គិតមកដល់ត្រឹមម៉ោង២រសៀលថ្ងៃនេះ លទ្ធផលបណ្ដោះអាសន្ននៃការបោះឆ្នោតនៅសហរដ្ឋអាមេរិក បង្ហាញថា បេក្ខជនប្រធានាធិបតីទាំងពីរ លោក ចូ បៃដិន និងលោកប្រធានាធិបតី ដូណាល់ ត្រាំ នៅតែមិនអាចសម្រេចថា នរណាឈ្នះដាច់នៅឡើយទេ ហើយផ្ទុយទៅវិញ លទ្ធផលកាន់តែប្រកៀកប្រកិតគ្នា។
ទីភ្នាក់ងារព័ត៌មានអាមេរិក AP ដែលបានផ្សាយបន្តផ្ទាល់អំពីលទ្ធផលនៃការរាប់សន្លឹកឆ្នោត បានរាយការណ៍ថា បេក្ខជនប្រធានាធិបតីមកពីគណបក្សប្រជាធិបតេយ្យ លោក ចូ បៃដិន កំពុងនាំមុខលោក ដូណាល់ ត្រាំ ដោយសំឡេងគាំទ្រខុសគ្នាបន្តិចបន្តួចប៉ុណ្ណោះ។
បើតាម AP លោក បៃដិន កំពុងទទួលបានសន្លឹកឆ្នោតគាំទ្រ ២២៤សំឡេង ខណៈលោក ត្រាំ កំពុងដេញតាមពីក្រោយដោយសន្លឹកឆ្នោតគាំទ្រ ២១៣សំឡេង។
លទ្ធផលនៅព្រឹកថ្ងៃនេះ បង្ហាញថា លោក បៃដិន នាំមុខយ៉ាងឆ្ងាយពីលោក ត្រាំ ប៉ុន្តែសំឡេងគាំទ្រលោក ត្រាំ បានប្រែប្រួលខ្លាំងនៅត្រឹមរសៀលថ្ងៃនេះ ដោយបានហក់ឡើងពីចំនួន ៧៤ នៅមុនម៉ោង១២ថ្ងៃត្រង់ មកដល់ចំនួន ២១៣ នៅត្រឹមម៉ោង២រសៀលថ្ងៃនេះ។
លោក ត្រាំ ទទួលបានសំឡេងគាំទ្រពីប្រតិភូបោះឆ្នោតនៅតាមរដ្ឋចំនួន ២៣ ខណៈលោក បៃដិន ទទួលបានសំឡេងគាំទ្រពីប្រតិភូបោះឆ្នោតនៅតាមរដ្ឋចំនួន ២០ ជាពិសេសឈ្នះដាច់នៅរដ្ឋកាលីហ្វ័រញ៉ា ដែលមានប្រតិភូបោះឆ្នោតដល់ទៅ ៥៥សំឡេង ច្រើនជាងគេបង្អស់បើធៀបនឹងរដ្ឋផ្សេងទៀត។
ខណៈដែលរដ្ឋចំនួន៣ទៀត ត្រូវបានគេព្យាករថា លោក បៃដិន នឹងឈ្នះនោះ លោក ត្រាំ វិញ ត្រូវបានគេវាយតម្លៃថា នឹងឈ្នះនៅរដ្ឋយ៉ាងហោចណាស់៥ទៀត។
បើគិតអំពីចំនួនពលរដ្ឋបោះឆ្នោតគាំទ្រវិញ លោក បៃដិន ទទួលបានការគាំទ្រជាង៦៥លានសំឡេង ឬស្មើនឹងខ្ទង់៥០ភាគរយនៃចំនួនអ្នកបោះឆ្នោតសរុប ខណៈលោក ត្រាំ វិញ ទទួលបានការគាំទ្រជិត៦៤លានសំឡេងតែប៉ុណ្ណោះ៕
