បន្ទាប់ពីដំណើរការបោះឆ្នោតបិទបញ្ចប់នៅត្រឹមល្ងាចថ្ងៃទី៣ ខែវិច្ឆិកា នៅឯសហរដ្ឋអាមេរិកដែលត្រូវនឹងព្រឹកថ្ងៃពុធនៅប្រទេសកម្ពុជានោះ លទ្ធផលនៃការបោះឆ្នោតជ្រើសរើសប្រធានាធិបតីបានចេញមកបណ្ដើរៗ បន្ទាប់ពីការរាប់សន្លឹកឆ្នោតនៅតាមរដ្ឋមួយចំនួនស្ថិតនៅភាគខាងកើតនិងភាគឦសានសហរដ្ឋអាមេរិក។
លទ្ធផលនៃការរាប់សន្លឹកឆ្នោតបណ្ដោះអាសន្ន បង្ហាញថា បេក្ខជនប្រធានាធិបតីមកពីបក្សប្រជាធិបតេយ្យ លោក ចូ បៃដិន កំពុងនាំមុខបេក្ខជនប្រធានាធិបតី លោក ដូណាល់ ត្រាំ ដែលកំពុងកាន់អំណាចនាពេលបច្ចុប្បន្ន។
លទ្ធផលផ្សាយបន្តផ្ទាល់ដោយទីភ្នាក់ងារព័ត៌មាន AP របស់អាមេរិក បង្ហាញថា លោក ចូ បៃដិន អតីតអនុប្រធានាធិបតីនៅក្រោមរដ្ឋបាលប្រធានាធិបតី បារ៉ាក់ អូបាម៉ា កំពុងនាំមុខលោក ដូណាល់ ត្រាំ ដែលជាបេក្ខជនប្រធានាធិបតីមកពីបក្សសាធារណរដ្ឋ។
គិតត្រឹមម៉ោង៩ព្រឹកនេះ លោក បៃដិន កំពុងនាំមុខជាមួយសំឡេងគាំទ្រពីប្រតិភូ ១១៩ នៅតាមបណ្ដារដ្ឋនានា ខណៈលោក ត្រាំ វិញកំពុងទទួលបានសំឡេងគាំទ្រពីប្រតិភូ ៩១។
ការបោះឆ្នោតនៅសហរដ្ឋអាមេរិក បេក្ខជនម្នាក់ៗតម្រូវឱ្យស្វែងរកសំឡេងគាំទ្រពីប្រតិភូយ៉ាងតិចបំផុត ២៧០ ឬស្មើនឹង ៥០ភាគរយបូក១ នៅក្នុងចំណោមសំឡេងគាំទ្រពីប្រតិភូសរុប ៥៣៨។
បើគិតពីសំឡេងបោះឆ្នោតពលរដ្ឋអាមេរិកវិញ លោក បៃដិន ទទួលបានសន្លឹកឆ្នោតគាំទ្រជាបណ្ដោះអាសន្នជាង២១លានសំឡេង ឬស្មើនឹងខ្ទង់៤៨ភាគរយ ខណៈលោក ត្រាំ ទទួលបានសន្លឹកឆ្នោតជាង២២លាន ឬស្មើនឹង៥០,៧ភាគរយ នៅត្រឹមម៉ោង៩ព្រឹកនេះ៕
