មន្ត្រីជាន់ខ្ពស់ក្រសួងបរិស្ថាន ឱ្យដឹងថា ក្នុងរយៈពេល៩ខែឆ្នាំនេះ ចំណូលបានមកពីការផ្តល់សេវាទេសចរណ៍ធម្មជាតិនៅក្នុងតំបន់ការពារធម្មជាតិចំនួន១២កន្លែងក្នុងខេត្តចំនួន៨ ទទួល បានប្រមាណ២៥,២១លានដុល្លារសហរដ្ឋអាមេរិក ដែលចំណូលនេះបានជួយដល់សេដ្ឋកិច្ចសហគមន៍នៅតំបន់ការពារ។
រដ្ឋលេខាធិការក្រសួងបរិស្ថាន លោក នេត្រ ភក្ត្រា មានប្រសាសន៍នៅថ្ងៃទី០៥ ខែវិច្ឆិកា ឆ្នាំ២០២០នេះថា ទេសចរណ៍ធម្មជាតិនៅក្នុងតំបន់ការពារធម្មជាតិ បាននិងកំពុងនាំយកនូវចំណូលថវិការាប់លានដុល្លារអាមេរិក ចាក់ចូលក្នុងសេដ្ឋកិច្ចនៅមូលដ្ឋាន និងចូលរួមចំណែក បណ្តុះស្មារតីពលរដ្ឋនិងអ្នកទេសចរឱ្យស្រឡាញ់ និងការពារបរិស្ថាននិងធនធានធម្មជាតិផងដែរ។
លោកបន្តថា ជាក់ស្តែង ក្នុងរយៈពេល៩ខែឆ្នាំនេះ មានភ្ញៀវទេសចរជាតិនិងអន្តរជាតិចំនួន៥៣៦ ៥៤៥នាក់ បានទៅទេសចរណ៍នៅតំបន់ការពារនិងអភិរក្សធនធានធម្មជាតិចំនួន១២កន្លែង ដែលគ្រប់គ្រងដោយក្រសួងបរិស្ថាន ក្នុងនោះបានផ្តល់ចំណូលដល់ប្រជាសហគមន៍មូលដ្ឋានចំនួន២២កន្លែង ដែលប៉ាន់ស្មានជាទឹកប្រាក់ប្រមាណ២៥,២១លានដុល្លារ។
លោកបន្តថា ចំនួនភ្ញៀវទេសចរដែលទៅកម្សាន្តនៅតំបន់ការពារធម្មជាតិនៅឆ្នាំនេះ មានការកើនឡើងជាងឆ្នាំ២០១៨និង២០១៩ ដោយក្នុងឆ្នាំ២០១៨ មានភ្ញៀវទេសចរសរុបចំនួន៣៤៣ ៨៥២នាក់ ហើយទទួលចំណូលបាន១៦,១៦លានដុល្លារ និងនៅឆ្នាំ២០១៩ បានទទួលភ្ញៀវទេសចរចំនួន៤០២ ២៩៣នាក់ ទទួលបានចំណូលប្រមាណ១៨,៩០លានដុល្លារ។
លោក នេត្រ ភក្ត្រា បានថ្លែងថា៖ «អភិវឌ្ឍទេសចរណ៍ធម្មជាតិ គឺជាយុទ្ធសាស្ត្រត្រឹមត្រូវ ដើម្បីបង្កើនជីវភាពប្រជាសហគមន៍មូលដ្ឋាន បង្កើតជម្រើសថ្មី មុខរបរថ្មី ជូនប្រជាសហគមន៍ ដើម្បីកាត់ផ្តាច់ការប្រកបរបរប្រពៃណីរបស់ពលរដ្ឋ ចូលព្រៃកាប់ឈើ និងចូលព្រៃបរបាញ់សត្វ និងការចាញ់ល្បិចកល ការញុះញង់របស់ក្រុមជនខិលខូចមួយចំនួន ចូលទន្ទ្រានកាន់កាប់ដីព្រៃដោយខុសច្បាប់»។
លោក នេត្រ ភក្ត្រា បានបន្ថែមថា រាជរដ្ឋាភិបាលមានគោលនយោបាយប្រែក្លាយទីតាំងមួយចំនួន ក្នុងតំបន់ការពារធម្មជាតិខ្លះដែលមានសក្តានុពលទេសចរណ៍ ទៅជាតំបន់ទេសចរណ៍ធម្មជាតិ ដើម្បីបង្កើនសេដ្ឋកិច្ចសម្រាប់សហគមន៍មូលដ្ឋាន ចូលរួមអភិវឌ្ឍ និងធ្វើឱ្យមានកំណើនសេដ្ឋកិច្ចជាតិ ហើយចូលរួមពង្រឹងប្រសិទ្ធភាពអភិរក្សធនធានធម្មជាតិនិងជីវចម្រុះ។
ដើម្បីប្រសិទ្ធភាពនិងពង្រឹងវិធានការការពារនិងអភិរក្សធនធានធម្មជាតិ រួមមាន ព្រៃឈើ សត្វព្រៃ និងជីវចម្រុះផ្សេងទៀតឱ្យបានគង់វង្សសម្រាប់មនុស្សរាប់ជំនាន់ទៅមុខ លោក នេត្រ ភក្ត្រា បញ្ជាក់ថា ក្រសួងចាំបាច់ត្រូវមានផែនការយុទ្ធសាស្ត្រនិងដំណោះស្រាយសមស្រប គឺធ្វើឱ្យប្រជាពលរដ្ឋរស់នៅក្នុងនិងជុំវិញតំបន់ការពារធម្មជាតិ មានជីវភាពល្អប្រសើរ ទទួលបានការអប់រំបណ្តុះបណ្តាល មានចំណេះដឹង និងចូលរួមទទួលខុសត្រូវលើការងារការពារនិងអភិរក្ស ហើយទទួលបានផលប្រយោជន៍ពីកិច្ចការអភិរក្សនេះ។
បើតាមការឱ្យដឹងរបស់រដ្ឋលេខាធិការក្រសួងបរិស្ថានរូបនេះ សហគមន៍ទេសចរណ៍ធម្មជាតិទាំង២២កន្លែងនោះ គ្របដណ្តប់លើផ្ទៃដីទំហំ៣៥ ០០៣ហិកតា ក្នុងតំបន់ការពារធម្មជាតិចំនួន១២ ស្ថិតក្នុងភូមិសាស្ត្រខេត្តចំនួន៨ រួមមាន រតនគិរី កំពង់ស្ពឺ កោះកុង ពោធិ៍សាត់ ព្រះវិហារ កំពង់ធំ កំពត និងកំពង់ឆ្នាំង។
លោកក៏បានអំពាវនាវដល់ប្រជាពលរដ្ឋដែលទៅទស្សនាតំបន់ទេសចរណ៍ធម្មជាតិទាំងនោះ ចូលរួមរក្សាអនាម័យបរិស្ថាននិងចៀសវាងការបោះសំណល់ពាសវាលពាសកាល ដែលធ្វើឱ្យខូចសោភ័ណភាពនិងទេសភាពដ៏ល្អស្អាតនៃតំបន់ទេសចរណ៍ធម្មជាតិទាំងនោះ៕
