រដ្ឋបាលប្រទេសអូស្ត្រាលី ប្រកាសពីគំនិតផ្តួចផ្តើមថ្មីមួយ ស្តីពី ការទទួលបានវ៉ាក់សាំងការពារជំងឺកូវីដ-១៩ និងគម្រោងសន្តិសុខសុខាភិបាលក្នុងតំបន់ សម្រាប់តំបន់អាស៊ីអាគ្នេយ៍និងប៉ាស៊ីហ្វិក។
សេចក្តីប្រកាសព័ត៌មានរបស់ស្ថានទូតអូស្ត្រាលីប្រចាំនៅកម្ពុជា នៅថ្ងៃទី០២ ខែវិច្ឆិកា ឆ្នាំ២០២០ បានលើកឡើងថា គំនិតផ្តួចផ្តើមថ្មីដែលមានទឹកប្រាក់ចំនួន៥០០លានដុល្លារអូស្ត្រាលីនេះ នឹងចូលរួមចំណែកយ៉ាងធំធេងក្នុងការឆ្លើយតបទៅនឹងតម្រូវការថ្នាំវ៉ាក់សាំងក្នុងតំបន់អាស៊ីអាគ្នេយ៍។
សេចក្តីប្រកាសព័ត៌មានបន្តថា គម្រោងនេះក៏នឹងរួមបញ្ចូលទាំងលទ្ធកម្មនិងការផ្ដល់ជូនកម្រិតថ្នាំវ៉ាក់សាំង ការវាយតម្លៃសុវត្ថិភាពនិងប្រសិទ្ធភាពថ្នាំវ៉ាក់សាំង និងការគាំទ្របច្ចេកទេសសម្រាប់គោលនយោបាយនិងផែនការការចាក់ថ្នាំបង្ការ។
លោកស្រីសមាជិកព្រឹទ្ធសភា Hon Marise Payne រដ្ឋមន្ត្រីក្រសួងការបរទេស និងជារដ្ឋមន្ត្រីក្រសួងកិច្ចការនារីអូស្ត្រាលី មានប្រសាសន៍ក្នុងសេចក្តីប្រកាសព័ត៌មាននោះថា សម្រាប់ប្រទេសក្នុងតំបន់ មិនមានអាទិភាពអ្វីខ្ពស់ជាងការទទួលបានថ្នាំវ៉ាក់សាំងការពារជំងឺកូវីដ១៩នោះឡើយ។
លោកស្រីបន្តថា៖ «ការទទួលបានវ៉ាក់សាំងទាន់ពេលវេលានិងប្រកបដោយសុវត្ថិភាពនៅតំបន់ប៉ាស៊ីហ្វិកនិងអាស៊ីអាគ្នេយ៍ នឹងមានន័យថា យើងទាំងអស់អាចត្រឡប់មកកាន់ភាពធម្មតាក្នុងការធ្វើដំណើរ វិស័យទេសចរណ៍ និងពាណិជ្ជកម្ម ជាមួយដៃគូសំខាន់ៗរបស់យើងនៅក្នុងតំបន់»។
ឯកអគ្គរដ្ឋទូតអូស្តា្រលីប្រចាំកម្ពុជា លោក Pablo Kang បានថ្លែងថា នេះគឺជាសេចក្ដីប្រកាសដ៏សំខាន់មួយដែលពង្រីកការចូលរួមយ៉ាងជ្រៅរួចទៅហើយរបស់ប្រទេសអូស្ត្រាលីក្នុងវិស័យសុខាភិបាលនៅកម្ពុជា និងដើរតួនាទីដ៏សំខាន់មួយក្នុងកិច្ចប្រឹងប្រែងរបស់កម្ពុជា ដើម្បីធានាការទទួលបានជាសកលនៃវ៉ាក់សាំងការពារជំងឺកូវីដ១៩ ដែលអនុញ្ញាតដោយអង្គការសុខភាពពិភពលោក។
បើតាមសេចក្តីប្រកាសព័ត៌មាន គំនិតផ្ដួចផ្ដើមរបស់រដ្ឋាភិបាលអូស្ត្រាលីនេះ បន្ថែមទៅលើការប្ដេជ្ញាចិត្ត ក្នុងទឹកប្រាក់៨០លានដុល្លារអូស្ត្រាលី របស់ប្រទេសអូស្តា្រលី តាមរយៈការប្ដេជ្ញាចិត្តទីផ្សារនៃយន្តការ COVAX (COVAX Facility Advance Market Commitment) ដែលត្រូវបានបង្កើតឡើង ដើម្បីជួយប្រទេសកំពុងអភិវឌ្ឍន៍ទទួលបានចំនួនកម្រិតថ្នាំវ៉ាក់សាំង អាចឆ្លើយតបទៅនឹងតម្រូវការរបស់ក្រុមមនុស្សដែលមានហានិភ័យខ្ពស់ជាងគេ។
សេចក្តីប្រកាសព័ត៌មានបន្តទៀតថា ជំនួយគាំទ្រស្ដីពីវ៉ាក់សាំងនេះ ក៏ជាការបន្ថែមទៅលើជំនួយអភិវឌ្ឍន៍របស់អូស្ត្រាលីដែលកំពុងតែដំណើរការ សម្រាប់ការឆ្លើយតបនិងស្ដារសេដ្ឋកិច្ចកម្ពុជាឡើងវិញក្រោយជំងឺកូវីដ១៩ ខណៈអូស្ត្រាលីប្ដេជ្ញាចិត្តគាំទ្រកម្ពុជាក្នុងការទទួលបានដោយស្មើភាពគ្នានូវវ៉ាក់សាំងដែលមានសុវត្ថិភាពនិងមានតម្លៃសមរម្យ៕
