខាតដំណាំស្រូវនេះ បានជះឥទ្ធិពលដល់ជីវភាពរបស់ប្រជាកសិករ ខណៈការរស់នៅរបស់ពួកគាត់ពឹងអាស្រ័យលើការធ្វើកសិកម្ម។ ករណីនេះ លោកបានស្នើទៅរដ្ឋាភិបាលជួយដល់ប្រជាកសិករក្នុងការផ្តល់គ្រាប់ពូជ និងអន្តរាគមន៍ទៅគ្រឹះស្ថានមីក្រូហិរញ្ញវត្ថុនិងធនាគារដើម្បីឱ្យពួកគេពន្យារពេលបង់ប្រាក់។
លោកថា៖ «រដ្ឋត្រូវគិតគូរគ្រាប់ពូជ បច្ចេកទេសដាំដំណាំ ជួយដល់កសិករ ទី២ ត្រូវអន្តរាគមន៍ទៅគ្រឹះស្ថានហិរញ្ញវត្ថុ ដើម្បីធ្វើយ៉ាងណាឱ្យពួកគាត់ពន្យារការបង់ទាំងការប្រាក់ ទាំងដើម ព្រោះថា គ្មាននរណាម្នាក់ចង់ប្រឈមទៅនឹងគ្រោះមហន្តរាយទេ ដូច្នេះធ្វើយ៉ាងម៉េចដើម្បីជំរុញឱ្យស្ថាប័នទាំងអស់យោគយល់ហើយពន្យារការបង់»។
ក្នុងពេលចុះជួបសួរសុខទុក្ខប្រជាពលរដ្ឋរងគ្រោះដោយជំនន់ទឹកភ្លៀងនៅខណ្ឌដង្កោ រាជធានីភ្នំពេញ កាលពីថ្ងៃម្សិលមិញ លោកនាយករដ្ឋមន្ត្រី ហ៊ុន សែន បានថ្លែងថា ជំនន់ទឹកភ្លៀងបានបង្កឱ្យមានផលប៉ះពាល់ជាច្រើនដល់ប្រជាពលរដ្ឋ ជាពិសេសប៉ះពាល់ដល់ដំណាំស្រូវនិងដំណាំកសិកម្មផ្សេងៗ។ លោកថា ករណីនេះ រាជរដ្ឋាភិបាលនឹងពិនិត្យលើការស្តារឡើងវិញនូវវិស័យកសិកម្ម ដើម្បីស្តារជីវភាពរបស់ប្រជាពលរដ្ឋដែលរងផលប៉ះពាល់ដោយជំនន់ទឹកភ្លៀងនេះ៕
