សមត្ថកិច្ចបានយកដីកាទៅបិទនៅអតីតស្នាក់ការនៃគណបក្សសង្គ្រោះជាតិ ដើម្បីកោះហៅមនុស្សចំនួន ៦៨នាក់ បន្ថែមទៀតឱ្យចូលសវនាការនៅចុងខែវិច្ឆិកានេះ ពាក់ព័ន្ធរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ។
សមត្ថកិច្ចយកដីការបស់ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ លោក សេង ហៀង បិទនៅស្នាក់ការនៃអតីតគណបក្សសង្គ្រោះជាតិកាលពីថ្ងៃម្សិលមិញនេះ ដើម្បីជូនដំណឹងទៅមនុស្សចំនួន ៦៨នាក់ ឱ្យចូលសវនាការនៅថ្ងៃទី២៦ ខែវិច្ឆិកា ឆ្នាំ២០២០ ខាងមុខនេះ លើសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍។
នៅក្នុងសំណុំរឿងនេះដែរ កាលពីរសៀលថ្ងៃទី៣ ខែវិច្ឆិកា ឆ្នាំ២០២០ សមត្ថកិច្ចក៏បានយកដីកាបង្គាប់ឱ្យលោកសម រង្ស៊ី និងបក្ខពួកចូលខ្លួនចំនួន ៤៦នាក់ផ្សេងទៀត ទៅចូលសវនការ នៅថ្ងៃទី២៦ ខែវិច្ឆិកា ឆ្នាំ២០២០ បិទនៅស្នាក់ការនៃអតីតគណបក្សសង្គ្រោះជាតិផងដែរ។
នៅក្នុងសំណុំរឿងរួមគំនិតក្បត់ ញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឲ្យប្រព្រឹត្តបទឧក្រិដ្ឋជាអាទិ៍ គឺមានមនុស្សសរុបចំនួន ១១៤នាក់ ត្រូវបានកោះឲ្យចូលខ្លួនទៅក្នុងសវនាការនៅថ្ងៃទី២៦ ខែវិច្ឆិកា ឆ្នាំ២០២០ខាងមុខនេះ៕
