ស្ថានឯកអគ្គរាជទូតកម្ពុជាប្រចាំប្រទេសម៉ាឡេស៊ី ឱ្យដឹងថា ចាប់ពីពាក់កណ្តាលខែវិច្ឆិកានេះទៅ ប្រទេសម៉ាឡេស៊ី តម្រូវឱ្យពលរដ្ឋខ្មែរ និងអ្នកដែលមានទីលំនៅអចិន្ត្រៃយ៍ឬបណ្តោះអាសន្ននៅទីនោះ ត្រូវទូរទាត់ប្រាក់ធ្វើចត្តាឡីស័កនិងចំណាយផ្សេងៗជាមុន មុនពេលចូលទៅកាន់ប្រទេសនេះ។
សេចក្តីជូនដំណឹងរបស់ស្ថានឯកអគ្គរាជទូតកម្ពុជានៅទីក្រុងកូឡាឡាំពួរ ប្រទេសម៉ាឡេស៊ី នៅថ្ងៃទី១២ ខែវិច្ឆិកា ឆ្នាំ២០២០ បានឱ្យដឹងថា ការតម្រូវបែបនេះបានធ្វើឡើងតាមកំណត់ទូតរបស់ក្រសួងការបរទេសម៉ាឡេស៊ី និងសេចក្តីជូនដំណឹងរបស់ស្ថានទូត ស្តីពីការធ្វើដំណើរចូលប្រទេសម៉ាឡេស៊ី ក្នុងអំឡុងពេលនៃការអនុវត្តបទបញ្ជាត្រួតពិនិត្យការធ្វើដំណើរជាមួយនឹងលក្ខខណ្ឌបន្ធូរបន្ថយ។
ករណីនេះ ស្ថានទូតជូនដំណឹងដល់ប្រជាពលរដ្ឋខ្មែរដែលជាសិស្ស-និសិត្ស ពលករ-ពលការិនី រួមទាំងអ្នកដែលមានទីលំនៅអចិន្ត្រៃយ៍ឬបណ្តោះអាសន្ននៅប្រទេសម៉ាឡេស៊ី ឱ្យដឹងថា ចាប់ពីថ្ងៃទី១៥ ខែវិច្ឆិកា ឆ្នាំ២០២០តទៅ ការបង់ថវិកាថ្លៃធ្វើចត្តាឡីស័កនិងចំណាយផ្សេងៗ ត្រូវធ្វើការទូរទាត់តាមប្រព័ន្ធអេឡិចត្រូនិច MySafe Travel ឬ MyQr មានក្នុងកម្មវិធី MyEG Application។
កម្មវិធីទាំងនេះ អាចរកបាននៅក្នុងគេហទំព័រ www.moh.gov.my ឬ www.madma.gov ឬ www.myeg.com.my ។
ស្ថានទូតបញ្ជាក់ថា៖ «តម្លៃធ្វើចត្តាឡីស័កនិងចំណាយផ្សេងៗ ត្រូវធ្វើការទូរទាត់មុនពេលចូលមកម៉ាឡេស៊ី និងត្រូវបង្ហាញវិកយបត្រជូនអាជ្ញាធរពាក់ព័ន្ធម៉ាឡេស៊ី ពេលមកដល់អាកាសយានដ្ឋានអន្តរជាតិ»៕
