កម្ពុជាអះអាងថា ការនាំអង្ករចេញទៅក្រៅប្រទេសក្នុងរយៈពេល១០ខែ នៃឆ្នាំនេះ មានការកើនឡើងចំនួនជាង៥សែនតោន ដែលកំណើននេះស្មើនឹង ១៧,១១% ហើយទីផ្សារដែលទទួលទិញច្រើនជាងគេគឺចិន។
ក្នុងគេហទំព័ររបស់សហព័ន្ធស្រូវអង្ករកម្ពុជា បានឲ្យដឹងថា ទីផ្សារចម្បងនៃការនាំចេញអង្កររបស់កម្ពុជា ទៅកាន់ប្រទេសចិន និងតំបន់ស្វយ័តរបស់ចិន (ហុងកុង ម៉ាកាវ តៃវ៉ាន់) មានចំណែក ៣៦%។
រីឯបណ្តាប្រទេសចំនួន២៧នៅក្នុងទ្វីបអឺរ៉ុប មានចំណែក៣២% ហើយទីផ្សារបន្តបន្ទាប់ មានដូចជា បណ្តាប្រទេសជាសមាជិកអាស៊ានចំនួន៦ មានចំណែក១៣%។ បណ្តាប្រទេសនៅក្នុងទ្វីបអាហ្រិ្វកចំនួន១០ មានចំណែក៩% បណ្តាប្រទេសនៅក្នុងទ្វីបអាស៊ី និងអូសេអានី ជាពិសេសគឺប្រទេសអូស្រ្តាលី ញូហ្សេឡេន មានចំណែក៦% បណ្តាដែនកោះដែលស្ថិតនៅក្រោមការគ្រប់គ្រងរបស់ប្រទេសបារាំង និងអាមេរិក មានចំណែក២% រួមទាំងបណ្តាប្រទេសនៅក្នុងទ្វីបអាមេរិកខាងជើង និងប្រទេសនៅក្នុងមជ្ឈឹមបូព៌ា មានចំណែក ២%។
ករណីនេះ សហព័ន្ធស្រូវអង្ករបញ្ជាក់ថា គិតត្រឹម១០ខែ នៃឆ្នាំ២០២០នេះ តួលេខនាំអង្ករចេញទៅក្រៅប្រទេសទាំងនោះ មានចំនួន ៥៣៦ ០៣៥ តោន ដែលកំណើននេះស្មើនឹង ១៧.១១% បើប្រៀបធៀបនឹងរយៈពេលដូចគ្នាក្នុងឆ្នាំ២០១៩។
ចំណែកឯចំណូលវិញ សហព័ន្ធស្រូវអង្ករឱ្យដឹងដែរថា កម្ពុជាទទួលបានពីការនាំចេញអង្ករក្នុងរយៈពេល១០ខែ ឆ្នាំ២០២០ កើនឡើងជិត៤៧លានដុល្លារសហរដ្ឋអាមេរិក ដែលកំណើននេះស្មើនឹង១៥% បើប្រៀបធៀបនឹងរយៈពេលដូចគ្នាកាលពីឆ្នាំមុន៕
