ក្រសួងសុខាភិបាលប្រកាសពីការរកឃើញករណីអ្នកឆ្លងជំងឺកូវីដ១៩ថ្មី ចំនួន២ករណីបន្ថែមទៀត លើបុរសជនជាតិខ្មែរចំនួន២នាក់ដែលធ្វើដំណើរមកពីប្រទេសជប៉ុន ខណៈចំនួនសរុបអ្នកប៉ះពាល់រដ្ឋមន្ត្រីការបរទេសហុងគ្រី កើនដល់ជិត១ពាន់នាក់។
សេចក្តីជូនព័ត៌មានរបស់ក្រសួងសុខាភិបាល នៅថ្ងៃទី០៩ ខែវិច្ឆិកា ឆ្នាំ២០២០នេះ បានឱ្យដឹងថា បុរសជនជាតិខ្មែរទាំង២នាក់ដែលមានករណីវិជ្ជមានវីរុសកូវីដ១៩ បានធ្វើដំណើរមកពីប្រទេសជប៉ុន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជា កាលពីថ្ងៃទី២៦ ខែតុលា ឆ្នាំ២០២០។
ក្រសួងបន្តថា៖ «លទ្ធផលធ្វើតេស្តវត្ថុសំណាកលើកទី២ នៅថ្ងៃទី១៣ នៃការធ្វើចត្តាឡីស័ករបស់បុគ្គលនេះ គឺវិជ្ជមានវីរុសកូវីដ១៩ ដែលផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ ហើយបច្ចុប្បន្ន អ្នកជំងឺត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត»។
បើតាមក្រសួង តាមជើងហោះហើរខាងលើនេះ ក៏ធ្លាប់មានបុរសជនជាតិខ្មែរ២នាក់ ពេលមកដល់កម្ពុជា បានធ្វើតេស្តលើកទី១ដោយទទួលលទ្ធផលវិជ្ជមានកូវីដ១៩ផងដែរ ក្នុងនោះមានម្នាក់កំពុងសម្រាកព្យាបាល និងម្នាក់ទៀតបានជាសះស្បើយ។
ចំណែកអ្នកប៉ះពាល់ជាមួយនឹងរដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី លោក ភីធើ ស៊ីចាតូ ត្រូវក្រសួងបញ្ជាក់ថា មានចំនួន៩៤៤នាក់ គិតមកដល់ថ្ងៃម្សិលមិញ ក្នុងនោះមានអង្គរក្សផ្ទាល់របស់គណៈប្រតិភូរូបនេះម្នាក់ បានឆ្លងជំងឺកូវីដ១៩ ក្រៅពីនោះ លទ្ធផលតេស្តអវិជ្ជមានទាំងអស់។
ក្រសួងបានណែនាំដល់អ្នកប៉ះពាល់ជាមួយនឹងរដ្ឋមន្ត្រីការបរទេសហុងគ្រីទាំងអស់ បន្តការធ្វើចត្តាឡីស័កឱ្យបានត្រឹមត្រូវតាមវិធានសុខាភិបាល និងត្រូវបន្តធ្វើតេស្តលើកទី២នៅថ្ងៃចន្ទនេះ និងធ្វើតេស្តលើកទី៣ និងទី៤ នៅថ្ងៃទី១៤ និងទី១៨ ខែវិច្ឆិកា ខាងមុខ។
គិតត្រឹមម៉ោង៧ព្រឹក ថ្ងៃទី០៩ ខែវិច្ឆិកា ឆ្នាំ២០២០នេះ កម្ពុជាបានរកឃើញករណីអ្នកឆ្លងជំងឺកូវីដ១៩ សរុបចំនួន២៩៧នាក់ ក្នុងនោះព្យាបាលជាសះស្បើយ២៨៨នាក់ និងកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ចំនួន៩នាក់៕
