រដ្ឋាភិបាលបានប្រកាសបញ្ចេញម៉ាស់ចំនួន២លានសម្រាប់ចែកដល់ប្រជាពលរដ្ឋរស់នៅក្នុងសហគមន៍ក្រីក្រនៅក្នុងរាជធានីភ្នំពេញ ចំពេលមានក្ដីបារម្ភអំពីការរីករាលដាលនៃវីរុសកូរ៉ូណា បន្ទាប់ពីដំណើរទស្សនកិច្ចរបស់គណៈប្រតិភូហុងគ្រីនៅកម្ពុជា។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលនិយាយថា លោកនាយករដ្ឋមន្ត្រី ហ៊ុន សែន បានបញ្ជាឱ្យបញ្ចេញម៉ាស់ក្រណាត់ចំនួន២លានពីឃ្លាំងយុទ្ធសាស្ត្ររបស់រដ្ឋាភិបាល ហើយផ្ដល់ទៅសាលារាជធានីភ្នំពេញ សម្រាប់ចែកចាយទៅដល់ប្រជាពលរដ្ឋខ្វះខាតក្នុងសហគមន៍ក្រីក្រ។
រដ្ឋាភិបាលកម្ពុជាបានសម្រេចបែបនេះ ចំពេលមានក្ដីបារម្ភចំពោះការឆ្លងរីករាលដាលនៃវីរុសកូរ៉ូណា ឬជំងឺកូវីដ១៩ ក្រោយពីដំណើរទស្សនកិច្ចរបស់រដ្ឋមន្ត្រីការបរទេស និងពាណិជ្ជកម្មហុងគ្រី លោក ភីធ័រ ស៊ីចាតូ នៅកម្ពុជា កាលពីថ្ងៃអង្គារសប្ដាហ៍មុន។
ប្រមុខការទូតហុងគ្រីរូបនេះ ត្រូវបានធ្វើតេស្តនិងរកឃើញឆ្លងវីរុសកូរ៉ូណានៅពេលលោកធ្វើដំណើរចាកចេញពីកម្ពុជាទៅដល់ប្រទេសថៃនៅក្នុងថ្ងៃអង្គារដដែលនោះ។
ក្នុងរយៈពេល១សប្ដាហ៍មកនេះ កម្ពុជាបានយកសំណាកពីមនុស្សដល់ទៅជិត១ ៥០០នាក់ យកមកធ្វើតេស្ត បន្ទាប់ពីពួកគេបានពាក់ព័ន្ធដោយផ្ទាល់និងដោយប្រយោលទៅនឹងដំណើរទស្សនកិច្ចរបស់គណៈប្រតិភូហុងគ្រី។
ក្នុងនោះ កម្ពុជាបានរកឃើញមនុស្ស៤នាក់ហើយឆ្លងវីរុសកូរ៉ូណា បន្ទាប់ពីពួកគេបានពាក់ព័ន្ធនឹងដំណើរទស្សនកិច្ចមួយនេះ៕
