ក្រសួងការងារ និងបណ្តុះបណ្តាលវិជ្ជាជីវៈ ណែនាំដល់ម្ចាស់រោងចក្រសហគ្រាសនិងកម្មករឱ្យមានការប្រុងប្រយ័ត្នខ្ពស់ចំពោះគ្រោះជំនន់ទឹកភ្លៀង ខណៈរាជធានីភ្នំពេញនិងបណ្តាខេត្តមួយចំនួនកំពុងរងការជន់លិច។
ក្រសួងការងារបានចេញសេចក្តីណែនាំមួយកាលពីថ្ងៃម្សិលមិញ ឱ្យម្ចាស់រោងចក្រសហគ្រាស តាមដានជាប្រចាំនូវការព្យាករអាកាសធាតុ សហការ និងគោរពតាមការណែនាំរបស់អាជ្ញាធរ និងត្រូវផ្អាកសង្វាក់ផលិតកម្មជាបណ្តោះអាសន្ន ក្នុងករណីមានទឹកជន់លិចខ្លាំងមិនអាចរក្សាសុវត្ថិភាពបាន។
ក្រសួងក៏បានស្នើឱ្យមានការពិនិត្យប្រព័ន្ធអគ្គិសនីឬបិទចរន្តជាបណ្តោះអាសន្នភា្លមផងដែរ ក្នុងករណីទឹកហូរចូលអគារផលិតកម្មនិងបរិវេណរោងចក្រ។ ចំពោះកន្លែងដែលមានស្តុកទុកសារធាតុគីមី គឺត្រូវមានការប្រុងប្រយ័ត្នខ្ពស់និងត្រូវបិទធុងរក្សាសារធាតុគីមីឱ្យបានជិតល្អ ដើម្បីចៀសវាងការលេចធ្លាយដែលធ្វើឱ្យប៉ះពាល់ដល់សុខភាពកម្មករនិងប្រជាពលរដ្ឋ។
ចំណែកកម្មករវិញ ក្រសួងបានណែនាំឱ្យសហការជាមួយម្ចាស់រោងចក្រ ក្នុងការទប់ស្កាត់ការហូរចូលនៃជំនន់ទឹកភ្លៀងទៅក្នុងអគារផលិតកម្មនិងបរិវេណរោងចក្រ និងគោរពតាមការចាត់ចែងរបស់អ្នកគ្រប់គ្រងរោងចក្រពាក់ព័ន្ធវិធានការសុវត្ថិភាព ហើយត្រូវនៅឱ្យឆ្ងាយពីប្រភពឬខ្សែដែលចម្លងចរន្តអគ្គិសនី។
វីអូឌី បានសុំការបញ្ជាក់បន្ថែមពីអ្នកនាំពាក្យក្រសួងការងារ លោក ហេង សួរ និងខាងសមាគមរោងចក្រកាត់ដេរនៅកម្ពុជា (GMAC) ដែរ ពាក់ព័ន្ធករណីនេះ ប៉ុន្តែពុំមានការឆ្លើយតប។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា តាមព័ត៌មានដែលលោកទទួលបាន គឺមានរោងចក្រច្រើននៅរាជធានីភ្នំពេញដែលត្រូវទឹកជន់លិច។
លោកបន្តថា៖ «អ្វីដែលយើងបារម្ភ យើងបារម្ភខ្លាចកម្មករឆក់ [ចរន្តអគ្គិសនី] ព្រោះពេលកន្លងមក ពេលភ្លៀង ពេលទឹកជន់អីចឹង កម្មករមានឆក់។ អីចឹងអ្វីដែលយើងស្នើ គឺម្ចាស់ក្រុមហ៊ុនហ្នឹង បើរោងចក្ររបស់ខ្លួនលិចឬសើមដែលអាចឆក់ មិនគួរឱ្យកម្មករធ្វើការទេ។ កម្មករផ្នែកខ្លះ ដែលគេឱ្យធ្វើការលំបាកៗ គឺគ្រោះថ្នាក់ណាស់។ ហើយករណីរោងចក្រខ្លះឱ្យពួកគាត់ជួយបាចទឹកចេញអីហ្នឹង គឺមិនត្រូវហ្មង»។
របាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយចេញផ្សាយនៅថ្ងៃសុក្រនេះ បានឱ្យដឹងថា គិតចាប់ពីថ្ងៃទី១ ខែកញ្ញា ដល់ព្រឹកថ្ងៃទី១៦ ខែតុលា ឆ្នាំ២០២០ ជំនន់ទឹកភ្លៀងបានប៉ះពាល់ដល់រាជធានី-ខេត្តចំនួន១៩។
បើតាមអភិបាលរាជធានីភ្នំពេញ លោក ឃួង ស្រេង មានប្រសាសន៍កាលពីម្សិលមិញថា បញ្ហាគ្រោះទឹកជំនន់ប៉ុន្មានថ្ងៃមកនេះ បណ្តាលឱ្យសង្កាត់ចំនួន៦ ក្នុងខណ្ឌដង្កោ រាជធានីភ្នំពេញ បានរងផលប៉ះពាល់ខ្លាំង៕
