ភ្នាក់ងារព័ត៌មានរបស់កាសែតក្នុងស្រុកមួយប្រចាំខេត្តបាត់ដំបង បារម្ភពីសុវត្ថិភាពផ្ទាល់ខ្លួន ក្រោយពីកូនប្រុសរបស់អធិការរងប្រចាំខេត្តនេះ គំរាមបាញ់សម្លាប់គាត់ពាក់ព័ន្ធរឿងចុះផ្សាយពីជម្លោះក្នុងគ្រួសាររបស់គេកាលពីចុងខែមុន។
ភ្នាក់ងារព័ត៌មានរបស់កាសែតកោះសន្តិភាពប្រចាំខេត្តបាត់ដំបង លោក ឆោម ពិសម័យ ប្រាប់វីអូឌីនៅថ្ងៃនេះថា កាលពីចុងខែតុលាកន្លងមកនេះ រូបគាត់បានចុះផ្សាយអត្ថបទមួយពាក់ព័ន្ធនឹងរឿងរបស់លោក កាយ វណ្ណធី អធិការរងក្រុងបាត់ដំបង ដែលគំរាមសម្លាប់អតីតប្រពន្ធរបស់ខ្លួនឈ្មោះ សុខ សោភ័ណ្ឌ ក្រោយពីស្វាមីសុំជាសះគ្នាវិញ ប៉ុន្តែខាងអតីតភរិយាមិនព្រម។
លោក ពិសម័យ បន្តថា យុវជនម្នាក់ដែលលោកស្គាល់ត្រឹមឈ្មោះ រ៉ូ បានស្រែកគំរាមសម្លាប់រូបលោកនៅក្នុងវីអូដេដែលម្ដាយរបស់យុវជនរូបនេះបានផ្សាយលក់ផលិតផលតាមបណ្ដាញសង្គមហ្វេសប៊ុក។
អ្នកកាសែតរូបនេះ អះអាងថា យុវជនឈ្មោះ រ៉ូ គឺជាកូនប្រុសរបស់អធិការរងនគរបាលក្រុងបាត់ដំបង លោក កាយ វណ្ណធី ហើយលោកថា ករណីនេះ ធ្វើឱ្យរូបគាត់ព្រួយបារម្ភពីសុវត្ថិភាព បើសិនជាសមត្ថកិច្ចមិនចាប់ជននោះមកផ្តន្ទាទោសតាមច្បាប់។
លោក ឆោម ពិសម័យ ប្រាប់ថា៖ «ខ្ញុំសង្ឃឹមថា សមត្ថកិច្ចនឹងចាត់ការ ហើយប្រសិនជាមិនចាត់ការជារឿងរបស់សមត្ថកិច្ចទេ។ សម្រាប់ខ្ញុំ នៅតែមានការព្រួយបារម្ភ ព្រោះការគំរាមកំហែងបំបែកបំបាក់ យើងមើលមិនឃើញផង ព្រោះបុគ្គលនោះ យើងមិនទាន់ច្បាស់ថាឈ្មោះ រ៉ូ ព្រោះខ្ញុំអត់ស្គាល់ដែរ គ្រាន់តែដឹងតាមម្តាយដែលហៅថា ឈ្មោះ រ៉ូ»។
អ្នកស្រី សុខ សោភ័ណ្ឌ បានទទួលស្គាល់ថា អ្នកស្រីគឺជាម្តាយរបស់យុវជនឈ្មោះ រ៉ូ អាយុជាង២០ឆ្នាំ ហើយក៏បានទទួលស្គាល់ផងដែរថា កូនប្រុសរបស់អ្នកស្រីបាននិយាយគំរាមកំហែងទៅលើអ្នកកាសែតរូបនេះមែន។ ប៉ុន្តែអ្នកស្រីថា កូនរបស់គាត់មិនធ្វើដូចអ្វីដែលគាត់បាននិយាយគំរាមកំហែងនោះទេ ដោយសាររូបគាត់នៅក្មេង ហើយពេលខឹងតែងតែរករឿងអ្នកផ្ទះ ជេរប្រមាថ និងគំរាមកំហែងក្នុងគ្រួសារទៀតផង។
ទោះជាយ៉ាងណា អ្នកស្រីបន្តថា គាត់នឹងទៅជួបសមត្ថកិច្ចនៅក្រុងបាត់ដំបង ដើម្បីរកវិធីជួយសម្របសម្រួលដើម្បីបញ្ចប់ជម្លោះរវាងរូបគាត់និងភ្នាក់ងារកាសែតកោះសន្តិភាព។
វីអូឌី មិនអាចសុំការបំភ្លឺពីស្នងការខេត្តបាត់ដំបង លោក គឹម សាន និងអធិការរងក្រុងបាត់ដំបង លោក កាយ វណ្ណធី បានទេនៅថ្ងៃនេះ។
នៅលើទំព័រហ្វេសប៊ុករបស់ខ្លួនកាលពីថ្ងៃម្សិលមិញនេះ អគ្គស្នងការនគរបាលជាតិ បានផ្សាយថា បានចាត់មន្ត្រីកាន់ផែនជំនាញ ធ្វើការស៊ើបអង្កេតលើករណីនេះ ដើម្បីចាត់វិធានការច្បាប់ចំពោះអ្នកប្រព្រឹត្តផងដែរ។
មន្ត្រីអង្កេតរបស់សមាគមការពារសិទ្ធិមនុស្សអាដហុកប្រចំាខេត្តបាត់ដំបង លោក យិន ម៉េងលី បានឱ្យដឹងថា អាជ្ញាធរត្រូវធ្វើការស៊ើបអង្កេតរកអ្នកគំរាមនោះ ចាត់វិធានការច្បាប់ ដើម្បីជាគំរូល្អសម្រាប់សង្គមប្រជាធិបតេយ្យ។
លោក យិន ម៉េងលី និយាយថា៖ «ខ្ញុំចង់ឱ្យសមត្ថកិច្ចធ្វើការស្រាវជ្រាវយកអ្នកដែលប្រព្រឹត្តមកផ្តន្ទាទោស ដើម្បីជាឧទារណ៍បង្ហាញអ្នកដទៃទៀត កុំឱ្យធ្វើអ្វីតាមតែអំពើចិត្ត ព្រោះប្រទេសយើងមានច្បាប់ ដើម្បីលើកតម្កើងអ្នកសារព័ត៌មាន ហើយឱ្យអ្នកសារព័ត៌មានគាត់ប្រកបវិជ្ជាជីវៈក្នុងនាមជាអ្នកសារព័ត៌មាន រួចផុតពីការភ័យខ្លាចទាំងឡាយ»។
ក្នុងសារលិខិតចេញនៅចំទិវាសេរីភាពសារព័ត៌មានសកល ថ្ងៃទី៣ ខែឧសភាកន្លងមកនេះ លោកនាយករដ្ឋមន្ត្រី ហ៊ុន សែន បានបង្ហាញនូវការគាំទ្ររបស់លោកចំពោះការលើកកម្ពស់សិទ្ធិសេរីភាពនៃការបញ្ចេញមតិនិងសេរីភាពខាងសារព័ត៌មាន ដែលត្រូវបានធានាដោយរដ្ឋធម្មនុញ្ញនិងច្បាប់ស្ដីពីរបបសារព័ត៌មាន។
ស្ថានភាពសេរីភាពសារព័ត៌មាននៅកម្ពុជា ត្រូវវាយតម្លៃថា បានធ្លាក់ចុះជាបន្តបន្ទាប់មកដល់ចំណាត់ថ្នាក់១៤៣ នៅឆ្នាំ២០១៩ បន្ទាប់ពីការបង្ក្រាបរបស់រដ្ឋាភិបាលទៅប្រព័ន្ធផ្សព្វផ្សាយឯករាជ្យនានានៅចុងឆ្នាំ២០១៧៕
