មន្ទីរសម្រាកព្យាបាល លី ស្រីវីណា បានប្រកាសពីការផ្តើមបើកទទួលព្យាបាលអ្នកជំងឺឡើងវិញ ចាប់ពីរសៀលថ្ងៃទី២០ ខែវិច្ឆិកា ស្អែកនេះទៅ បន្ទាប់ពីបានបិទមួយរយៈដោយសារខ្វះលក្ខណៈសម្បត្តិក្នុងការជួយសង្គ្រោះអ្នកជំងឺ បណ្តាលឱ្យអ្នកជំងឺម្នាក់ស្លាប់។
កាលពីថ្ងៃទី៦ ខែវិច្ឆិកា ឆ្នាំ២០២០ ក្រសួងសុខាភិបាល បានសម្រេចបិទមន្ទីរសំរាកព្យាបាលឈ្មោះ លី ស្រីវីណា ដែលជាកម្មសិទ្ធិរបស់អតីតតំណាងរាស្ត្របក្សប្រឆាំង លោកស្រី លី ស្រីវីណា ដោយហេតុផលថា មន្ទីរសម្រាកព្យាបាលនេះ ពុំមានលក្ខណៈសម្បត្តិគ្រប់គ្រាន់ក្នុងការផ្តល់សេវាសង្គ្រោះអ្នកជំងឺ បណ្តាលឱ្យអ្នកជំងឺម្នាក់ស្លាប់។
យោងតាមសេចក្តីជូនដំណឹងរបស់មន្ទីរសម្រាកព្យាបាល លី ស្រី វីណា នៅលើបណ្តាញសង្គមហ្វេសប៊ុករបស់ខ្លួន មន្ទីរសម្រាកព្យាបាលនេះ បានប្រកាសថា នឹងចាប់ផ្តើមបើកទទួលព្យាបាលអ្នកជំងឺឡើងវិញ ចាប់ពីម៉ោង៣រសៀល ថ្ងៃទី២០ ខែវិច្ឆិកា ឆ្នាំ២០២០ ស្អែកនេះតទៅ។
វីអូឌី នៅពុំទាន់អាចសុំការបញ្ជាក់ពី អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេ នៅល្ងាចថ្ងៃព្រហស្បតិ៍នេះ។
គួរបញ្ជាក់ថា បីថ្ងៃក្រោយពីក្រសួងសុខាភិបាល បានប្រកាសបិទមន្ទីរសម្រាកព្យាបាលនេះ លោកស្រី លី ស្រីវីណា ដែលជាអតីតតំណាងរាស្ត្រអតីតគណបក្សសង្គ្រោះជាតិ បានដាក់សំណើរទៅក្រសួងមហាផ្ទៃ ដើម្បីសុំលើកបម្រាមសិទ្ធិនយោបាយ និងសុំផ្តល់នីតិសម្បទាឡើងវិញ។
នៅថ្ងៃទី៩ ខែវិច្ឆិកានោះដែរ លោកស្រី លី ស្រីវីណា ក៏បានសរសេរលិខិតដាច់ដោយឡែកទៀត ទៅកាន់លោកនាយករដ្ឋមន្ត្រី ហ៊ុន សែន ដើម្បីសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ក្រោយពីមានសំណើរពីនាយករដ្ឋមន្ត្រី ព្រះមហាក្សត្រ ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី បានចេញព្រះរាជក្រឹត្យ ចុះថ្ងៃទី១២ ខែវិច្ឆិកា ឆ្នាំ២០២០ ត្រាស់បង្គាប់ផ្តល់នីតិសម្បទាឡើងវិញ ដល់លោកស្រី លី ស្រីវីណា ដែលត្រូវបានហាមឃាត់មិនឱ្យធ្វើសកម្មភាពនយោបាយសម្រាប់រយៈពេល ៥ឆ្នាំ តាមអំណាចសាលដីការបស់តុលាការ កាលពីថ្ងៃទី១៦ ខែវិច្ឆិកា ឆ្នាំ២០១៧៕
