សម្ព័ន្ធអ្នកសារព័ត៌មានកម្ពុជា ហៅកាត់ថា ខេមបូចា (CamboJA) ត្រូវបានជ្រើសរើសជាបេក្ខភាពមួយសម្រាប់ពានរង្វាន់សេរីភាពសារព័ត៌មានឆ្នាំ២០២០នេះ ដែលជ្រើសរើសដោយអង្គការអ្នករាយការណ៍ព័ត៌មានគ្មានព្រំដែន (RSF) មានមូលដ្ឋាននៅក្នុងប្រទេសបារាំង។
ការសម្រិតសម្រាំងបេក្ខភាពសម្រាប់ពានរង្វាន់មួយនេះ ត្រូវបានប្រកាសឱ្យដឹងនៅលើគេហទំព័ររបស់ RSF កាលពីថ្ងៃអង្គារកន្លងមកនេះ។
បើតាមសេចក្ដីប្រកាសព័ត៌មាន ខេមបូចា ត្រូវបានសម្រិតសម្រាំងនៅក្នុងចំណោមអ្នកសារព័ត៌មានអន្តរជាតិ ៧រូប និងស្ថាប័នសារព័ត៌មានអន្តរជាតិចំនួន៤ផ្សេងទៀត មកពីបណ្ដាប្រទេសចំនួន១២។
បេក្ខភាពអ្នកសារព័ត៌មានអន្តរជាតិទាំង៧រូប ដែលត្រូវបានសម្រិតសម្រាំងចុងក្រោយនោះ មានមកពីប្រទេសរុស្ស៊ី ហ្វីលីពីន ឥណ្ឌា អ៊ីរ៉ង់ ប្រេស៊ីល អេហ្ស៊ីប ហុងគ្រី ហើយស្ថាប័នសារព័ត៌មានទាំង៥ដែលត្រូវបានសម្រិតសម្រាំងចុងក្រោយនោះ មានមកពីប្រទេសឌីជីបូទី បារាំង អាហ្វហ្កានីស្ថាន នីហ្ការ៉ាហ្គ័រ និងស្ថាប័នខេមបូចានៅក្នុងប្រទេសកម្ពុជា។
បើតាម RSF ជ័យលាភីពានរង្វាន់សេរីភាពសារព័ត៌មានឆ្នាំ២០២០នេះ នឹងត្រូវប្រកាសឱ្យដឹងនៅថ្ងៃទី៨ ខែធ្នូខាងមុខនេះ នៅឯទីក្រុងតៃប៉ិ កោះតៃវ៉ាន់។
នាយកប្រតិបត្តិខេមបូចា លោក ណុប វី ប្រាប់ថា ការជ្រើសរើសយកខេមបូចាជាបេក្ខភាពជ័យលាភីនៃពានរង្វាន់សេរីភាពសារព័ត៌មាននេះ ឆ្លុះបញ្ចាំងឱ្យឃើញថា ស្ថានភាពសេរីភាពសារព័ត៌មាននៅកម្ពុជា មិនត្រូវបានគេបំភ្លេចចោលនោះឡើយ។
លោក ណុប វី ប្រាប់ថា៖ «អ្វីដែលសំខាន់គឺចង់បង្ហាញថា ស្ថានភាពនៃសេរីភាពសារព័ត៌មាននៅកម្ពុជាយើង មិនត្រូវបានដាក់ឱ្យនៅដាច់ដោយឡែកនោះទេ។ នេះមានន័យថា អ្នកផ្សេងទៀតនៅលើពិភពលោក គេតាមដាន គេសង្កេតមើល គេឃ្លាំមើលចំពោះការវិវត្តនៃស្ថានភាពសេរីភាពសារព័ត៌មាននៅក្នុងប្រទេសកម្ពុជាយើង»។
សន្ទស្សន៍សេរីភាពសារព័ត៌មានពិភពលោក ចេញដោយ RSF បង្ហាញថា ចំណាត់ថ្នាក់សេរីភាពសារព័ត៌មាននៅកម្ពុជាបានធ្លាក់ចុះជាបន្តបន្ទាប់នៅក្នុងរយៈពេល៥ឆ្នាំចុងក្រោយនេះ ដោយបានធ្លាក់ពីចំណាត់ថ្នាក់១២៨ នៅឆ្នាំ២០១៦ មកដល់១៤៤ នៅឆ្នាំ២០២០នេះ បើធៀបនឹងបណ្ដាប្រទេសឬដែនដីសរុប១៨០នៅទូទាំងពិភពលោក។
ខេមបូចា ត្រូវបានផ្ដួចផ្ដើមនិងបង្កើតឡើងដោយក្រុមអ្នកសារព័ត៌មានវិជ្ជាជីវៈមួយក្រុមកាលពីខែធ្នូ ឆ្នាំ២០១៩ បន្ទាប់ពីការបង្ក្រាបរបស់រដ្ឋាភិបាលកម្ពុជាទៅលើសារព័ត៌មានឯករាជ្យនៅក្នុងប្រទេសកម្ពុជាចាប់ពីចុងឆ្នាំ២០១៧មក។
លោក ណុប វី និយាយថា៖ «ដូច្នេះ បើស្ថានភាព [សេរីភាព] យើងមានការស្រុតចុះ វាអាចប៉ះពាល់ទៅដល់មុខមាត់របស់ប្រទេសកម្ពុជាយើងដែរ។ បើសិនស្ថានភាពយើងល្អប្រសើរ ក៏វាទាក់ទាញដល់ពិភពលោកឱ្យគេចាប់អារម្មណ៍អំពីការយកចិត្តទុកដាក់ និងការជ្រោមជ្រែងលើកស្ទួយស្ថានភាពសេរីភាពសារព័ត៌មាននៅក្នុងប្រទេសកម្ពុជាយើងពីសំណាក់ភាគីពាក់ព័ន្ធ ជាពិសេសរាជរដ្ឋាភិបាលយើងហ្នឹងឯង!»។
អគ្គរដ្ឋទូតអាមេរិកប្រចាំនៅកម្ពុជា លោក Patrick Murphy បានសម្ដែងភាពរីករាយ បន្ទាប់ពីបានដឹងថា ស្ថាប័នអ្នកសារព័ត៌មានមួយនេះ ត្រូវបានជ្រើសរើសជាបេក្ខភាពចុងក្រោយសម្រាប់ពានរង្វាន់អន្តរជាតិមួយនេះ។
លោក Patrick Murphy សរសេរលើទ្វីធ័ររបស់លោកនៅថ្ងៃនេះថា៖ «សារព័ត៌មានឯករាជ្យ មានសារៈសំខាន់ចាំបាច់ចំពោះសង្គមប្រជាធិបតេយ្យដ៏វិបុលភាពមួយ ហើយយើងមានមោទកភាពគាំទ្រដល់ការងារដ៏ល្អរបស់ខេមបូចា»។
ខណៈដែលស្ថានភាពសេរីភាពសារព័ត៌មាននៅកម្ពុជាបានធ្លាក់ចុះនោះ ក្លឹបអ្នកកាសែតឬសមាគមអ្នកសារព័ត៌មានដែលត្រូវបានចុះបញ្ជីនៅក្រសួង មានចំនួនរហូតដល់ទៅ៤៨ស្ថាប័នគិតត្រឹមឆ្នាំនេះ។
ជាមួយការចូលរួមត្រេកអរ អគ្គលេខាធិការក្លឹបអ្នកកាសែតកម្ពុជា លោក ពុយ គា ចាត់ទុកការជ្រើសរើសនេះថា ជាការលើកទឹកចិត្តដល់ក្លឹបឬសមាគមអ្នកសារព័ត៌មាន ឱ្យខិតខំប្រឹងប្រែងបំពេញការងាររបស់ពួកគេឱ្យសកម្មថែមទៀត ក្នុងការជួយគាំទ្រនិងគាំពារអ្នកសារព័ត៌មាននៅកម្ពុជា។
លោក ពុយ គា ប្រាប់ថា៖ «ខ្ញុំគិតថាល្អ លើកទឹកចិត្តឱ្យប្រឹងប្រែងតទៅទៀត ក្លឹបណាក៏ដោយ សមាគមណាក៏ដោយ យើងប្រឹងទៅ ប្រឹងទាំងអស់គ្នា ដើម្បីផលប្រយោជន៍អ្នកសារព័ត៌មានខ្លួនឯងផង ហើយដើម្បីផលប្រយោជន៍សង្គមនិងប្រទេសជាតិទាំងមូល»។
អ្នកនាំពាក្យក្រសួងព័ត៌មាន លោក មាស សោភ័ណ្ឌ មានប្រសាសន៍ថា ក្រសួងលើកទឹកចិត្តនិងគាំទ្រទៅដល់អង្គភាពសារព័ត៌មាន ក្លឹប ឬសមាគមអ្នកសារព័ត៌មានទាំងអស់ដែលបានចូលរួមចំណែកកសាងសមត្ថភាពអ្នកសារព័ត៌មាននៅកម្ពុជាឱ្យកាន់តែប្រសើរឡើង។
លោក មាស សោភ័ណ្ឌ ប្រាប់ថា៖ «ក្រសួងតែងតែលើកទឹកចិត្តនិងគាំទ្រទៅដល់អង្គភាពសារព័ត៌មាន ក្លឹប ឬក៏សមាគម ធ្វើយ៉ាងណាឱ្យក្លាយជាសមាគមបំពេញវិជ្ជាជីវៈរបស់ខ្លួនប្រកបដោយក្រមសីលធម៌ គោរពច្បាប់ លិខិតបទដ្ឋានគតិយុត្តិជាធរមាននៅកម្ពុជា ចូលរួមចំណែកក្នុងការកសាងសមត្ថភាពអ្នកសារព័ត៌មានជាសមាជិករបស់ខ្លួន ដើម្បីចូលរួមចំណែកក្នុងការលើកកម្ពស់សមត្ថភាពអ្នកសារព័ត៌មានកម្ពុជា ឱ្យមានការរីកចម្រើន ហើយឱ្យមានចំណេះដឹងកាន់តែទូលំទូលាយក្នុងការបំពេញវិជ្ជាជីវៈរបស់ខ្លួន»។
តួលេខរបស់ក្រសួងព័ត៌មាន បង្ហាញថា កម្ពុជាមានសារព័ត៌មានបោះពុម្ពផ្សាយដល់ទៅ៦៧០ស្ថាប័ន សារព័ត៌មានផ្សាយតាមអនឡាញមានដល់ទៅ៦២១អង្គភាព ប្រព័ន្ធផ្សព្វផ្សាយជាវិទ្យុមានដល់ទៅ២២១ស្ថានីយនៅទូទាំងប្រទេស និងប្រព័ន្ធផ្សព្វផ្សាយជាទូរទស្សន៍សរុប២៧ស្ថានីយ ដោយមិនទាន់រាប់បញ្ចូលបណ្ដាញទូរទស្សន៍ខ្សែកាបរាប់រយនៅទូទាំងប្រទេសទៀតផង៕
