សាលាដំបូងរាជធានីភ្នំពេញ បានចេញដីកាកោះឱ្យលោក សម រង្ស៊ី មេដឹកនាំ និងមន្ត្រីអតីតបក្សប្រឆាំងប្រមាណ៦០នាក់ទៀត ឱ្យចូលរួមសវនាការនៅថ្ងៃទី២៦ ខែវិច្ឆិកានេះ ដើម្បីជំនុំជម្រះលើសំណុំរឿង «រួមគំនិតក្បត់ និងញុះញង់ឱ្យប្រព្រឹត្តបទល្មើសជាអាទិ៍»។
ដីកាកោះរបស់តុលាការ ត្រូវបានស្នងការរងនគរបាលរាជធានីភ្នំពេញ លោកឧត្តមសេនីយ៍ទោ ប៊ុត សុសិខា និងមន្ត្រីមូលដ្ឋានជាច្រើននាក់ យកទៅបិទប្រកាសជាសាធារណៈនៅអតីតស្នាក់ការរបស់អតីតគណបក្សសង្គ្រោះជាតិ នារសៀលថ្ងៃទី០៣ ខែវិច្ឆិកា ឆ្នាំ២០២០ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ។
យោងតាមដីកាកោះឱ្យចូលខ្លួនរបស់លោកព្រះរាជអាជ្ញារង សេង ហៀង បានបង្គាប់ឱ្យលោក សម រង្ស៊ី មេដឹកនាំអតីតគណបក្សប្រឆាំង ចូលខ្លួនទៅកាន់សាលាដំបូងរាជធានីភ្នំពេញ នៅថ្ងៃទី២៦ ខែវិច្ឆិកា ឆ្នាំ២០២០ ជាកំហិត ដើម្បីចូលរួមសវនាការពាក់ព័ន្ធនឹងបទចោទ «រួមគំនិតក្បត់ និងញុះញង់ឱ្យប្រព្រឹត្តបទល្មើសជាអាទិ៍» ប្រព្រឹត្តនៅប្រទេសកម្ពុជា និងទីកន្លែងផ្សេងទៀត កាលពីអំឡុងខែមករា និងខែមិថុនា ឆ្នាំ២០១៩ តាមបញ្ញត្តិមាត្រា៤៥៣ មាត្រា៤៩៤ និងមាត្រា៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា។
ដីកាកោះដូចគ្នានេះ ព្រះរាជអាជ្ញារង លោក សេង ហៀង ក៏បានកោះឱ្យមន្ត្រីជាន់ខ្ពស់អតីតគណបក្សសង្គ្រោះជាតិ ប្រមាណជិត៦០នាក់ទៀត ឱ្យចូលរួមសវនាការនៅថ្ងៃទី២៦ ខែវិច្ឆិកានេះផងដែរ ក្នុងនោះមាន លោកស្រី មួរ សុខហួរ លោក អេង ឆៃអ៊ាង លោក តុ វ៉ាន់ចាន់ លោក ហូរ វ៉ាន់ លោក អ៊ូ ច័ន្ទឬទ្ធិ លោក ឡុង រី លោក ម៉ែន សុថាវរិន្ទ្រ លោក អ៊ុំ សំអាន លោក ម៉ោញ សារ៉ាត់ លោក លី រតនរស្មី លោក អ៊ីសា ឧស្មាន និងលោក ឡោ ជូនធី ជាដើម។
បើតាមដីកាកោះឱ្យចូលខ្លួនសវនាការបទល្មើសឧក្រិដ្ឋ លើបទចោទ «រួមគំនិតក្បត់» និង «ញុះញង់ឱ្យប្រព្រឹត្តបទល្មើសជាអាទិ៍» នេះ មានប្រធានក្រុមប្រឹក្សាជំនុំជម្រះ លោក រស់ ពិសិដ្ឋ និងចៅក្រមប្រឹក្សា លោក កើត សាំង និងលោក អ៊ឹម វណ្ណ: និងលោក សេង ហៀង ជាតំណាងអយ្យការ។
កាលពីថ្ងៃទី២០ ខែតុលា ឆ្នាំ២០២០ តំណាងអយ្យការអមសាលាដំបូងរាជធានីភ្នំពេញ លោកព្រះរាជអាជ្ញារង សេង ហៀង ក៏បានចេញដីកាកោះដាច់ដោយឡែកមួយទៀត បង្គាប់ឱ្យមេដឹកនាំនិងសមាជិកជាន់ខ្ពស់អតីតគណបក្សសង្គ្រោះជាតិ ចំនួន៩រូប ឱ្យចូលខ្លួនទៅកាន់សាលាដំបូងរាជធានីភ្នំពេញ នៅថ្ងៃទី១១ ខែវិច្ឆិកា ឆ្នាំ២០២០ វេលាម៉ោង៨ព្រឹក ជាកំហិត ដើម្បីឆ្លើយដោះសារពីការចោទប្រកាន់លើសំណុំរឿង «ឧបឃាត» ឬ «ប៉ុនប៉ងធ្វើរដ្ឋប្រហារ»។
អតីតមេដឹកនាំនិងសមាជិកជាន់ខ្ពស់បក្សប្រឆាំងទាំង៩រូបនោះ រួមមាន លោក សម រង្ស៊ី, លោកស្រី ជូឡុង សូមូរ៉ា (ភរិយាលោក សម រង្ស៊ី), លោក អេង ឆៃអ៊ាង, លោកស្រី មួរ សុខហួរ, លោក អ៊ូ ចាន់ឬទ្ធិ, លោក ហូរ វ៉ាន់, លោក ឡុង រី, លោក ម៉ែន សុថាវរិន្រ្ទ និងលោក នុត រំដួល៕
