ក្រុមស្ត្រីជាភរិយានិងសាច់ញាតិអតីតសកម្មជនបក្សប្រឆាំង បង្ហាញការខកចិត្តចំពោះមន្ត្រីព្រះបរមរាជវាំង ដែលមិនព្រមចេញមកជួបនិងទទួលញត្តិរបស់ពួកគេ ដែលស្នើសុំព្រះរាជទានពីព្រះមហាក្សត្រអន្តរាគមន៍ឱ្យមានការដោះលែងអតីតសកម្មជនបក្សប្រឆាំងដែលកំពុងជាប់ឃុំ។
អ្នកស្រី ព្រុំ ចាន់ថា ភរិយារបស់លោក កាក់ កុម្ភារ និយាយទាំងអួលដើមកថា អ្នកស្រីមានការឈឺចាប់និងខកចិត្តជាខ្លាំង ដែលស្វាមីរបស់អ្នកស្រីត្រូវបានតុលាការឃុំខ្លួនទាំងគ្មានកំហុស ហើយពេលមករកព្រះរាជអន្តរាគមន៍ពីព្រះមហាក្សត្រ បែរជាមន្ត្រីព្រះបរមរាជវាំងមិនទទួលយកញត្តិរបស់ពួកគាត់ទៀត។
អ្នកស្រីថា៖ «ពួកខ្ញុំអស់ជំនឿលើស្ថាប័នរដ្ឋផ្សេងទៀតទេ ព្រោះគេចងគ្នាជាប្រព័ន្ធមកធ្វើបាបពួកខ្ញុំហើយ។ អ៊ីចឹងបានជាពួកខ្ញុំមករកអន្តរាគមន៍ពីសម្តេច [ព្រះមហាក្សត្រ] ឱ្យជួយ តែឥលូវព្រះមហាក្សត្រអត់គង់នៅទៀត។ ហើយអត់មានតំណាងព្រះបរមរាជវាំងមកទទួលញត្តិពីពួកខ្ញុំទៀត និយាយរួមទៅ ពួកខ្ញុំរងភាពអយុត្តិធម៌ខ្លាំងណាស់»។
អ្នកស្រី ព្រុំ ចាន់ថា ឱ្យដឹងទៀតថា ស្វាមីរបស់គាត់ដែលជាអតីតសមាជិកក្រុមប្រឹក្សារាជធានីភ្នំពេញមកពីអតីតគណបក្សប្រឆាំង ត្រូវបានតុលាការឃុំខ្លួនកាលពីថ្ងៃទី៣១ ខែឧសភា ឆ្នាំ២០២០ ក្រោមបទ «ញុះញង់ និងរួមគំនិតក្បត់» ពាក់ព័ន្ធសំណុំរឿងវិលចូលស្រុករបស់ លោក សម រង្ស៊ី កាលពីឆ្នាំ២០១៩។ អ្នកស្រីថា ស្វាមីរបស់គាត់មិនបានប្រព្រឹត្តដូចការចោទប្រកាន់ឡើយ។
អ្នកស្រី សេង ចាន់ថន ភរិយារបស់លោក ស៊ុន ធន់ អតីតសមាជិកក្រុមប្រឹក្សាខេត្តកំពង់ធំរបស់អតីតគណបក្សសង្រ្គោះជាតិ មានសុទិដ្ឋិនិយមថា ប្រសិនបើព្រះបរមរាជវាំងទទួលយកសំណើរបស់ពួកគាត់ នោះស្វាមីអ្នកស្រីនិងអ្នកជាប់ឃុំផ្សេងទៀតអាចត្រូវបានដោះលែងវិញ។
អ្នកស្រីបន្ថែម៖ «ព្រះអង្គគាត់មិនអាចជ្រៀតជ្រែកកិច្ចការតុលាការបានមែន ប៉ុន្តែព្រះអង្គក្នុងនាមព្រះអង្គជាព្រះមហាក្សត្រ ក្នុងនាមព្រះអង្គជាបិតានៃប្រទេសជាតិទាំងមូល អ៊ីចឹងរាល់ការដែលកូនចៅមានទុក្ខលំបាកទាំងអស់ហ្នឹង ព្រះអង្គគួរតែជួយមើល ជួយដោះទុក្ខកូនចៅ ដែលពួកយើងបានរងអំពើហិង្សា និងស្វាមីពួកយើងបានរងការចោទប្រកាន់យ៉ាងអយុត្តិធម៌ ដែលពួកខ្ញុំមិនបានខុសសោះ»។
ក្រុមស្ត្រីជាភរិយានិងសាច់ញាតិអតីតសកម្មជនបក្សប្រឆាំងប្រហែល២០នាក់ បានឈរលើកបដាស្រែកតវ៉ាសុំឱ្យព្រះមហាក្សត្រព្រះរាជទានជួយអន្តរាគមន៍ឱ្យមានការដោះលែងស្វាមីនិងឪពុករបស់ពួកគេ នៅច្រកទ្វារខាងត្បូងព្រះបរមរាជវាំង រយៈពេលប្រហែល១៥នាទី ទើបសន្តិសុខខណ្ឌដូនពេញ ប្រាប់ឱ្យអ្នកតវ៉ាទាំងនោះទៅផ្ទះ ដោយលើកឡើងថា គ្មានមន្ត្រីព្រះបរមរាជវាំងចេញមកទទួលញត្តិទេ។
ប្រធានសន្តិសុខខណ្ឌដូនពេញ លោក គឹម វុត្ថា និយាយប្រាប់ក្រុមស្ត្រីតវ៉ាថា មន្ត្រីព្រះបរមរាជវាំងមិនចេញមកទទួលញត្តិទេ ដោយលើកហេតុផលថា ព្រះមហាក្សត្រមិនគង់នៅក្នុងប្រទេសឡើយ។
ប្រធានសន្តិសុខរូបនេះ បន្ថែមថា៖ «ធម្មតា មុនដល់ព្រះមហាក្សត្រ សូមឱ្យខាងបងដែលមិនពេញចិត្ត ឬក៏បងសំណូមពរយ៉ាងម៉េច សូមបងទៅដាក់សំណើនៅរដ្ឋាភិបាល ដាក់នៅរដ្ឋសភា ព្រឹទ្ធសភា ចុងក្រោយរបាយការណ៍ទាំងអស់ហ្នឹងនឹងមកដល់ព្រះមហាក្សត្រហើយ»។
នាយករងអង្គការឃ្លាំមើលសិទ្ធិមនុស្សលីកាដូ លោក អំ សំអាត មានប្រសាសន៍ថា នៅក្នុងព្រះបរមរាជវាំង គឺមានក្រសួងបរមរាជវាំង ដែលឧបរដ្ឋមន្ត្រីនិងរដ្ឋមន្ត្រីជាអ្នកបម្រើការងារដែរ។
លោកយល់ថា ករណីមន្ត្រីព្រះបរមរាជវាំងមិនចេញមកទទួលញត្តិពីក្រុមស្ត្រីនេះ អាចមកពីមន្ត្រីទាំងនោះមិនទទួលបានព័ត៌មានឬដំណឹងនេះ ព្រោះតែអាចមានការលាក់បាំងណាមួយ។
លោកបន្ថែមថា៖ «ដូចខ្ញុំបញ្ជាក់អ៊ីចឹងថា ខ្ញុំមិនហ៊ានសន្និដ្ឋានថា តើពួកគាត់ [មន្ត្រីក្រសួងព្រះបរមរាជវាំង] បានទទួលដំណឹងដែរឬអត់? អាហ្នឹងវានៅត្រង់ចំណុចកន្លែងហ្នឹង ប៉ុន្តែជាធម្មតាកន្លងមក យើងក៏មានឃើញប្រជាពលរដ្ឋគាត់ដាក់លិខិតទៅព្រះបរមរាជវាំងតាមរយៈក្រសួងព្រះបរមរាជវាំងហ្នឹងដែរ»។
បើតាមក្រុមស្ត្រីទាំងនោះ ពួកគេបានធ្វើយុទ្ធនាការតវ៉ាទាមទារឱ្យដោះលែងស្វាមីនិងឪពុករបស់ពួកគាត់ពីក្រសួង ស្ថាប័នពាក់ព័ន្ធ និងអង្គការទូតនានា អស់រយៈពេល២១សប្តាហ៍មកហើយ គិតមកដល់ថ្ងៃសុក្រទី៦ ខែវិច្ឆិកានេះ។ កន្លងមក ពួកគេបានដើរដាក់ញត្តិនៅស្ថានទូតតំណាងឱ្យប្រទេសមហាអំណាចធំៗមួយចំនួន ដូចជា សហរដ្ឋអាមេរិក សហភាពអឺរ៉ុប អង់គ្លេស អូស្ត្រាលី បារាំង និងជប៉ុន ជាដើម៕
