ក្រសួងសុខាភិបាលរកឃើញអ្នកឆ្លងជំងឺកូវីដ១៩ ម្នាក់ទៀត ដែលទើបធ្វើដំណើរត្រឡប់មកពីសហរដ្ឋអាមេរិក ខណៈអ្នកប៉ះពាល់ក្នុងព្រឹត្តិការណ៍ថ្ងៃ៣វិច្ឆិកា បានកើនដល់១ ៤៨១នាក់។
សេចក្តីប្រកាសព័ត៌មានក្រសួងសុខាភិបាលចេញផ្សាយនៅថ្ងៃនេះ ឱ្យដឹងថា អ្នកឆ្លងថ្មីនេះគឺជាស្ត្រីជនជាតិអាមេរិកាំងដែលបានធ្វើដំណើរមកពីសហរដ្ឋអាមេរិក ហើយបន្តជើងហោះហើរនៅប្រទេសកូរ៉េខាងត្បូង មកដល់កម្ពុជា នៅថ្ងៃទី០៤ ខែវិច្ឆិកា ឆ្នាំ២០២០។
ក្រសួងបញ្ជាក់ថា ស្ត្រីជនជាតិអាមេរិកាំងរូបនេះ ត្រូវបានរកឃើញវិជ្ជមានកូវីដ-១៩ បន្ទាប់ពីលទ្ធផលធ្វើតេស្តវត្ថុសំណាកលើកទី២ នៅថ្ងៃទី៧ នៃការធ្វើចត្តាឡីស័ក ហើយបច្ចុប្បន្ន អ្នកជំងឺត្រូវបានដាក់ឱ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយឡែក អ្នកដំណើរតាមជើងហោះហើរជាមួយស្ត្រីជនជាតិអាមេរិកាំង ចំនួន៦៥នាក់ ដែលបានធ្វើតេស្តលើកទី១ អវិជ្ជមានវីរុសកូវីដ-១៩នោះ ក្រសួងថា បច្ចុប្បន្ន ពួកគេត្រូវបានដាក់ឱ្យធ្វើចត្តាឡីស័កនៅតាមសណ្ឋាគារមួយចំនួន នៅវិទ្យាល័យពោធិ៍ចិនតុង និងនៅស្ថានទូតអាមេរិក។
ចំពោះអ្នកប៉ះពាល់រដ្ឋមន្ត្រីការបរទេសហុងគ្រី ក្នុងព្រឹត្តិការណ៍ថ្ងៃ៣វិច្ឆិកា ក្រសួងបានធ្វើតេស្តសរុបចំនួន១ ៤៨១វត្ថុសំណាក គិតមកដល់ថ្ងៃទី១១ ខែវិច្ឆិកា ក្នុងនោះ មានអ្នកឆ្លងជំងឺកូវីដ១៩ មានចំនួន៤នាក់ដដែល។
ក្រសួងនឹងបន្តតាមដានលទ្ធផលតេស្តដែលនៅសល់ចំនួន៥០វត្ថុសំណាកទៀត នៅថ្ងៃពុធនេះ។
គិតត្រឹមថ្ងៃទី១១ ខែវិច្ឆិកា ឆ្នាំ២០២០ កម្ពុជាមានអ្នកឆ្លងកូវីដ-១៩ សរុបចំនួន៣០១នាក់ (ស្រី៦១នាក់ និងបុរស២៤០នាក់) ក្នុងនោះចំនួនអ្នកព្យាបាលជាសះស្បើយចំនួន២៨៨នាក់ និងអ្នកសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ចំនួន១៣នាក់៕
