អតីតបុគ្គលិកវិទ្យុអាស៊ីសេរីពីររូប អះអាងថា ការបើកការស៊ើបអង្កេតឡើងវិញរបស់ចៅក្រមសាលាដំបូងរាជធានីភ្នំពេញដោយមិនកំណត់ពេលវេលា បានធ្វើឱ្យប៉ះពាល់សិទ្ធិសេរីភាពរបស់ពួកគាត់។
ការអះអាងនេះ ធ្វើឡើងនៅចំពោះមុខអង្គជំនុំជម្រះនៃតុលាការកំពូលក្នុងសវនាការបណ្ដឹងសារទុក្ខអតីតបុគ្គលិកវិទ្យុអាស៊ីសេរី ដែលប្ដឹងប្រឆាំងនឹងការសម្រេចសាលាដំបូង និងសាលាឧទ្ធរណ៍រាជធានីភ្នំពេញ ដែលឱ្យបើកការស៊ើបអង្កេតលើសំណុំរឿងចារកម្មឱ្យរដ្ឋបរទេស ឬប្រគល់ឱ្យរដ្ឋបរទេសបង្កអន្តរាយដល់ការការពារជាតិឡើងវិញ។
មេធាវីការពារក្ដីឱ្យលោក អ៊ួន ឈិន និង យាង សុធារិន្ទ គឺលោក សំ ចំរើន បានប្រាប់ទៅចៅក្រមថា ក្នុងដំណើរការស៊ើបអង្កេតរហូតដល់សវនាការជំនុំជម្រះ តុលាការថ្នាក់ក្រោមមិនបានប្រាប់ពីឧបសគ្គនៃការស៊ើបអង្កេតឬខ្វះភស្តុតាងឡើយ ប៉ុន្តែដល់ថ្ងៃប្រកាសសាលក្រម តុលាការបែរជាសម្រេចឱ្យបើកការស៊ើបអង្កេតសំណុំរឿងនេះឡើងវិញ។
មេធាវីរូបនេះចាត់ទុកការសម្រេចសេចក្ដីតុលាការថ្នាក់ក្រោមដែលបើកការស៊ើបអង្កេតឡើងវិញ ដោយលើកហេតុផលខ្វះភស្តុតាងថា មិនបានផ្ដល់យុត្តិធម៌ឱ្យកូនក្ដីរបស់លោក។
ឈរក្នុងរង្វង់ក្រចកសេះ អតីតបុគ្គលិកវិទ្យុអាស៊ីសេរី លោក អ៊ួន ឈិន បានស្នើទៅតុលាការកំពូលច្រានចោលសេចក្ដីសម្រេចរបស់ឧទ្ធរណ៍ និងសាលាដំបូងរាជធានីភំ្នពេញវិញ។
ក្នុងបន្ទប់សវនាការនោះដែរ អតីតបុគ្គលិកវិទ្យុអាស៊ីសេរីម្នាក់ទៀត លោក យាង សុធារិន្ទ ក៏បានលើកឡើងដែរថា ការបើកការស៊ើបអង្កេតឡើងវិញដោយមិនកំណត់ពេលវេលា បានធ្វើឱ្យប៉ះពាល់សិទ្ធិសេរីភាពរបស់ពួកគាត់។
ក្រៅពីលើកឡើងប៉ះពាល់សិទ្ធិ លោក សុធារិន្ទ និយាយថា នៅពេលបិទវិទ្យុអាស៊ីសេរី លោកបានផ្ញើអត្ថបទចំនួន២ទៅឱ្យអាស៊ីសេរី ប៉ុន្តែអត្ថបទនោះ លោកថា មិនបានបង្កផលប៉ះពាល់ដល់ប្រទេសជាតិដូចតុលាការចោទប្រកាន់ឡើយ។
ទោះបីជាយ៉ាងណា ការលើកឡើងនេះ ត្រូវបានប្រធានក្រុមប្រឹក្សាជំនុំជម្រះនៃតុលាការកំពូល លោក និល ណុន និយាយកាត់ថា ការឱ្យបើកការស៊ើបអង្កេតវិញរបស់តុលាការថ្នាក់ក្រោម គឺធ្វើឡើងដើម្បីស្វែងរកការពិតតែប៉ុណ្ណោះ។
លោក និល ណុន ថ្លែងថា៖ «មិនមែនតែសាលាឧទ្ធរណ៍និងសាលាដំបូងទេ តុលាការកំពូលក៏សម្រេចញឹកញាប់ដែរ [ចាត់របៀបដោយឱ្យបើកការស៊ើបអង្កេត]។ ការស៊ើបអង្កេតឡើងវិញ ដោយសារមានការសង្ស័យ [អ៊ីចឹងចៅក្រម] ចាត់របៀបឱ្យស៊ើបអង្កេតឡើងវិញហើយ ដើម្បីស្វែងរកការពិត»។
បន្ទាប់ពីសវនាការដេញដោល លោក និល ណុន បានសម្រេចលើកពេលប្រកាសសាលដីកាទៅថ្ងៃទី២៧ ខែតុលាខាងមុខ។
ប្រាប់អ្នកសារព័ត៌មាននៅក្រៅរបងតុលាការ លោក យាង សុធារិន្ទ និយាយថា រយៈពេលជិត២ឆ្នាំនៃការស៊ើបអង្កេត និងបញ្ជូនសំណុំរឿងរបស់ពួកគាត់ទៅជំនុំជម្រះ ចៅក្រមសាលាដំបូងរាជធានីភ្នំពេញ មិនបានប្រាប់ពីឧបសគ្គនៃដំណើរការស៊ើបអង្កេតឡើយ ប៉ុន្តែនៅថ្ងៃសម្រេចចុងក្រោយ បែរជាប្រកាសថា ខ្វះភស្តុតាងទៅវិញ។ លោកចាត់ទុកការសម្រេចឱ្យបើកការស៊ើបអង្កេតសំណុំរឿងពួកគាត់ឡើងវិញថា ជារឿងនយោបាយ។
លោក យាង សុធារិន្ទ និយាយថា៖ «សាលក្រមស៊ើបអង្កេតឡើងវិញ អត់មានកំណត់ពេលវេលាជាក់លាក់ផង។ ពេលវេលាយើងមិនដឹងប៉ុន្មានឆ្នាំ? ៥ឆ្នាំ ឬ ១០ឆ្នាំ ចេះតែបន្តអ៊ីចឹង ពួកខ្ញុំរស់នៅយ៉ាងម៉េច។ សំខាន់មួយទៀត ពួកខ្ញុំបាត់បង់សេរីភាពទាំងស្រុងនៅពេលនេះ ហើយមិនបានបញ្ជាក់ការស៊ើបអង្កេតនៅពេលណាត្រូវបញ្ចប់ទេ។ ខ្ញុំបញ្ជាក់នៅក្នុងតុលាការ រយៈពេលស៊ើបអង្កេតវាច្រើនណាស់ ហើយឧបករណ៍ដែលចាប់ទៅពីបន្ទប់របស់លោក អ៊ួន ឈិន គ្រប់គ្រាន់ហើយ»។
លោក អ៊ួន ឈិន និយាយថា ពួកគាត់ចង់ឱ្យតុលាការកំពូលទម្លាក់ចោលបទចោទប្រកាន់ ហើយផ្ដល់សេរីភាពដល់ពួកគាត់វិញ។
លោក អ៊ួន ឈិន និយាយថា៖ «ការបន្តនីតិវិធីរបៀបហ្នឹង មិនដឹងពេលណា! អ៊ីចឹងហើយបានយើងសំណូមពរ យើងជំរុញឱ្យតុលាការពន្លឿនីតិវិធី ដើម្បីបញ្ចប់រឿងរ៉ាវពួកយើងឱ្យបានឆាប់ ដើម្បីឱ្យពួកយើងមានសេរីភាពពេញលេញ ជាពលរដ្ឋដូចគេដូចឯង មានលទ្ធភាពចិញ្ចឹមគ្រួសារ នាំកូនទៅរៀនទៅសូត្រអីឱ្យច្បាស់លាស់។ រាល់ថ្ងៃនេះ យើងរស់នៅគ្មានលំនឹងផ្លូវចិត្ត»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត ដែលបានចូលស្ដាប់សវនាការនាថ្ងៃនេះ ចាត់ទុកការសម្រេចរបស់តុលាការថ្នាក់ក្រោមដែលឱ្យបើកការស៊ើបអង្កេតឡើងវិញ បង្ហាញឱ្យឃើញថា រយៈពេលស៊ើបអង្កេតកន្លងមក មិនមានភស្តុតាងគ្រប់គ្រាន់សម្រាប់ចោទប្រកាន់លើអតីតបុគ្គលិកវិទ្យុអាស៊ីសេរីទាំងពីរនាក់ទេ។
លោក អំ សំអាត ប្រាប់ថា៖ «ភស្តុតាងអត់មានគ្រប់គ្រាន់ទេ សម្រាប់ចោទប្រកាន់ ផ្តន្ទាទោសអ្នកទាំងពីរ បានចាត់របៀបឱ្យមានមន្ទិលសង្ស័យរកបន្ថែមទៀត។ អ៊ីចឹង ខ្ញុំគិតថា ដើម្បីឱ្យអ្នកទាំងពីរមានសេរីភាពពេញលេញ ធ្វើយ៉ាងម៉េចតាមសំណូមពរមេធាវីអ្នកទាំងពីរ បដិសេធសាលក្រមចាត់របៀប ឬក៏ជំនុំជម្រះឡើងវិញឱ្យបានឆាប់ ដើម្បីផ្ដល់យុតិ្តធម៌ដល់អ្នកទាំងពីរ វាជារឿងមួយល្អ ដើម្បីកុំឱ្យមានការអូសបន្លាយ»។
លោក អ៊ួន ឈិន និងលោក យាង សុធារិន្ទ ត្រូវបានអាជ្ញាធរចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧ ហើយក្រោយមក ត្រូវបញ្ជូនខ្លួនទៅដាក់ឃុំក្រោមការចោទប្រកាន់ថា បានធ្វើចារកម្មឱ្យរដ្ឋបរទេស ហើយក្រោយមក ត្រូវបានចោទប្រកាន់មួយករណីទៀតពីបទផលិតនិងកាន់កាប់រូបភាពអាសអាភាស។
អ្នកទាំងពីរត្រូវបានដោះលែងឱ្យស្ថិតនៅក្រៅឃុំបណ្ដោះអាសន្ន និងដាក់ឱ្យស្ថិតក្រោមការត្រួតពិនិត្យតាមផ្លូវតុលាការចាប់តាំងពីខែសីហា ឆ្នាំ២០១៨៕
