ក្រសួងបរិស្ថាន និងអង្គការសមាគមអភិរក្សសត្វព្រៃនៅកម្ពុជា (WCS) រកឃើញថា ក្នុងរយៈពេល១០ឆ្នាំចុងក្រោយនេះ សត្វព្រៃដែលជិតផុតពូជចំនួន១៣ប្រភេទ បន្តមានវត្តមានក្នុងដែនជម្រកសត្វព្រៃកែវសីមា ប៉ុន្តែប្រភេទសត្វខ្លះមានការថយចុះដោយសារការដាក់អន្ទាក់។
អ្នកនាំពាក្យក្រសួងបរិស្ថាន លោក នេត្រ ភក្ត្រា មានប្រសាសន៍ក្នុងសន្និសីទសារព័ត៌មាននៅទីស្តីការក្រសួង នៅថ្ងៃចន្ទនេះថា សត្វព្រៃដែលជិតផុតពូជបំផុត ជិតផុតពូជ និងជាប្រភេទកំពុងទទួលរងការគំរាមកំហែង ចំនួន១៣ប្រភេទ បន្តមានវត្តមាននៅក្នុងដែនជម្រកសត្វព្រៃកែវសីមា រួមមាន ស្វាកន្ទុយស, ទោចថ្ពាល់លឿង, ស្វាព្រាម, ស្វាក្តាម, ស្វាត្រោស, ស្វាអង្កត់, សត្វក្ងោក, ជ្រូកព្រៃ, ឈ្លូស, ទន្សោង, ខ្ទីង, រមាំង និងប្រើស។
លោក នេត្រ ភក្ត្រា ថ្លែងថា៖ «សត្វមួយចំនួនដែលមានការថយចុះ ដូចជា ស្វាអង្កត់ ស្វាព្រាម ជាដើម ដោយសារប្រភេទសត្វនេះរកស៊ីនៅលើដី ហើយប្រភេទសត្វដែលមានជើងចម្ពាម មានសត្វខ្ចីង ទន្សោង ប្រើស រមាំង ដែលរកស៊ីលើដី មានការថយចុះ ហេតុអីបានថយចុះ គឺដោយសារការប្រើប្រាស់អន្ទាក់»។
អ្នកនាំពាក្យរូបនេះ ក៏បានឱ្យកម្លាំងសមត្ថកិច្ចពាក់ព័ន្ធ អង្គការដៃគូ និងប្រជាពលរដ្ឋ រួមគ្នាថែរក្សានិងការពារអភិរក្សសត្វព្រៃកម្រទាំងអស់នេះឱ្យបាន ជាពិសេសទប់ស្កាត់និងបង្ក្រាបបទល្មើសធនធានធម្មជាតិ និងបង្ក្រាបការទន្ទ្រានកាន់កាប់ដីព្រៃដោយខុសច្បាប់ ដែលសកម្មភាពទាំងនេះ បានបំផ្លិចបំផ្លាញជម្រកដ៏សុខសាន្តរបស់សត្វព្រៃនិងជីវចម្រុះផ្សេងទៀត។
ទីប្រឹក្សាបច្ចេកទេសនៃអង្គការ WCS លោក អូលី ហ្គ្រីហ្វ៊ីន (Olly Griffin) មានប្រសាសន៍ថា អង្គការ WCS គ្រោងសហការជាមួយរដ្ឋាភិបាល ធ្វើការបង្កាត់ពូជសត្វព្រៃមួយចំនួនដែលកំពុងជិតផុតពូជនិងងាយរងគ្រោះ ដើម្បីស្រោចស្រង់ចំនួនសត្វទាំងនោះឱ្យមានភាពប្រសើរឡើងវិញ។
លោកថា៖ «ដើម្បីស្រោចស្រង់នូវប្រភេទសត្វមួយចំនួន យើងគិតថា ទី១ យើងអាចរក្សាតំបន់មួយឱ្យបានច្បាស់លាស់ ការបង្កើនមន្ត្រីឧទ្យានុរក្ស ការអនុវត្តច្បាប់ប្រកបដោយប្រសិទ្ធភាព ហើយអនុវត្តវិធីសាស្ត្រថ្មីផ្សេងៗទៀត។ ការស្រោចស្រង់សត្វសំខាន់ៗឡើងវិញ យើងអាចបង្កើតកម្មវិធីបង្កាត់ពូជឬក៏បង្កាត់ពូជតាមវិធីថ្លោះរបង នៅក្នុងព្រៃធម្មជាតិសំខាន់ណាមួយដែលស្ថិតនៅក្នុងតំបន់ដែនជម្រកសត្វព្រៃកែវសីមាតែម្ដង»។
អគ្គនាយករដ្ឋបាលនិងអភិរក្សធនធានធម្មជាតិនៃក្រសួងបរិស្ថាន លោក គឹម ណុង មានប្រសាសន៍ថា បច្ចុប្បន្ន ក្រសួងកំពុងធ្វើការសិក្សាទីតាំងដែលជាតំបន់អភិរក្ស ដើម្បីយកធ្វើជាកន្លែងបង្កាត់សត្វព្រៃដែលជិតផុតពូជនិងងាយរងគ្រោះ។
លោកថា៖ «ទាក់ទងនឹងការបង្កាត់ពូជនេះ ឥលូវយើងកំពុងសិក្សាបន្ថែមអំពីទីតាំងមួយចំនួនដែលមាននៅក្នុងតំបន់ការពារធម្មជាតិយើង ដូចឯកឧត្ដមរដ្ឋលេខាធិការបានជម្រាបជូនហើយ យើងមានតំបន់ការពារជាតិយើង៦៥ ហើយរបៀង៣ទៀត ហើយយើងមានទីតាំងធំៗជាច្រើន»។
បើតាមអ្នកនាំពាក្យក្រសួងបរិស្ថាន ដែនជម្រកសត្វព្រៃកែវសីមា ត្រូវបានដាក់ឱ្យស្ថិតនៅក្រោមការការពារនិងអភិរក្សរបស់ក្រសួងបរិស្ថាន កាលពីខែឧសភា ឆ្នាំ២០១៦ ដែលមានផ្ទៃដីចំនួន២៩២ ៦៨០ហិកតា ស្ថិតនៅក្នុងខេត្តមណ្ឌលគិរី និងក្រចេះ។
លោកបន្ថែមថា ដែនជម្រកសត្វព្រៃកែវសីមា គឺជាតំបន់ការពារធម្មជាតិមានសារៈសំខាន់កម្រិតអន្តរជាតិ នៅក្នុងការអភិរក្សសត្វព្រៃនិងជីវចម្រុះប្រមាណ១ ០០០ប្រភេទដែលកំពុងមានវត្តមាននៅទីនោះ៕
