រដ្ឋាភិបាលហុងគ្រីបានសម្រេចរឹតបន្ដឹងវិធានការនានាដើម្បីទប់ស្កាត់ការរីករាលដាលនៃវីរុសកូរ៉ូណា ខណៈដែលមន្ទីរពេទ្យនានានៅប្រទេសនេះ អាចកំពុងតែជួបភាពលំបាកលំបិនក្នុងការដោះស្រាយកំណើននៃការឆ្លងវីរុសផ្លូវដង្ហើមមួយនេះ។
របាយការណ៍អង្គការសុខភាពពិភពលោក (WHO) បង្ហាញថា គិតត្រឹមថ្ងៃម្សិលមិញនេះ ហុងគ្រីរកឃើញអ្នកឆ្លងវីរុសកូរ៉ូណាដល់ទៅជិត១១ម៉ឺន៥ពាន់នាក់ ក្នុងនោះគ្រាន់តែថ្ងៃម្សិលមិញ ប្រទេសនេះមានអ្នកឆ្លងថ្មីដល់ទៅ៥ ១៦២នាក់។
បើតាមរបាយការណ៍របស់ WHO មនុស្សដល់ទៅជិត២ ៥០០នាក់ហើយ បានស្លាប់ដោយសារជំងឺកូវីដ១៩នៅក្នុងប្រទេសហុងគ្រី ដែលធ្វើឱ្យប្រទេសមួយនេះជាប់លំដាប់ទី២០នៅតំបន់អឺរ៉ុប នាមជាប្រទេសមានអ្នកឆ្លងវីរុសច្រើនជាងគេ។
សារព័ត៌មាន Hungary Today បានចុះផ្សាយថា នាយករដ្ឋមន្ត្រីហុងគ្រី លោក វិកទ័រ អូបាន បានប្រកាសនៅលើហ្វេសប៊ុកលោកកាលពីថ្ងៃម្សិលមិញ អំពីការរឹតបន្ដឹងវិធានការនានា ដើម្បីទប់ស្កាត់ការឆ្លងរីករាលដាលនៃវីរុសកូរ៉ូណា។
បើតាមសារព័ត៌មានដដែលនេះ ប្រសិនបើរដ្ឋសភាហុងគ្រីផ្ដល់អំណាចពិសេសនេះ រដ្ឋាភិបាលហុងគ្រីនឹងពង្រីកការដាក់ប្រទេសក្នុងគ្រាអាសន្នឱ្យអនុវត្តចន្លោះពីម៉ោង៨យប់ដល់ម៉ោង៥ព្រឹក ដោយរឹតត្បិតលើពេលវេលានៃការបើកហាងលក់ដូរនិងសេវាដទៃទៀត។
នៅពេលដាក់ក្នុងគ្រាអាសន្ន លោក អូបាន និយាយថា រដ្ឋាភិបាលហាមឃាត់រាល់ការជួបជុំទាំងអស់ ហើយភោជនីយដ្ឋាននឹងត្រូវបិទទ្វារ លើកលែងតែភោជនីយដ្ឋានដែលផ្ដល់ការដឹកជញ្ជូនទៅដល់គេហដ្ឋានប៉ុណ្ណោះ។
សម្រាប់សណ្ឋាគារវិញ រដ្ឋាភិបាលហាមឃាត់មិនឱ្យទទួលភ្ញៀវទេសចរទេ ប៉ុន្តែអាចទទួលអ្នកដំណើរជាអ្នកជំនួញបាន។
ហុងគ្រីបានហាមឃាត់ការជួបជុំមនុស្សលើសពី១០នាក់ មិនថានៅតាមកម្មវិធីឯកជនឬកម្មវិធីជួបជុំលក្ខណៈគ្រួសារនោះឡើយ។
ខណៈព្រឹត្តិការណ៍កីឡាត្រូវបានអនុញ្ញាតឱ្យបន្តរៀបចំដោយបិទទ្វារនោះ រដ្ឋាភិបាលហុងគ្រី បានបិទសាលារៀនកម្រិតមហាវិទ្យាល័យនិងអនុវិទ្យាល័យ ដោយតម្រូវឱ្យការបង្រៀននិងការរៀនសូត្រ ត្រូវធ្វើឡើងតាមប្រព័ន្ធអនឡាញ ប៉ុន្តែសាលារៀនសម្រាប់កុមារអាយុក្រោម១៤ឆ្នាំ នឹងត្រុវអនុញ្ញាតឱ្យបន្តបើកទ្វារដដែល។
ចំណែកឯបុគ្គលិកមន្ទីរពេទ្យ គ្រូបង្រៀនថ្នាក់មត្តេយ្យ និងបុគ្គលិកផ្នែកថែទាំ ត្រូវបានតម្រូវឱ្យធ្វើតេស្តជាប្រចាំនៅរៀងរាល់មួយសប្ដាហ៍៕
