លោកសុខ ទូចអះអាងថាក្រុមអ្នកកាប់ឈើក្នុងឧទ្យានលោកមិនមែនជាមនុស្សសាមញ្ញ

ប្រធានរាជបណ្ឌិតសភាកម្ពុជាបារម្ភពីឈើធំៗនៅក្នុងឧទ្យានដែលលោកគ្រប់គ្រងត្រូវកាប់បំផ្លាញអស់ហើយថា ក្រុមកាប់បំផ្លាញមិនមែនជាមនុស្សសាមញ្ញទេគឺក្រុម​ដែលមានការទំនាក់ ទំនងគ្នាជាប្រព័ន្ធ។​

នៅម៉ោងជាង១១យប់ថ្ងៃទី១៣ខែវិច្ឆិកា លោក សុខ ទូច អះអាងថា លោកបានឃាត់ជនសង្ស័យ និងរថយន្តដឹកឈើដែលគ្រោងដឹកចេញពីឧទ្យានរាជបណ្ឌិត្យសភាកម្ពុជា។ លោក សុខ ទូច អះអាងថា លោកបានដឹងគឺអ្នកដែលដឹកឈើនោះមិនមែនជាមនុស្សសាមញ្ញាទេ។​

លោក សុខ ទូច៖«ពេលថ្ងៃគាត់កាប់ ហើយពេលយប់គាត់ដឹក។​ ហើយអ្នកដឹកហ្នឹងយើង ដឹងហើយប្រភពដឹកមិនមែនអ្នកសាមញ្ញទេ មានកម្រិតទំនាក់ទំនងជាប្រព័ន្ធ»។​

លោក សុខ ទូច លើកឡើងថា ក្រុមកាប់ឈើធំៗនៅក្នុងឧទ្យានរាជបណ្ឌិតសភាកម្ពុជា តេជោសែនឫស្សីត្រឹប មានទិដ្ឋភាព។​

លោក សុខ ទូច៖«១-បំផ្លាញមរតកដែលមនុស្សជំនាន់មុនបានបន្សល់ទុក ២-បំផ្លាញឆ្នាំង បាយរបស់ខ្លួនឯង ៣-បំផ្លាញមរតកវប្បធម៌របស់ខ្លួន ៤-បំផ្លាញបរិស្ថាន ៥-រស់មួយថ្ងៃចង្រៃ មួយជាតិ»។

លោក សុខ ទូច បានប្រគល់ជនសង្ស័យ ឈើ និង រថយន្តទៅឱ្យសមត្ថកិច្ច។ លោកក៏ បានបញ្ជាក់ថា បើលោកមិនខិតខំការពារនោះទេ ព្រៃឈើក្នុងឧទ្យានដែលលោក គ្រប់គ្រងនឹង ត្រូវកាប់បំផ្លាញអស់។

 ឧទ្យានរាជបណ្ឌិត្យសភាកម្ពុជា តេជោ សែន ប្ញស្សីត្រឹប មានផ្ទៃដីសរុបចំនួន ១១៤,៣៥គីឡូម៉ែត្រការ៉េ ត្រូវបានបង្កើតឡើងដោយ ព្រះរាជក្រឹត្យ ចុះថ្ងៃទី១៧ ខែមេសា ឆ្នាំ២០១៤ ស្ថិតនៅក្នុង​ ឃុំឆែប១ និង ឃុំឆែប ២​ស្រុកឆែប ខេត្តព្រះវិហារ៕​

អត្ថបទដោយ ម៉ិច ជួឡាយ