កម្ពុជាដឹកជញ្ជូនម៉ាស់ចំនួន២លាននិងបរិក្ខារពេទ្យផ្សេងទៀតផ្ដល់ទៅប្រទេសឡាវសម្រាប់ប្រយុទ្ធប្រឆាំងនឹងជំងឺកូវីដ១៩ ខណៈប្រទេសជិតខាងកម្ពុជាមួយនេះប្រឈមមុខនឹងការរីករាលដាលនៃវីរុសនេះតិចតួចប៉ុណ្ណោះ។
នៅលើទំព័រហ្វេសប៊ុករបស់លោកនាយករដ្ឋមន្ត្រី ហ៊ុន សែន បានរៀបរាប់ថា រដ្ឋមន្ត្រីក្រសួងការពារជាតិ លោក ទៀ បាញ់ និងរដ្ឋលេខាធិការក្រសួងសុខាភិបាល អ្នកស្រី យក់ សម្បត្តិ ត្រូវបានចាត់តាំងជាតំណាងពិសេសរបស់លោកនាយករដ្ឋមន្ត្រី នៅក្នុងការដឹកជញ្ជូនម៉ាស់និងបរិក្ខារពេទ្យផ្សេងទៀតប្រគល់ជូនប្រទេសឡាវ។
បើតាមទំព័រហ្វេសប៊ុកដដែល ម៉ាស់២លាននិងបរិក្ខារពេទ្យ១២មុខផ្សេងទៀត ត្រូវបានដឹកជញ្ជូនតាមយន្តហោះពិសេសនៅព្រឹកថ្ងៃនេះ ដើម្បីជួយប្រទេសឡាវទប់ស្កាត់ការរីករាលដាលនៃជំងឺកូវីដ១៩។
បើតាមតួលេខកត់ត្រាដោយអង្គការសុខភាពពិភពលោក ប្រទេសឡាវរកឃើញអ្នកឆ្លងជំងឺកូវីដ១៩ សរុប២៤ករណីរហូតមកដល់ថ្ងៃនេះ ក្នុងនោះអ្នកជំងឺដល់ទៅ២៣នាក់ហើយត្រូវបានព្យាបាលជាសះស្បើយ ហើយនៅសល់អ្នកជំងឺម្នាក់ទៀតកំពុងសម្រាកព្យាបាលបន្ត ប៉ុន្តែគ្មាននរណាស្លាប់នោះឡើយ។
ទន្ទឹមគ្នានេះ កម្ពុជាបានរកឃើញអ្នកឆ្លងជំងឺកូវីដ១៩ សរុប៣០២ករណីនៅទូទាំងប្រទេស ក្នុងនោះ អ្នកជំងឺ២៨៩នាក់ត្រូវបានក្រសួងសុខាភិបាលប្រកាសថាបានជាសះស្បើយហើយ ខណៈអ្នកជំងឺ១៣នាក់ទៀតកំពុងស្ថិតក្រោមការព្យាបាលបន្តទៀតនៅឡើយ។
ពីរសប្ដាហ៍ចុងក្រោយនេះ កម្ពុជាបានស្ថិតក្នុងក្ដីបារម្ភអំពីការឆ្លងរីករាលដាលនៃជំងឺកូវីដ១៩ បន្ទាប់ពីដំណើរទស្សនកិច្ចរបស់រដ្ឋមន្ត្រីការបរទេសហុងគ្រី លោក ភីធ័រ ស៊ីចាតូ នៅកម្ពុជាកាលពីថ្ងៃទី៣ ខែវិច្ឆិកា។ គណៈប្រតិភូហុងគ្រីរូបនេះ ត្រូវបានធ្វើតេស្តរកឃើញផ្ទុកជំងឺកូវីដ១៩ នៅពេលលោកធ្វើដំណើរចាកចេញពីប្រទេសកម្ពុជាទៅដល់ប្រទេសថៃនៅក្នុងថ្ងៃដដែលនោះ។
គិតមកដល់ថ្ងៃនេះ មន្ត្រីកម្ពុជា៣រូប និងមន្ត្រីទូតហុងគ្រី១រូប ត្រូវបានរកឃើញផ្ទុកជំងឺកូវីដ១៩ ក្រោយពីពួកគេបានជាប់ពាក់ព័ន្ធដោយផ្ទាល់នៅក្នុងដំណើរទស្សនកិច្ចរបស់ប្រមុខការទូតហុងគ្រីរូបនេះ។
អាជ្ញាធរសុខាភិបាលនិងអាជ្ញាធរពាក់ព័ន្ធដទៃរបស់កម្ពុជា បានហាមឃាត់ការជួបជុំនានា បិទផ្អាកទីតាំងប្រមូលផ្ដុំមនុស្សច្រើនៗ ផ្អាកសាលារៀននៅរាជធានីភ្នំពេញនិងខេត្តកណ្ដាល ដើម្បីទប់ស្កាត់ការរីករាលដាលនៃជំងឺនេះ។
