ក្រសួងសុខាភិបាលណែនាំឱ្យអនុវត្តគម្លាតសុវត្ថិភាពសង្គមនិងបុគ្គល ដើម្បីបង្ការនិងទប់ស្កាត់ការចម្លងជំងឺកូវីដ១៩ នៅក្នុងសហគមន៍។
សេចក្តីណែនាំរបស់ក្រសួងចេញផ្សាយនៅល្ងាចថ្ងៃទី១០ ខែវិច្ឆិកា ឆ្នាំ២០២០ បានលើកឡើងថា ជំងឺកូវីដ-១៩ ឆ្លងតាមការប៉ះពាល់តំណក់ទឹកតូចៗដែលខ្ទាតចេញពីមនុស្សម្នាក់ទៅប៉ះមនុស្សម្នាក់ទៀត នៅពេលបុគ្គលដែលមានផ្ទុកវីរុសកូវីដ-១៩ និយាយសើច ច្រៀង ក្អក ឬកណ្តាស់ជាដើម។
ក្រសួងបន្តថា តំណក់ទឹកតូចៗនោះ អាចខ្ទាតបានប្រហែលជាមួយម៉ែត្រកន្លះ ហើយអាចចូលទៅក្នុងមាត់ ភ្នែក និងច្រមុះបុគ្គលដែលនៅជិតអ្នកមានវីរុសកូវីដ-១៩ ខណៈតំណក់ទឹកតូចៗនេះ ក៏អាចធ្លាក់ទៅលើផ្ទៃនៃវត្ថុនានា ហើយឆ្លងមកមនុស្សដោយបុគ្គលយកដៃទៅប៉ះផ្ទៃនៃវត្ថុទាំងនោះ ហើយមកប៉ះពាល់ជាមួយមាត់ ភ្នែក ច្រមុះ ដោយមិនបានលាងសម្អាតដៃឱ្យបានត្រឹមត្រូវ។
ក្រសួងបញ្ជាក់ថា៖ «ដូច្នេះ ដើម្បីបញ្ចៀសពីហានិភ័យខ្ពស់ដែលពិបាកនឹងប៉ាន់ស្មានបាននៃការចម្លងវីរុសដ៏កាចសាហាវនេះចូលក្នុងសហគមន៍ ក្រសួងសុខាភិបាលសូមធ្វើការអំពាវនាវនិងណែនាំដល់បងប្អូនសាធារណជនទាំងអស់ ត្រូវតែនាំគ្នាបន្តកិច្ចការពារសុខភាពរបស់ខ្លួនដោយបុគ្គលគ្រប់រូបត្រូវអនុវត្តវិធានការសាមញ្ញៗ ដូចជា ការរក្សាគម្លាតសុវត្ថិភាព រួមមានការរក្សាគម្លាតសុវត្ថិភាពសង្គម និងការរក្សាគម្លាតសុវត្ថិភាពបុគ្គលជាចំបាច់ រួមជាមួយនឹងការអនុវត្តអនាម័យដៃស្អាតជានិច្ច និងការពាក់ម៉ាស់នៅពេលចាំបាច់ ជាពិសេសពេលធ្វើដំណើរ ឬចល័ត ឬមានបម្លាស់ទីពីកន្លែងមួយទៅកន្លែងមួយ»។
ក្រសួងសុខាភិបាលក៏បានណែនាំឱ្យចៀសវាងការឱប ថើប ចាប់ដៃ និងរក្សាគម្លាតពីគ្នាឱ្យបានយ៉ាងតិច១,៥ម៉ែត្រឡើង។
ក្រសួងបន្ថែមថា គួរចៀសវាង ឬបើចៀសមិនបាន ត្រូវកាត់បន្ថយឱ្យបានជាអតិបរមានូវការជួបជុំគ្នាក្នុងសង្គមដែលមានមនុស្សម្នាច្រើន ដូចជា ការរៀបអាពាហ៍ពិពាហ៍ ពិធីបុណ្យនានា ការប្រគុំតន្ត្រី ការដើរលេងជួបជុំបរិភោគអាហារជាមួយមិត្តភក្តិខាងក្រៅផ្ទះ ការជួបជុំពិធីខួបកំណើត ឬការធ្វើពិធីឡើងផ្ទះក្នុងទ្រង់ទ្រាយធំ និងការធ្វើដំណើរកម្សាន្តប្រមូលផ្តុំគ្នាច្រើន ជាដើម។
ក្រសួងបញ្ជាក់ទៀតថា អ្នកដែលមានហានិភ័យខ្ពស់នៃការចម្លងជំងឺ ដូចជា ជនចាស់ជរា ជនដែលមានជំងឺប្រចាំកាយ ស្ត្រីមានផ្ទៃពោះ និងកុមារតូចៗ ជាដើម មិនត្រូវចូលរួមដំណើរ ជួបប្រជុំគ្នា ឬបើមានការចាំបាច់បំផុតនោះ ត្រូវតែមានការអនុវត្តកិច្ចការពារខ្លួនឱ្យបានល្អ៕
