ក្រុមស្ត្រីដែលជាភរិយានិងសាច់ញាតិអតីតសកម្មជនបក្សប្រឆាំង បរាជ័យជាថ្មីក្នុងការដាក់ញត្តិថ្វាយព្រះមហាក្សត្រនៅព្រះបរមរាជវាំង ដោយសារអាជ្ញាធរខណ្ឌដូនពេញទប់ស្កាត់។
នៅព្រឹកថ្ងៃសុក្រនេះ ក្រុមស្ត្រីទាំងនោះដែលមានសមាជិកប្រហែល២០នាក់ បាននាំគ្នាយកញត្តិទៅដាក់នៅព្រះបរមរាជវាំង ដើម្បីស្នើសុំព្រះមហាក្សត្រព្រះរាជទានជួយអន្តរាគមន៍ទៅស្ថាប័នពាក់ព័ន្ធ ឱ្យមានការដោះលែងស្វាមីនិងឪពុករបស់ពួកគេដែលកំពុងជាប់ឃុំនៅពន្ធនាគារ។
ប៉ុន្តែការទៅដាក់ញត្តិនេះ ត្រូវបានសមត្ថកិច្ចនិងសន្តិសុខខណ្ឌដូនពេញ រារាំងនិងទប់ស្កាត់ដោយមិនឱ្យពួកគេយកញត្តិទៅដាក់ ហើយក៏មិនឱ្យទៅឈរជិតរបងច្រកទ្វារខាងត្បូងព្រះបរមរាជវាំងដែរ។
អ្នកស្រី សេង ចាន់ថន ជាភរិយារបស់ លោក ស៊ុន ធន់ អតីតសមាជិកក្រុមប្រឹក្សាខេត្តកំពង់ធំនៃអតីតគណបក្សសង្រ្គោះជាតិ និយាយថា ការដែលពួកគាត់មកសុំឱ្យព្រះមហាក្សត្រព្រះរាជទានអន្តរាគមន៍នេះ ដោយសារតែអ្នកស្រីអស់ជំនឿលើប្រព័ន្ធតុលាការដែលចោទប្រកាន់លើប្ដីរបស់គាត់ដោយអយុត្តិធម៌។
អ្នកស្រីថា៖ «គាត់ [ប្តីអ្នកស្រី] អត់មានកំហុសដូចការចោទប្រកាន់ទេ ពាក្យ ”ក្បត់ជាតិ” មួយម៉ាត់ ទាល់តែគាត់លក់ជាតិ លក់ទឹកដី តែគាត់អត់មានធ្វើអ៊ីចឹងទេ។ ដូច្នេះ ទើបខ្ញុំមករក ព្រះអង្គ [ព្រះមហាក្សត្រ] ឱ្យព្រះអង្គជួយ ព្រោះខាងខ្ញុំតវ៉ាប៉ុន្មានដងហើយនៅមិនទាន់ដាច់ស្រេចទេ អ៊ីចឹងស្វាមីពួកខ្ញុំនៅតែជាប់ក្នុងពន្ធនាគារដោយវេទនា ហើយខ្ញុំក៏វេទនាដែរ»។
ភរិយាលោក កាក់ កុម្ភារ អតីតសកម្មជនបក្សប្រឆាំងមួយរូបទៀត គឺអ្នកស្រី ព្រុំ ចន្ថា បង្ហាញការខកចិត្តនៅពេលមករកព្រះរាជអន្តរាគមន៍ពីព្រះមហាក្សត្រឱ្យជួយ ប៉ុន្តែបែរជាមិនមានមន្ត្រីព្រះបរមរាជវាំងមកទទួលញត្តិ ខណៈអាជ្ញាធរបានរារាំងនិងរុញមិនឱ្យពួកគាត់ទៅជិតរបងព្រះបរមរាជវាំងទៀត។
អ្នកស្រីថា៖ «មានតែព្រះអង្គទេដែលអាចជួយកូនចៅបាន បើព្រះអង្គយុត្តិធម៌ ព្រះអង្គសុក្រឹត្យ មែន ព្រះអង្គជួយកូនចៅផង សម្ដេចម៉ែជួយផង កូនចៅវេទនាណាស់ មកឈរហាលថ្ងៃ គេដេញត្រណាត់ត្រណែង គេធ្វើបាបសព្វសារពើ មានអ្នកវាយ មានអ្នកតប់ មានអ្នកទាញ មកមើលកូនចៅឈរហាលថ្ងៃយំស្រែក ដើម្បីឱ្យសម្ដេចម៉ែជួយ តើយុត្តិធម៌នៅត្រង់ណា? ជួយផងទៅ។ ជួយលើកលែងការចោទប្រកាន់របស់តុលាការ រាជរដ្ឋាភិបាលទាំងមូល ឡាយព្រះហត្ត [ព្រះហត្តលេខា] លើកលែងទោសទាំងអស់ឱ្យប្ដីកូនចៅមានសេរីភាពមក»។
នេះជាលើកទី២ ដែលក្រុមស្ត្រីជាភរិយានិងសាច់ញាតិអតីតសកម្មជនបក្សប្រឆាំង ទៅស្វែងរកព្រះរាជអន្តរាគមន៍ពីព្រះមហាក្សត្រ ក្រោយពីពួកគេបរាជ័យក្នុងការដាក់ញត្តិម្តងរួចមកហើយ កាលពីថ្ងៃសុក្រសប្តាហ៍មុន ដោយសារអាជ្ញាធររារាំងនិងមិនមានមន្ត្រីព្រះបរមរាជវាំងចេញមកទទួលញត្តិ។
តែយ៉ាងណា ប្រធានសន្តិសុខខណ្ឌដូនពេញ លោក គឹម វុត្ថា ដែលនៅឈរចាំបញ្ជាក្រុមសន្តិសុខឱ្យរារាំងក្រុមស្រ្តីទាំងនោះ បានថ្លែងថា ព្រះបរមរាជវាំងមិនមែនជាកន្លែងដែលទទួលញត្តិនោះទេ។
លោកថា៖ «ទៅផ្ទះបាន តែបើមិនទៅទេ ឱ្យនៅកន្លែងហ្នឹង មិនឱ្យចេញទេណា។ អ្នកណា ចេញ រឿងជាមួយខ្ញុំហើយ»។
បើតាមក្រុមស្ត្រីទាំងនោះ អះអាងថា ស្វាមីរបស់ពួកគាត់ដែលជាអតីតសកម្មជននិងសមាជិកក្រុមប្រឹក្សាមកពីអតីតគណបក្សប្រឆាំង ត្រូវបានតុលាការចោទប្រកាន់ពីបទ «ញុះញង់ និងរួមគំនិតក្បត់» ពាក់ព័ន្ធសំណុំរឿងវិលចូលស្រុករបស់លោក សម រង្ស៊ី មេដឹកនាំអតីតគណបក្សសង្គ្រោះជាតិ កាលពីឆ្នាំ២០១៩។ ប៉ុន្តែក្រុមស្ត្រីថា ស្វាមីរបស់ពួកគាត់ទាំងអស់គ្នាមិនបានប្រព្រឹត្តដូចការចោទប្រកាន់របស់តុលាការឡើយ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា សង្កេតឃើញថា ការណ៍ដែលភរិយានិងកូនៗរបស់អតីតសកម្មជនបក្សប្រឆាំង ទៅដាក់ញត្តិនៅព្រះបរមរាជវាំង នាពេលនេះ ដោយសារតែកន្លងមក ពួកគេបានដាក់ញត្តិទៅស្ថាប័នពាក់ព័ន្ធ មិនមានដំណោះស្រាយ។ លោកចាត់ទុកការរារាំងនិងទប់ស្កាត់របស់អាជ្ញាធរ ទៅលើភរិយានិងកូនៗអតីតសកម្មជនបក្សប្រឆាំងមិនឱ្យដាក់ញត្តិនេះ ថាជាការបំបិទសិទ្ធិសេរីភាពបញ្ចេញមតិរបស់ប្រជាពលរដ្ឋ។
លោកថា៖ «ខ្ញុំយល់ថា ការរារាំងរបស់អាជ្ញាធរហាក់ដូចជាមិនមែនជារឿងសមហេតុផលទេ ពីព្រោះព្រះហាក្សត្រ ព្រះអង្គជាអ្នកធានាផ្តល់នូវយុត្តិធម៌សង្គមទៅប្រជាពលរដ្ឋ។ ការផ្ដល់ព័ត៌មានទៅព្រះអង្គ គឺជាផ្នែកមួយក្នុងការជួយ ដើម្បីឱ្យសេនាធិការក្រុមការងាររបស់ព្រះអង្គអាចជួយការងារជាមួយស្ថាប័នពាក់ព័ន្ធទាំងអស់ហ្នឹង ដើម្បីជួយរកដំណោះស្រាយក្នុងរឿងយុត្តិធម៌សម្រាប់ពួកគាត់»។
រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៨ ចែងថា ព្រះមហាក្សត្រទ្រង់ជានិមិត្តរូបនៃឯកភាពជាតិ និងនិរន្តរភាពជាតិ។ ព្រះមហាក្សត្រទ្រង់ជាអ្នកធានាឯករាជ្យជាតិ អធិបតេយ្យភាព និងបូរណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិនិងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ។
បើតាមក្រុមស្ត្រីទាំងនោះ ពួកគេបានធ្វើយុទ្ធនាការតវ៉ាទាមទារឱ្យដោះលែងស្វាមីនិងឪពុករបស់ពួកគាត់ពីក្រសួង ស្ថាប័នពាក់ព័ន្ធ និងអង្គការទូតនានា អស់រយៈពេល២២សប្តាហ៍មកហើយ គិតមកដល់ថ្ងៃសុក្រ ទី១៣ ខែវិច្ឆិកានេះ។ កន្លងមក ពួកគេបានដើរដាក់ញត្តិនៅស្ថានទូតតំណាងឱ្យប្រទេសមហាអំណាចធំៗមួយចំនួន ដូចជា សហរដ្ឋអាមេរិក សហភាពអឺរ៉ុប អង់គ្លេស អូស្ត្រាលី បារាំង និងជប៉ុន ជាដើម៕
