ក្រសួងសុខាភិបាល បានសម្រេចបិទមន្ទីរសំរាកព្យាបាលមួយជាកម្មសិទ្ធិរបស់អតីតតំណាងរាស្ត្របក្សប្រឆាំងឈ្មោះ លី ស្រីវីណា ដោយហេតុផលថា មន្ទីរសម្រាកព្យាបាលនេះ ពុំមានលក្ខណៈសម្បត្តិគ្រប់គ្រាន់បណ្តាលឱ្យអ្នកជំងឺម្នាក់ស្លាប់។
ក្រសួងសុខាភិបាលសម្រេចបិទមន្ទីរសំរាកព្យាបាល លី ស្រីវីណា ធ្វើឡើងបន្ទាប់ពី លោកមេធាវី ទេព ពៅ បានស្លាប់នៅក្នុងមន្ទីរពេទ្យ លី ស្រីវីណា កាលពីថ្ងៃទី២៩ ខែតុលា ឆ្នាំ២០២០ វេលាម៉ោង៨និង៣០នាទីព្រឹក បន្ទាប់ពីរូបលោកទៅរកសេវ៉ាព្យាបាលនៅទីនោះ។
ក្នុងសេចក្តីសម្រេចរបស់ក្រសួងសុខាភិបាល កាលពីថ្ងៃទី៦ ខែវិច្ឆិកានេះ បានឱ្យដឹង មន្ទីរសំរាកព្យាបាលឈ្មោះ លី ស្រីវីណា ដែលមានទីតាំងស្ថិតនៅសង្កាត់ទួលទំពូងទី២ ខណ្ឌចំការមន រាជធានីភ្នំពេញ ដែលមានលោកវេជ្ជបណ្ឌិត ស៊ុយ ប៊ុនថន ជាអ្នកទទួលខុសត្រូវមន្ទីរសំរាកព្យាបាលនោះ នឹងត្រូវបិទ ចាប់ពីថ្ងៃសម្រេចរបស់ក្រសួង ដោយសារមន្ទីរសំរាកព្យាបាលនោះ មិនមានលក្ខណៈសម្បត្តិគ្រប់គ្រាន់ ក្នុងការផ្តល់សេវាសង្គ្រោះអ្នកជំងឺ៕
