មន្ត្រីរដ្ឋាភិបាល អះអាងថា អ្នកជាប់ឃុំជាង១ពាន់នាក់ នៅខេត្តបន្ទាយមានជ័យ ក្នុងចំណោម ១៦០០នាក់ ដែលសមត្ថកិច្ចជម្លៀសចេញពីជំនន់ទឹកភ្លៀង កាលពីខែមុននោះ ត្រូវបានបញ្ជូនទៅកន្លែងចាស់វិញជិតអស់ហើយ គិតត្រឹមនៅថ្ងៃព្រហស្បតិ៍នេះ។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ លោក នុត សវនា ប្រាប់ VOD ថា នៅថ្ងៃទី១២ខែវិច្ឆិកានេះ អ្នកជាប់ឃុំចំនួន ១៣១៩នាក់ ត្រូវបញ្ជូនទៅឃុំខ្លួននៅពន្ធនាគារខេត្តបន្ទាយមានជ័យវិញ ។
លោកបន្តថា អ្នកជាប់ឃុំជិត ៣០០នាក់ទៀត មិនទាន់បានបញ្ជូនទៅវិញនៅឡើយទេ ក្នុងនោះជាង ២០០នាក់ នៅមណ្ឌលអប់រំ ម៣ ឬពន្ធនាគារត្រពាំងផ្លុង ខេត្តត្បូងឃ្មុំ និងជាង៥០នាក់ទៀត នៅខេត្តឧត្តរមានជ័យ។
ពន្ធនាគារខេត្តបន្ទាយមានជ័យ កាលពីខែមុននេះ បានរងការជន់លិចដោយជំនន់ទឹកភ្លៀង ខណៈនោះអាជ្ញាធរ បានជម្លៀសអ្នកជាប់ឃុំ ១៦០០នាក់ ទៅដាក់នៅមណ្ឌលអប់រំចំនួន៤ផ្សេងទៀត។
ខេត្តទាំងនោះ មានពន្ធនាគារខេត្តកំពង់ធំ សៀមរាប ឧត្តរមានជ័យ និងនៅមណ្ឌលអប់រំកែប្រែទី៣ ឬពន្ធនាគារត្រពាំងផ្លុង ខេត្តត្បូងឃ្មុំជាប់ព្រំដែនវៀតណាម៕
