កម្ពុជាបានប្រកាសពីការរកឃើញមនុស្ស២នាក់ទៀតឆ្លងវីរុសកូរ៉ូណា ដែលនាំឱ្យប្រទេសនេះរកឃើញអ្នកឆ្លងវីរុសនេះសរុបដល់ទៅ១៩០ករណីហើយរហូតមកដល់ថ្ងៃនេះ។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ក្រសួងសុខាភិបាលឱ្យដឹងថា ករណីឆ្លងវីរុសថ្មីនេះ ត្រូវបានរកឃើញនៅលើបុរសកម្ពុជា២នាក់ ម្នាក់អាយុ៣៤ឆ្នាំ និងម្នាក់ទៀតអាយុ២៣ឆ្នាំ ហើយពួកគេត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងបញ្ជាក់ថា បុរសកម្ពុជាទាំង២រូបនេះ ត្រូវបានរកឃើញឆ្លងវីរុសបន្ទាប់ពីធ្វើដំណើរតាមជើងហោះហើរវិលត្រឡប់ពីប្រទេសជប៉ុនឆ្លងកាត់កូរ៉េខាងត្បូង ហើយមកដល់កម្ពុជានៅថ្ងៃចន្ទដើមសប្ដាហ៍នេះ។
បើតាមក្រសួង មនុស្ស៣៧នាក់ផ្សេងទៀត បានធ្វើដំណើរតាមជើងហោះហើរជាមួយបុរសកម្ពុជាទាំង២នាក់នោះ ហើយលទ្ធផលតេស្តរបស់ពួកគេ គឺអវិជ្ជមាន ប៉ុន្តែត្រូវបានដាក់ឱ្យស្ថិតនៅដាច់ដោយឡែកនៅក្នុងមណ្ឌលចត្តាឡីស័ក ស្ថិតក្នុងវិទ្យាល័យពោធិ៍ចិនតុង និងសណ្ឋាគារ២កន្លែងក្នុងរាជធានីភ្នំពេញ។
គិតត្រឹមថ្ងៃនេះ មនុស្សដល់ទៅ២៩០នាក់ហើយ ត្រូវបានរកឃើញឆ្លងវីរុសនៅក្នុងប្រទេសកម្ពុជា ប៉ុន្តែអ្នកជំងឺ២៨៣នាក់ហើយត្រូវបានព្យាបាលជាសះស្បើយនិងអនុញ្ញាតឱ្យចាកចេញពីមន្ទីរពេទ្យ ខណៈអ្នកជំងឺ៧នាក់ទៀតកំពុងស្ថិតនៅក្រោមការព្យាបាលនៅឡើយ៕
