របាយការណ៍ បង្ហាញថា អ្នកស្លាប់ដោយសារគ្រោះមហន្តរាយជំនន់ទឹកភ្លៀងនៅកម្ពុជា បានកើនដល់ ៤៣នាក់ ខណៈជ្រលងវិសម្ពាធ និងសម្ពាធទាបព្យុះទី១៨ ឈ្មោះ ម៉ូឡាវ (Molave) អាចនឹងមានឥទ្ធិពលមកលើប្រទេសកម្ពុជានៅថ្ងៃទី២៨ និង២៩ខែតុលា។
របាយការណ៍គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា គិតចាប់ពីថ្ងៃទី០១ ខែកញ្ញា ដល់ថ្ងៃទី២៦ ខែតុលា ឆ្នាំ២០២០ រាជធានី-ខេត្តចំនួន២០ របស់កម្ពុជា បានរងការប៉ះពាល់ដោយសារជំនន់ទឹកភ្លៀង ក្នុងនោះ ចំនួនអ្នកស្លាប់ចំនួន ៤៣នាក់ (កើន៣នាក់នៅខេត្តបន្ទាយមានជ័យ)។
របាយការណ៍បន្តថា ជំនន់ទឹកភ្លៀង ក៏បានបង្កផលប៉ះពាល់ដល់ប្រជាពលរដ្ឋចំនួន ១៤៨ ៥៩៧គ្រួសារ ស្មើប្រមាណ ៥៩៤ ៣៨៨នាក់ ខណៈប្រជាពលរដ្ឋជិត ១២ម៉ឺនគ្រួសារ ស្មើប្រមាណ ៤៧ ៥៨០នាក់ ត្រូវបានជម្លៀសទៅកាន់ទីទួលសុវត្ថិភាព។
ក្រៅពីនោះ របាយការណ៍បញ្ជាក់ថា មានផ្ទះប្រជាពលរដ្ឋ ១៣៣ ២០៣ខ្នង រងផលប៉ះពាល់ និងខូចខាត ៦៣ខ្នង ខណៈសាលារៀន ៩៥១កន្លែង វត្ត ៣០៧កន្លែង និងស្រូវជាង ២៧ម៉ឺនហិកតា ដំណាំរួមផ្សំជិត ១០ម៉ឺនហិកតា រួមទាំងហេដ្ឋារចនាសម្ព័ន្ធជាច្រើនទៀត បានរងនូវការជន់លិច។
បើតាមគណៈកម្មាធិការជាតិគ្រប់គ្រងគ្រោះមហន្តរាយ រាជធានី-ខេត្តទាំង១៩ ដែលរងផលប៉ះពាល់ដោយជំនន់ទឹកភ្លៀង រួមមាន រាជធានីភ្នំពេញ ខេត្តពោធិ៍សាត់ ប៉ៃលិន បន្ទាយមានជ័យ បាត់ដំបង ស្វាយរៀង ឧត្តរមានជ័យ ត្បូងឃ្មុំ សៀមរាប តាកែវ កំពង់ស្ពឺ មណ្ឌលគិរី ព្រះសីហនុ កោះកុង ព្រះវិហារ ស្ទឹងត្រែង កំពង់ចាម កណ្តាល កំពង់ឆ្នាំង និងខេត្តកំពង់ធំ។
នៅថ្ងៃអង្គារនេះដែរ ក្រសួងធនធានទឹក និងឧតុនិយម បានចេញសេចក្តីជូនដំណឹងថា ព្យុះទី១៨ ឈ្មោះ ម៉ូឡាវ បានបង្កើនឥទ្ធិពលក្នុងសមុទ្រចិនខាងត្បូង និងមានទិសដៅឆ្ពោះទៅប្រទេសវៀតណាម រួចឆ្លងកាត់ប្រទេសឡាវ និងថៃ។
ក្រសួងបន្តថា ជ្រលងវិសម្ពាធនិងសម្ពាធទាប ម៉ូឡាវ មានឥទ្ធពលមកលើប្រទេសកម្ពុជា នៅថ្ងៃទី២៨ និង២៩ ខែតុលា ដែលស្ថានភាពនេះ នឹងធ្វើឱ្យបណ្តារាជធានី-ខេត្តមួយចំនួន នៅភាគខាងក្រោម និងជាប់ព្រំដែនវៀតណាម នឹងមានភ្លៀងធ្លាក់ពីមធ្យមទៅច្រើន ខណៈខេត្តជាប់ជួរភ្នំដងរែក និងខ្ពស់រាបឥសាន នឹងមានភ្លៀងធ្លាក់ពីតិចទៅបង្គួរលាយឡំជាមួយនឹងខ្យល់ខ្លាំង។ ចំណែក តំបន់មាត់សមុទ្រ នឹងអាចមានភ្លៀងធ្លាក់រាយប៉ាយពីតិចទៅបង្គួរ។
ករណីនេះ ក្រសួងបានអំពាវនាវដល់ប្រជាពលរដ្ឋ បន្តយកចិត្តទុកដាក់ប្រុងប្រយ័ត្ន ដើម្បីជៀសវាងនូវគ្រោះថ្នាក់ផ្សេងៗដែលអាចកើតមានឡើងជាយថាហេតុ៕
