នាយករដ្ឋមន្ត្រី រដ្ឋមន្ត្រី និងអ្នកពាក់ព័ន្ធមួយចំនួនក្នុងព្រឹត្តិការណ៍៣វិច្ឆិកា បានអះអាងថា លទ្ធផលធ្វើតេស្តលើកទី៤ របស់ពួកគាត់ គឺអវិជ្ជមានវីរុសកូវីដ១៩។
លោកនាយករដ្ឋមន្ត្រី ហ៊ុន សែន បានសរសេរនៅក្នុងទំព័រហ្វេសប៊ុករបស់លោក នៅថ្ងៃទី១៨ ខែវិច្ឆិកា ឆ្នាំ២០២០នេះថា ការធ្វើតេស្តលើកទី៤ ដែលជាការធ្វើតេស្តលើកចុងក្រោយនេះ គឺល្អណាស់សម្រាប់រូបលោកនិងភរិយា ព្រមទាំងអ្នកនៅជាមួយ ដោយលទ្ធផលបញ្ជាក់ថា អវិជ្ជមានវីរុសកូវីដ១៩ទាំងអស់ ពោលគឺពុំមានឆ្លងជំងឺដ៏កាចសាហាវនេះទេ។
លោកបន្តថា ចាប់ពីថ្ងៃស្អែកទៅ លោកនឹងចេញទៅធ្វើការឬហាត់ប្រាណនៅខាងក្រៅដូចមុនថ្ងៃទី៤ ខែវិច្ឆិកា ឡើងវិញ ប៉ុន្តែអំឡុងពេលនេះ លោកក៏រង់ចាំតាមដានលទ្ធផលនៃការធ្វើតេស្តចំពោះប្រជាពលរដ្ឋផ្សេងទៀតផងដែរ។
លោកនាយករដ្ឋមន្ត្រី ហ៊ុន សែន បញ្ជាក់ថា ការប្រកាសបិទបញ្ចប់ព្រឹត្តការណ៍៣វិច្ឆិកា អាចធ្វើទៅបានលុះត្រាតែមនុស្សរហូត១ ៨០២នាក់ នៅតាមរាជធានីនិងខេត្តចំនួន១១ ដែលពាក់ព័ន្ធការធ្វើតេស្ត និងការធ្វើចត្តាឡីស័កបានគ្រប់រយៈពេល១៤ថ្ងៃត្រឹមត្រូវតាមការណែនាំរបស់ក្រសួងសុខាភិបាល។
លោកថា៖ «បញ្ហានេះ ខ្ញុំបានពិភាក្សាយ៉ាងហ្មត់ចត់ជាមួយរដ្ឋមន្ត្រីនិងថ្នាក់ដឹកនាំនៃក្រសួងសុខាភិបាល ប្រតិបត្តិការនៃព្រឹត្តិការណ៍៣វិច្ឆិកា ពិតជាធំធេងនិងស្មុគស្មាញក្នុងការស្វែងរកអ្នកជាប់ពាក់ព័ន្ធ ព្រោះវាទាក់ទងដល់មនុស្សច្រើននៅរាជធានី-ខេត្ត ស្រុក-ខណ្ឌ-ក្រុង ឃុំ-សង្កាត់ និងភូមិជាច្រើន ដែលលំបាកដល់ការស្វែងរក»។
លោកបញ្ជាក់ដែរថា៖ «ការប្រកាសបិទបញ្ចប់ព្រឹត្តិការណ៍៣វិច្ឆិកា មិនមែនមានន័យថា យើងបញ្ចប់ការខិតខំដើម្បីប្រយុទ្ធជាមួយកូវីដ១៩នោះទេ ផ្ទុយទៅវិញ យើងត្រូវខិតខំច្រើនជាងមុន ដើម្បីទប់ស្កាត់ឃាតករលាក់មុខដែលយើងមើលមិនឃើញ តាមរយៈការពាក់ម៉ាស ការលាងដៃ ការរក្សាគម្លាតសុវត្ថិភាព។ល។ តាមការណែនាំរបស់ក្រសួងសុខាភិបាល»។
រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ដែលបានចាប់ដៃផ្ទាល់ជាមួយរដ្ឋមន្ត្រីការបរទេសហុងគ្រីដែលមានផ្ទុកវីរុសកូវីដ១៩នោះ មានប្រសាសន៍ថា លោកបានទៅធ្វើតេស្តលើកទី៤ ជាមួយភរិយានិងមន្ត្រីពាក់ព័ន្ធ នៅព្រឹកថ្ងៃពុធនេះ ដោយលទ្ធផលបង្ហាញថា អវិជ្ជមានវីរុសកូវីដ១៩ទាំងអស់គ្នា។
លោកថា៖ «ក្រុមរបស់ខ្ញុំគឺសុវត្ថិភាពទាំងអស់គ្នា ប៉ុន្តែអ្វីដែលសំខាន់គឺរយៈពេលកន្លងទៅ គឺសំខាន់ផ្ដោតជុំមកលើខ្ញុំទេ ព្រោះខ្ញុំជាតួឯក ដែលធ្វើការទំនាក់ទំនងផ្ទាល់ ដែលមន្ត្រីដទៃទៀតគ្រាន់តែប្រយោល។ អ៊ីចឹងខ្ញុំមានសេចក្ដីរីករាយណាស់ អ្វីដែលជាលទ្ធផលល្អប្រសើរ»។
ចំណែករដ្ឋមន្ត្រីការបរទេសកម្ពុជា លោក ប្រាក់ សុខុន បានអះអាងក្នុងទំព័រហ្វេសប៊ុករបស់លោកដែរថា រូបលោកនិងក្រុមគ្រួសារបានធ្វើតេស្តសុខភាពលើកទី៤រួចរាល់ហើយ ហើយលទ្ធផលក៏បង្ហាញថា អវិជ្ជមានវីរុសកូវីដ១៩ផងដែរ។
អ្នកថតរូបនៅទូរទស្សន៍ហង្សមាស លោក អ៊ីង វុឌ្ឍិន មានប្រសាសន៍ថា រូបលោកបានធ្វើតេស្តលើកទី៤ រួចហើយ ហើយកំពុងរង់ចាំលទ្ធផល។ លោករំពឹងថា នឹងទទួលបានលទ្ធផលអវិជ្ជមាន។
លោកថា៖ «និយាយរួម ក្រែងលោល្ងាចគេបង្ហើបឱ្យដឹងខ្លះ តែលទ្ធផលច្បាស់នៅម៉ោង៧ព្រឹកថ្ងៃស្អែក ប៉ុន្តែបើប្រភពខ្លះ ប្រហែល៤ទៅ៥ល្ងាច អាចដឹងខ្លះហើយ»។
វីអូឌី មិនអាចសុំការអត្ថាធិប្បាយពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន និងលោកស្រី យក់ សម្បត្តិ បានទេ នៅរសៀលថ្ងៃពុធនេះ។
ប្រធានមជ្ឈមណ្ឌលអប់រំប្រជាពលរដ្ឋ ដើម្បីការអភិវឌ្ឍ និងសន្តិភាព លោក យង់ គីមអេង សាទរចំពោះលទ្ធផលនៃការធ្វើតេស្តលើកទី៤ ចំពោះមន្ត្រីរដ្ឋាភិបាល បើទោះបីជាលទ្ធផលតេស្តថ្ងៃនេះមិនទាន់បង្ហាញទាំងអស់ក៏ដោយ។
លោកជំរុញឱ្យក្រសួងសុខាភិបាលនិងស្ថាប័នពាក់ព័ន្ធ បន្តធ្វើការផ្សព្វផ្សាយសារអប់រំពីវិធានការការពារជំងឺកូវីដ១៩ ដល់ប្រជាពលរដ្ឋបន្ថែមទៀត ដើម្បីឱ្យពួកគាត់មានការប្រុងប្រយ័ត្នខ្ពស់និងបញ្ចៀសហានិភ័យនាពេលខាងមុខ ខណៈជំងឺកូវីដនៅតែបន្តរីករាលដាលនៅលើពិភពលោកនៅឡើយ។
លោកថា៖ «ការដែលឃើញមន្ត្រីពាក់ម៉ាស់ ដែលធ្វើឱ្យប្រជាពលរដ្ឋលោកចាប់ផ្ដើមពាក់តាម គាត់ចាប់ផ្ដើមប្រុងប្រយ័ត្ន។ កាលណាអ្នករាជការ មន្ត្រីរដ្ឋាភិបាលអត់ពាក់ម៉ាស់ ប្រជាជនថាមន្ត្រីធំៗមិនពាក់ផង ប្រហែលជាមិនអីទេ គាត់ក៏អត់ពាក់ដែរ អាហ្នឹងដែលធ្វើឱ្យហានិភ័យកើតឡើងនៅក្នុងសង្គម។ អ៊ីចឹងនេះជារឿងមួយសំខាន់ ទាំងប្រជាពលរដ្ឋ ទាំងវិស័យឯកជន ទាំងសង្គមស៊ីវិល អនុវត្តនូវវិធានការក្រសួងសុខាភិបាល ជាពិសេសមន្ត្រី»។
បើតាមក្រសួងសុខាភិបាល មានមនុស្សប្រមាណ២ពាន់នាក់ ត្រូវបានក្រសួងសុខាភិបាលយកវត្ថុសំណាកទៅធ្វើតេស្តរកវីរុសកូវីដ១៩ បន្ទាប់ពីអ្នកទាំងនោះបានប៉ះពាល់ផ្ទាល់និងប្រយោល ក្នុងដំណើរទស្សនកិច្ចរបស់រដ្ឋមន្ត្រីការបរទេសហុងគ្រី លោក ភីធើ ស៊ីចាតូ កាលពីថ្ងៃទី៣ ខែវិច្ឆិកា ក្នុងនោះមានមនុស្សចំនួន៤នាក់បានឆ្លងជំងឺនេះ ប៉ុន្តែបានព្យាបាលជាសះស្បើយម្នាក់។
ក្រសួងសុខាភិបាលបានឱ្យដឹងទៀតថា គិតត្រឹមថ្ងៃទី១៨ ខែវិច្ឆិកា ឆ្នាំ២០២០នេះ កម្ពុជារកឃើញអ្នកឆ្លងជំងឺកូវីដ១៩ ចំនួន៣០៤នាក់ ក្នុងនោះព្យាបាលជាសះស្បើយ២៩១នាក់ និងកំពុងសម្រាកព្យាបាល១៣នាក់៕
