គិតត្រឹមម៉ោង៤រសៀលថ្ងៃសុក្រនេះ ការបោះឆ្នោតប្រធានាធិបតីអាមេរិក បានកន្លងផុតទៅរយៈពេល៣ថ្ងៃហើយ ប៉ុន្តែលទ្ធផលផ្លូវការនៅតែមិនទាន់ដឹងនៅឡើយ ខណៈលទ្ធផលបណ្ដោះអាសន្នបង្ហាញពីភាពតានតឹងរវាងបេក្ខជនប្រធានាធិបតីទាំងពីររូប។
បើតាមទីភ្នាក់ងារព័ត៌មានអាមេរិក AP លទ្ធផលរាប់សន្លឹកឆ្នោតដែលបោះដោយប្រតិភូមកពីរដ្ឋនានានៅទូទាំងសហរដ្ឋអាមេរិក បង្ហាញលទ្ធផលដូចថ្ងៃម្សិលមិញដដែល ពោលគឺបេក្ខជនប្រធានាធិបតីមកពីគណបក្សប្រជាធិបតេយ្យ លោក ចូ បៃដិន បន្តនាំមុខជាមួយសន្លឹកឆ្នោតគាំទ្រ២៦៤សំឡេង បើធៀបនឹងបេក្ខជនមកពីគណបក្សសាធារណរដ្ឋ គឺប្រធានាធិបតីជិតផុតអាណត្តិ លោក ដូណាល់ ត្រាំ ដែលទទួលបានត្រឹមតែ២១៤សំឡេងប៉ុណ្ណោះ។
នៅសហរដ្ឋអាមេរិក បេក្ខជនប្រធានាធិបតីម្នាក់ត្រូវការសន្លឹកឆ្នោតគាំទ្រយ៉ាងតិច២៧០សំឡេង នៅក្នុងចំណោមសន្លឹកឆ្នោតសរុបដែលបោះដោយប្រតិភូ៥៣៨រូបមកពីរដ្ឋទាំងអស់នៅទូទាំងប្រទេស។
លទ្ធផលនាំមុខបែបនេះ ជំរុញឱ្យលោក ត្រាំ ចោទប្រកាន់អំពីការលួចបន្លំសន្លឹកឆ្នោត ហើយលោកប្រកាសថា នឹងប្ដឹងទៅតុលាការអំពីបញ្ហានេះ។ ផ្ទុយពីលោក ត្រាំ លោក បៃដិន ដែលជាអតីតអនុប្រធានាធិបតីនៅក្រោមរដ្ឋបាលដឹកនាំលោក បារ៉ាក់ អូបាម៉ា បែរជាអំពាវនាវឱ្យរក្សាភាពអត់ធ្មត់។
សារព័ត៌មានអាមេរិក CNN បានរាយការណ៍ថា ដំណើរការរាប់សន្លឹកឆ្នោតនៅរដ្ឋផេនស៊ីលវេនៀ និងរដ្ឋចកចៀ កំពុងតែតានតឹង ព្រោះរដ្ឋទាំងពីរនេះសំខាន់ចំពោះបេក្ខជនប្រធានាធិបតីទាំងពីរ ដើម្បីកាត់សេចក្ដីថា លោក ត្រាំ នឹងបន្តដឹកនាំសេតវិមានមួយអាណត្តិទៀត ឬក៏លោក បៃដិន នឹងឡើងទៅកាច់ចង្កូតនាវាសហរដ្ឋអាមេរិក។
បើតាម AP លោក ត្រាំ បានឈ្នះការបោះឆ្នោតពីប្រតិភូនៅរដ្ឋចំនួន២៣ ដែលភាគច្រើនសុទ្ធតែមានអាសនៈតិចប៉ុណ្ណោះ លើកលែងតែរដ្ឋតិចសាស់មួយដែលមានអាសនៈដល់ទៅ៣៨។ ផ្ទុយទៅវិញ លោក បៃដិន បានឈ្នះនៅរដ្ឋចំនួន១៩ ដែលមានអាសនៈច្រើន ដូចជា រដ្ឋកាលីហ្វ័រញ៉ា មានអាសនៈដល់ទៅ៥៥។
ទន្ទឹមគ្នានេះ គេរំពឹងថា លោក បៃដិន នឹងឈ្នះនៅរដ្ឋយ៉ាងតិចចំនួន៥ទៀត មានរដ្ឋណេវ៉ាដា រដ្ឋមីឈីហ្គែន រដ្ឋវីសខនស៊ីន រដ្ឋចកចៀ និងរដ្ឋអារីហ្សូណា ដែលមានអាសនៈសរុបរហូតដល់៥៩។ ចំណែកលោក ត្រាំ វិញ ត្រូវបានគេរំពឹងថា នឹងឈ្នះនៅរដ្ឋផេនស៊ីលវ៉ានៀ មាន២០អាសនៈ រដ្ឋណដខារ៉ូលីណា មាន១៥អាសនៈ និងរដ្ឋអាឡាស្កា មាន៣អាសនៈ។
ទោះជាយ៉ាងណា លោក បៃដិន ត្រូវបានគេរំពឹងខ្ពស់ថា នឹងក្លាយជាអ្នកដឹកនាំសេតវិមានជំនួសលោក ត្រាំ ដែលនឹងត្រូវផុតអាណត្តិនៅត្រឹមថ្ងៃទី២០ ខែមករាឆ្នាំក្រោយនេះ ជាពេលដែលការផ្ទេរអំណាចរវាងប្រធានាធិបតីចាស់និងប្រធានាធិបតី តែងតែកើតឡើងជាទៀងទាត់៕
