ក្រុមប្រឹក្សាជាតិកម្ពុជាដើម្បីកុមារ (ក.ជ.ក) អំពាវនាវដល់ក្រសួងស្ថាប័ននិងស្ថាប័នតុលាការ មានវិធានការតាមផ្លូវច្បាប់ចំពោះជនល្មើសដែលប្រព្រឹត្តអំពើឃោរឃៅអមនុស្សធម៌ទៅលើទារក បណ្តាលឱ្យស្លាប់ រួចយកទៅបោះចោលតាមទីសាធារណៈ។
សេចក្តីថ្លែងការណ៍របស់ក្រុមប្រឹក្សាជាតិដើម្បីកុមារ ចុះថ្ងៃទី០៣ ខែវិច្ឆិកា ឆ្នាំ២០២០ បានឱ្យដឹងថា កាលពីព្រឹកថ្ងៃទី០១ ខែវិច្ឆិកា ប្រជាពលរដ្ឋបានប្រទះឃើញសពទារកនៅក្នុងកេសក្រដាស នៅលើចិញ្ចើមផ្លូវជាប់របងវិទ្យាល័យ ហ៊ុន សែន ប៊ុនរ៉ានី វត្តភ្នំ ក្នុងសង្កាត់ស្រះចក ខណ្ឌដូនពេញ រាជធានីភ្នំពេញ ដែលករណីនេះ សមត្ថកិច្ចបាននិងកំពុងស្រាវជ្រាវរកអ្នកប្រព្រឹត្តនិងចាត់វិធានការតាមនីតិវិធី។
ក.ជ.ក ចាត់ទុកករណីនេះថាជាអំពើដ៏សាហាវ ឃោរឃៅ និងបានរំលោភបំពានយ៉ាងធ្ងន់ធ្ងរទៅលើសិទ្ធិកុមារ ជាពិសេសសិទ្ធិរស់រានមានជីវិត ដែលកម្ពុជាបានផ្ដល់សច្ចាប័ននិងមានក្នុងរដ្ឋធម្មនុញ្ញជាធរមាន។
ក.ជ.ក បញ្ជាក់ថា៖ «សូមថ្កោលទោសយ៉ាងដាច់អហង្ការ ដោយមិនអាចទទួលយកបានឡើយ ចំពោះការប្រព្រឹត្តអំពើឃោរឃៅ យង់ឃ្នង ព្រៃផ្សៃ អមនុស្សធម៌ ទៅលើទារកដែលមានអាយុប្រមាណក្រោម២សប្តាហ៍ បណ្តាលឱ្យស្លាប់បាត់បង់ជីវិតរួចយកទៅដាក់ក្នុងកេសក្រដាស»។
ករណីនេះ ក.ជ.ក ក៏បានអំពាវនាវដល់ក្រសួង ស្ថាប័ន និងអង្គការពាក់ព័ន្ធ ជាពិសេសស្ថាប័នតុលាការ យកចិត្តទុកដាក់និងចាត់វិធានការតាមផ្លូវច្បាប់យ៉ាងតឹងរ៉ឹងបំផុតចំពោះជនល្មើស ដើម្បីកុំឱ្យអំពើដ៏អាក្រក់នេះកើតមានក្នុងសង្គមជាតិបន្តទៀត៕
