សមត្ថកិច្ចបានរារាំងអតីតសកម្មជននិងអ្នកគាំទ្រមិនឱ្យទៅប្រមូលផ្ដុំគ្នានៅមុខទីស្នាក់ការគណបក្សសង្គ្រោះជាតិ ខណៈថ្ងៃនេះជាខួប៣ឆ្នាំនៃការរំលាយអតីតគណបក្សប្រឆាំងមួយនេះ។
កម្លាំងសន្តិសុខចម្រុះជាច្រើននាក់ និងរនាំងដែកត្រូវបានសមត្ថកិច្ចដាក់ពង្រាយនៅជុំវិញបរិវេណទីស្នាក់ការកណ្ដាលអតីតគណបក្សសង្គ្រោះជាតិ នៅសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ក្រៅពីដាក់កម្លាំងពង្រាយនិងរនាំង កម្លាំងសមត្ថកិច្ចក៏មានការត្រួតពិនិត្យយានយន្តនៅខាងមុខអតីតទីស្នាក់ការគណបក្សនេះ ក្រោមហេតុផលថា ដើម្បីពង្រឹងសន្តិសុខ។
អតីតក្រុមប្រឹក្សាឃុំមកគណបក្សសង្គ្រោះជាតិនៅខេត្តស្វាយរៀងម្នាក់ សុំមិនបញ្ចេញឈ្មោះ ប្រាប់វីអូឌីនៅថ្ងៃចន្ទនេះថា ពួកគាត់ដែលជាអតីតសកម្មជនបក្ស គ្រោងនឹងទៅជួបជុំគ្នានៅអតីតទីស្នាក់ការគណបក្ស ដើម្បីបង្ហាញការមិនសប្បាយចិត្តចំពោះការរំលាយអតីតគណបក្សនេះ កាលពី៣ឆ្នាំមុន ប៉ុន្តែត្រូវសមត្ថកិច្ចរារាំងនិងមិនឱ្យពួកគាត់ទៅក្បែរទីនោះឡើយ។
លោកថា៖ «ប្រជាពលរដ្ឋមួយចំនួនមកពីតាមខេត្តដែលគាត់មកកាន់ទុក្ខ [គណបក្សដែលគេរំលាយ] ហើយក៏ជាអតីតក្រុមអ្នកតស៊ូរបស់គណបក្សប្រឆាំង ដើម្បីមកកាន់ទុក្ខនៅទីស្នាក់ការនេះប្រហែល៤ទៅ១០នាក់ ហើយក៏វិលទៅផ្ទះវិញ នេះជាគម្រោង ប៉ុន្តែពេលមកដល់មិនបានដូចបំណង […] សូម្បីតែឡានតាក់ស៊ី [រថយន្តឈ្នួល] ណាដែលមានមនុស្សច្រើន ក៏គេហៅឈប់ពិនិត្យសួរនាំអ៊ីចឹងទៅ»។
លោកបញ្ជាក់ថា ពួកគាត់មិនហ៊ានជម្នះដើម្បីប្រមូលផ្តុំនោះទេ ដោយសារបារម្ភខ្លាចសមត្ថកិច្ចចាប់ខ្លួន។
តំណាងយុវជនមកពីអតីតគណសង្គ្រោះជាតិប្រចាំខេត្តស្វាយរៀង លោក ស៊ុន មករា និយាយថា ពួកគាត់ទៅទីស្នាក់ការអតីតគណបក្សថ្ងៃនេះ ដើម្បីរំឭកខួប៣ឆ្នាំនៃការរំលាយគណបក្ស និងទៅមើលដីកាដែលតុលាការបានយកទៅបិទនៅទីនោះ ថាមានឈ្មោះពួកគាត់ឬអត់តែប៉ុណ្ណោះ។
លោកថា៖ «ខ្ញុំទៅនេះ គឺចង់ទៅមើលឈ្មោះបិទនៅកន្លែងទីស្នាក់ការចាស់នេះផងដែរ ហើយក៏រំឭកអនុស្សាវរីយ៍កន្លែងធ្លាប់ធ្វើការចេញចូលអ៊ីចឹងទៅ ហើយនឹកឃើញអតីតកាលគេរំលាយគណបក្ស»។
អតីតយុវជនគណបក្សប្រឆាំងនៅរាជធានីភ្នំពេញ លោក ឡុញ ស៊ុំសុម៉ា បង្ហាញការសោកស្ដាយដែលសមត្ថកិច្ចមិនឱ្យពួកគាត់ជួបជុំគ្នានៅអតីតទីស្នាក់ការគណបក្សសង្គ្រោះជាតិ។ ក្រៅពីរារាំងមិនឱ្យជួបជុំហើយ លោកថា សមត្ថកិច្ចក៏បានជិះម៉ូតូដេញតាមគាត់តាំងចេញពីស្នាក់ការគណបក្សរហូតដល់ផ្ទះ។ លោកចាត់ទុកសកម្មភាពនេះថា ជាការបំបិទសិទ្ធិសេរីភាពនិងគំរាមកំហែងពួកគាត់មិនឱ្យចេញតស៊ូមតិ។
លោកថា៖ «ខ្ញុំគ្រាន់តែដឹងថា អ្វីដែលខ្ញុំធ្វើរាល់ថ្ងៃមិនខុសច្បាប់ទេ ដោយសារយើងគ្រាន់តែអង្គុយផឹកកាហ្វេនៅក្បែរហ្នឹង រឿងអីគេតាមខ្ញុំដល់ផ្ទះ។ ខ្ញុំមានការមិនពេញចិត្តនឹងទង្វើរបស់អាជ្ញាធរទេ»។
អភិបាលរងខណ្ឌមានជ័យ លោក ឌី រ័ត្នខេមរុណ បានបញ្ជាក់យ៉ាងខ្លីថា ការដាក់ពង្រាយកម្លាំងនេះ គឺដើម្បីត្រួតពិនិត្យអាវុធជាតិផ្ទុះតែប៉ុណ្ណោះ។
លោកបានថ្លែងថា៖ «កម្លាំងរបស់យើងដាក់ត្រួតពិនិត្យអាវុធជាតិផ្ទុះ ហើយទី២ ពង្រឹងសន្តិសុខនៅក្នុងមូលដ្ឋានតែប៉ុណ្ណឹងទេ អត់មានពាក់ព័ន្ធអីទេ»។
សន្តិសុខខណ្ឌមានជ័យ សុំមិនបញ្ចេញឈ្មោះ ប្រាប់អ្នកសារព័ត៌មានវីអូឌីថា ការដាក់កម្លាំងពង្រាយនៅជុំវិញទីស្នាក់ការបែបនេះ បន្ទាប់ពីទទួលដំណឹងថា មានក្រុមសកម្មជននិងអ្នកគាំទ្របក្សប្រឆាំងទៅជួបជុំគ្នានៅទីនោះ នៅខួប៣ឆ្នាំនៃការរំលាយអតីតគណបក្សសង្គ្រោះជាតិ។
សន្តិសុខខណ្ឌមានជ័យ បាននិយាយថា៖ «មក [មុខស្នាក់ការ] ហ្នឹង ព្រោះឮថា មានសកម្មជននិងអ្នកគាំទ្របក្សប្រឆាំងមកប្រមូលផ្ដុំនៅទីនេះ»។
នៅថ្ងៃទី១៦ ខែវិច្ឆិកានេះដែរ អតីតគណបក្សសង្គ្រោះជាតិ ក៏បានចេញសេចក្ដីថ្លែងការណ៍មួយថា ទោះបីជារដ្ឋាភិបាលរំលាយគណបក្សនេះអស់រយៈពេល៣ឆ្នាំហើយក៏ដោយ ប៉ុន្តែគណបក្សនេះនៅតែស្ថិតនៅក្នុងបេះដូងរបស់ជាប្រជាពលរដ្ឋខ្មែរដដែល។
សេចក្ដីថ្លែងការណ៍បន្តថា៖ «ទោះបីជាទទួលរងនូវការធ្វើទុក្ខបុកម្នេញឥតឈប់ឈរពីសំណាក់របបឯកបក្សដឹកនាំដោយគណបក្សប្រជាជនកម្ពុជាយ៉ាងណាក៏ដោយ គណបក្សសង្គ្រោះជាតិនៅតែស្ថិតនៅក្នុងក្រអៅបេះដូងរបស់ប្រជាពលរដ្ឋខ្មែររាប់លាននាក់ ជាពិសេសខ្មែរអ្នកស្នេហាជាតិ និងអ្នកស្រឡាញ់សិទ្ធិសេរីភាពនិងលទ្ធិប្រជាធិបតេយ្យគ្រប់មជ្ឈដ្ឋានទាំងក្នុងនិងក្រៅប្រទេស»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានចាត់ទុកការរារាំងរបស់អាជ្ញាធរថា បំបិទសិទ្ធិសេរីភាពប្រជាពលរដ្ឋ។
លោកថា៖ «ការជួបជុំគ្នាដើម្បីធ្វើការសម្ដែងមតិដោយសន្តិវិធី អាហ្នឹងវាជាការរំលោភសិទ្ធិរបស់ពួកគាត់ហើយ ព្រោះសង្គមប្រជាធិបតេយ្យ អាសិទ្ធិក្នុងការជួបជុំទាមទារតវ៉ាសម្ដែងមតិទាំងអស់ហ្នឹង វាជាមូលដ្ឋានគ្រឹះសម្រាប់សង្គមប្រជាធិបតេយ្យ»។
តុលាការកំពូលបានរំលាយគណបក្សសង្គ្រោះជាតិ និងព្យួរសិទ្ធិនយោបាយរបស់ថ្នាក់ដឹកនាំគណបក្សនេះចំនួន១១៨នាក់ ក្នុងម្នាក់ៗចំនួន៥ឆ្នាំ កាលពីថ្ងៃទី១៦ ខែវិច្ឆិកា ឆ្នាំ២០១៧ តាមបណ្តឹងរបស់ក្រសួងមហាផ្ទៃ ដោយចោទថា គណបក្សប្រឆាំងមួយនេះបានឃុបឃិតជាមួយបរទេស តាមរយៈរូបភាពនៃការធ្វើបដិវត្តពណ៌ ដើម្បីផ្តួលរំលំរដ្ឋាភិបាល។
ក្រោយពីរំលាយគណបក្សនេះ មានអតីតសកម្មជនគណបក្សប្រឆាំងសរុបជាង១០០នាក់ហើយ ត្រូវបានកោះឱ្យចូលខ្លួនទៅក្នុងសវនាការ នៅថ្ងៃទី២៦ ខែវិច្ឆិកា ឆ្នាំ២០២០ខាងមុខ ក្រោមបទចោទប្រកាន់ «រួមគំនិតក្បត់ និងញុះញង់ឱ្យមានភាពវឹកវរធ្ងន់ធ្ងរដល់សន្តិសុខសង្គម និងញុះញង់ឱ្យប្រព្រឹត្តបទឧក្រិដ្ឋជាអាទិ៍»៕
