កម្មកររោងចក្រ ឌីកនើធី នីតធើរ លីមីតធីត (Dignity Knitter Limited) និងរោងចក្រ អ៊ីខូបេស ស្ថិតក្នុងសង្កាត់សិត្បូ ក្រុងតាខ្មៅ ខេត្តកណ្តាល បានស្វែងរកដំណោះស្រាយវិវាទការងារ ពីតុលាការសាលាឧទ្ធរណ៍ ខណៈពួកគេបានតវ៉ានិងដេកយាមមុខរោងចក្រជិត១ឆ្នាំ។
លោក ភិន សុភា អះអាងជាតំណាងកម្មករនៅរោងចក្រ ឌីកនើធី និងអ៊ីខូបេស ប្រាប់វីអូឌីនៅថ្ងៃចន្ទនេះថា វិវាទការងារនៅរោងចក្រទាំងពីរនេះមិនទាន់បានដោះស្រាយចប់នៅឡើយទេ ខណៈក្រុមកម្មករបានផ្ទុះការតវ៉ានិងដាក់វេនគ្នាដេកយាមមុខរោងចក្រ តាំងពីខែវិច្ឆិកា ឆ្នាំ២០១៩។
តំណាងកម្មកររូបនេះ ឱ្យដឹងទៀតថា កាលពីខែមេសា ក្រុមកម្មករបានដាក់បណ្តឹងមួយទៅសាលាដំបូងខេត្តកណ្តាល សុំលក់ឡាុឡុងសម្ភាររបស់រោងចក្រ ក្រោយគ្មានដំណោះស្រាយពីអាជ្ញាធរពាក់ព័ន្ធ ប៉ុន្តែភាគីក្រុមហ៊ុនបានប្តឹងជំទាស់ក្រោមហេតុផលក្ស័យធន។
លោកបន្តថា នៅថ្ងៃទី២៦ ខែតុលានេះ តំណាងកម្មករបានដាក់បណ្តឹងសារទុក្ខទៅសាលាឧទ្ធរណ៍ ដើម្បីសុំឱ្យលុបចោលឬបិទចោលសំណុំរឿងក្ស័យធនរបស់ក្រុមហ៊ុន។
លោកបន្ថែមថា៖ «ឥលូវពួកខ្ញុំជាកម្មករហ្នឹង រៀបចំទៅតាមនីតិវិធី ក៏ដូចជាស្នាមមេដៃប្តឹងសារទុក្ខចំពោះនីតិវិធីក្ស័យធនរបស់ខាងក្រុមហ៊ុន ដើម្បីឱ្យតុលាការខេត្តកណ្តាល គាត់មានលទ្ធភាពជំរុញនីតិវិធីរបស់ពួកខ្ញុំ រឿងលក់ហ្នឹង ឱ្យឆាប់ចប់ ដើម្បីបានលុយបើកឱ្យកម្មករ»។
តំណាងកម្មករម្នាក់ទៀត អ្នកស្រី យស ថាវី ឱ្យដឹងថា ការតវ៉ាកន្លងមក ភាគីក្រុមហ៊ុនធ្លាប់ព្រមព្រៀងផ្តល់សំណងជូនកម្មករចំនួន៤ចំណុច ប៉ុន្តែភាគីក្រុមហ៊ុនមិនដែលអនុវត្តបាននូវកិច្ចព្រមព្រៀងនោះឡើយ។
អ្នកស្រីបន្ថែមថា៖ «យើងជួបផលលំបាក មហាសែនពិបាក។ ពួកខ្ញុំត្រូវយាមទាំងយប់ទាំងថ្ងៃ ហាលភ្លៀងហាលថ្ងៃ ពួកខ្ញុំអត់បានគេងគ្រប់គ្រាន់។ យើងយាមភាគច្រើនជាស្ត្រី អញ្ចឹងពេលយប់ យើងមានហានិភ័យច្រើនណាស់។ ទី១ យើងខ្លាចអ្នកញៀនថ្នាំមកធ្វើបាប និងបារម្ភសុវត្ថិភាពចំពោះការបើកបររបស់គេតាមដងផ្លូវមកប៉ះដល់ពួកខ្ញុំ។ រឿងមួយទៀត ការខ្វះខាតជីវភាពគ្រួសារនិងគ្មានលុយបង់សងបំណុលធនាគារ ជាដើម»។
វីអូឌីមិនអាចសុំការឆ្លើយតបពីភាគីរោងចក្របានទេនៅថ្ងៃចន្ទនេះ។
មន្ត្រីក្រសួងការងារ និងបណ្តុះបណ្តាលវិជ្ជាវីវៈ លោក អ៊ូ រតនា មានប្រសាសន៍ថា វិវាទការងាររបស់រោងចក្រទាំងពីរនោះ បានបញ្ជូនទៅដោះស្រាយតាមនីតិវិធីហើយ។ លោកថា ការសម្រេចយ៉ាងណានោះ គឺស្ថិតនៅលើតុលាការ។
លោកបន្ថែមថា៖ «យើងបានបញ្ជូនរឿងហ្នឹងទៅតុលាការ ហើយការសម្រេចអីធ្វើឡើងទៅតាមផ្លូវច្បាប់»។
មន្រ្តីផ្នែកច្បាប់ និងដោះស្រាយវិវាទនៅសម្ព័ន្ធសហជីពស៊ីខៅឌូ លោក ស៊ាង យ៉ូត បានឱ្យដឹងថា បណ្តឹងដែលក្រុមកម្មករដាក់ទៅសាលាដំបូង គឺទាមទារដោះស្រាយសំណងចំនួន៥ចំណុច រួមមាន ប្រាក់ជួសឱ្យការជូនដំណឹងមុន ប្រាក់អតីតភាពការងារ ប្រាក់សំណងជំងឺចិត្ត ប្រាក់បំណាច់ឆ្នាំ និងប្រាក់ឈ្នួលចុងក្រោយ។ លោកថា តុលាការក៏បានចេញដីការក្សាការពារទ្រព្យសម្បត្តិរបស់ក្រុមហ៊ុនរួចហើយដែរ។
លោកបន្ថែមថា៖ «ឥលូវតុលាការខេត្តកណ្តាល គាត់បានដីការក្សាការពារ ហើយយើងបានស្នើសុំអនុវត្ត ហើយបានរឹបអូសទ្រព្យសម្បត្តិអស់ហើយ នៅតែត្រៀមនីតិវិធីលក់ទេ»។
បើតាមលោក ស៊ាង យ៉ូត រោងចក្រ ឌីកនើធី នីតធើរ លីមីតធីត និងរោងចក្រ អ៊ីខូបេស មានថៅកែតែមួយ និងមានបញ្ហាបើកប្រាក់ឈ្នួលឱ្យមិនទៀងទាត់តាំងពីចុងឆ្នាំ២០១៩ ហើយប្រកាសបិទទ្វាររោងចក្រ កាលពីខែមេសា ឆ្នាំ២០២០។ លោកបន្តថា រោងចក្រទាំងពីរនេះ មានកម្មករសរុប១ ២២៣នាក់ និងសំណងដែលថៅកែជំពាក់កម្មករប្រមាណជាង១លាន១៦ម៉ឺនដុល្លារ៕
